អាទិត្យក្រោយ ទើបស្វាយរៀងអាចនឹងចុះកុងត្រាកីឡាករបរទេស៣នាក់បាន

2016-01-14 16:57:51
ចំនួនមតិ 0 | ចំនួនចែករំលែក 0

ចន្លោះមិនឃើញ

កីឡាករបរទេស៣នាក់ លេងនៅតំបន់ប្រយុទ្ធម្នាក់ បម្រើ២នាក់ គឺជាគោលដៅរបស់ក្លឹបស្វាយរៀងនាំចូលនៅសប្ដាហ៍ក្រោយនេះ បន្ទាប់ពីកីឡាករ៣នាក់នោះបានមកហ្វឹកហាត់និងធ្វើតេស្តប៉ុន្មានសប្ដាហ៍មកនេះ។ ខណៈដែលការចុះកុងត្រា នៅរង់ចាំតែការសម្រេចពីប្រធានក្លឹបប៉ុណ្ណោះ ។

ស្វាយរៀងនាពេលបច្ចុប្បន្នមិនមានកីឡាករបរទេសនៅក្នុងក្រុមនោះទេ ពោលគឺបន្ទាប់ពីចប់រដូវកាល២០១៥ទៅ ក្លិបមិនបានបន្តកុងត្រាឱ្យកីឡាករបរទេសដែលមានស្រាប់ទៀតឡើយ។ ទន្ទឹមនឹងនេះដែរ លោក សំ វ៉ាន់ដេត គ្រូបង្វឹកស្វាយរៀង បានបញ្ជាក់ថារដូវកាលថ្មី លោកចម្រាញ់កីឡាករបរទេសបាន៣នាក់ផ្សេងទៀតហើយ ដើម្បីត្រៀមចុះកុងត្រា គឺខ្សែប្រយុទ្ធម្នាក់ (អ៊ុយក្រែន) និងខ្សែបម្រើ២នាក់ (វ៉្វាន់ដា និងជប៉ុន) ។ ខណៈដែលកុងត្រាវិញ អាចនឹងធ្វើឡើងនៅសប្ដាហ៍ក្រោយ បន្ទាប់ពីលោកស្នើប្រាក់តម្លៃខ្លួន ដល់ប្រធានក្លឹបសម្រេច។

“តាមពិតយើងត្រូវចុះកុងត្រាជាមួយកីឡាករតាំងពីថ្ងៃទី១០ តែដោយសារតែយើងរវល់មិនទាន់បាននិយាយជាមួយប្រធានក្លឹបរឿងតម្លៃខ្លួន ទើបតម្រូវឱ្យពន្យាពេលដល់សប្ដាហ៍ក្រោយ។ អ្វីគ្រប់យ៉ាងស្ថិតិលើប្រធានក្លឹប បើលោកយល់ព្រមចំពោះតម្លៃខ្លួន នោះយើងនឹងទិញយកតាមនោះដែរ”។ សម្ដី លោក សំ វ៉ាន់ដេត។

ចំពោះរឿងស្វាយរៀងចរចាចង់បានកីឡាករក្នុងស្រុក២នាក់វិញ គ្រូបង្វឹកខាងលើបានបញ្ជាក់ថាបរាជ័យបាត់ទៅហើយ ដោយសារតែការចរចារវាងក្លឹបនិងក្លឹបមិនត្រូវគ្នា៕

អត្ថបទ៖ មុន្នី រម្យ