ភាពយន្តខ្មែរទទួលស្គាល់ដោយ ហូលីវូត សម្ពោធល្ងាចមិញ
- 2016-04-07 16:12:44
- ចំនួនមតិ 0 | ចំនួនចែករំលែក 0
ភាពយន្តខ្មែរទទួលស្គាល់ដោយ ហូលីវូត សម្ពោធល្ងាចមិញ
ចន្លោះមិនឃើញ
ភាពយន្តរឿង "តម្លៃស្នេហ៍" របស់ផលិតកម្ម "ខ្មែរមេគង្គ" បានសម្ពោធហើយកាលពីល្ងាចមិញនៅ រោងភាពយន្ត Major Cineplex by Cellcard ផ្សារទំនើបអ៊ីអន ក្រោយខ្សែភាពយន្តនេះ ធ្លាប់ឈ្នះពានរង្វាន់ដល់ទៅ៤ ពីមហោស្រពភាពយន្តនៅហូលីវូដ ហៅថា Hollywood International Moving Pictures Film Festival (HIMPFF)។
(រាប់ពីឆ្វេង) តារាសម្ដែង ថមមី ស៊ិន យូប៊ីន និង យឹម សម្បត្តិ
ពានរង្វាន់ទាំង៤ដែលរឿង "តម្លៃស្នេហ៍" ទទួលបាន គឺមាន៖ ពានរង្វាន់ “Best Editor” បានទៅលោក សៅ យឿន “Best Sound Designer” បានលើឈ្មោះ Thavy Khorn។ ពានបន្តទៀតមាន ‘Best Cinematographers’ បានទៅលើឈ្មោះ TaingHourt Ly និង Vanna Meoun ។
លោក ម៉ាធ្យូ រ៉ូប៊ីនសុន ចាងហ្វាងផលិតកម្ម
យូប៊ីន និង សម្បត្តិ បានលើកឡើងស្រដៀងគ្នាថា អ្នកទាំងពីរស្ទើរមិនជឿនៅពេលដែលទទួលបានដំណឹងថា រឿង "តម្លៃស្នេហ៍" ជាប់ពាន់ពីហូលីវូត ហើយពួកគេសប្បាយចិត្តខ្លាំងណាស់ និងចង់ឲ្យខ្សែភាពយន្តខាងលើនេះ ចាក់បញ្ចាំងឲ្យទស្សនិកជនបានទស្សនាឆាប់។
ចំណែកលោក សាវីន ហ្វីលីព ដែលជាតារាសម្ដែងជើងចាស់ម្នាក់ដែលបានចូលរួមសម្ដែងក្នុងរឿងនេះដែរ បានលើកឡើងថា វាជារឿងអស្ចារ្យមួយ ដែលភាពយន្តខ្មែរ រឿង "តម្លៃស្នេហ៍" ទទួលបានភាពជោគជ័យលើឆាកអន្តរជាតិបែបនេះ ។ លោកបានបន្តថា ភាពយន្តមួយអាចល្អទៅបាន មិនមែនតែដោយសារតែការសម្ដែងតែម្យ៉ាងនោះទេ គឺអាស្រ័យខ្លឹមសារនៃសាច់រឿងល្អ និងការខិតខំការប្រឹងប្រែងក្រុមផលិត។
តារាដែលទស្សនិកជនដាក់ងារឲ្យជាតារាសប្បុរសធម៌រំពឹងថា រឿង"តម្លៃស្នេហ៍" និងជោគជ័យ ហើយនឹងក្លាយជា ខ្សែភាពយន្តដែលរកចំណូលបានខ្ពស់ក្នុងឆ្នាំ២០១៦ ជាក់ជាមិនខាន។
កញ្ញា ស៊ិន យូប៊ីន តួឯកស្រីក្នុងរឿង "តម្លៃស្នេហ៍"
ផលិតកម្ម "ខ្មែរមេគង្គ" កន្លងមក ធ្លាប់បានផលិតខ្សែភាពយន្តល្បីជាច្រើន មានដូចជា រឿង "រសជាតិជីវិត" រឿង "បាត់ខ្លួន" រឿង "នៅកំលោះដល់ណាខ្ញុំ?" និងរឿង "សន្យាស្នេហ៍" ជាដើម ដោយខ្សែភាពយន្តទាំងនោះសុទ្ធតែត្រូវទទួលបានការគាំទ្រច្រើនពីទស្សនិកជន។
លោក ម៉ាធ្យូ រ៉ូប៊ីនសុន ចាងហ្វាងផលិតកម្មរំពឹងថា រឿង "តម្លៃស្នេហ៍” នឹងធ្វើឲ្យអ្នកទស្សនាសប្បាយ ប្លែកអារម្មណ៍ ហើយក្រោយពីបានទស្សនារួច លោកជឿថា អ្នកទាំងនោះ នឹងនាំមិត្តភ័ក្ដិ ក៏ដូចជាសាច់ញាតិរបស់ពួកគេមកទស្សនាបន្តទៀតមិនខាន។
ខ្សែភាពយន្តខាងលើ នឹងចាក់បញ្ចាំងជូនទស្សនិកជនបានទស្សនា ចាប់ពីនៅថ្ងៃទី១១ ខែ មេសា ឆ្នាំ ២០១៦នៅគ្រប់រោងកុនទំនើបទាំងអស់ក្នុងរាជធានីភ្នំពេញ និង ក្រុងសៀមរាប៕
ទស្សនាទិដ្ឋភាពសម្ពោធរឿង "តម្លៃស្នេហ៍ យប់មិញបន្ថែមទៀត សូមទស្សនាវីដេអូខាងក្រោម៖
អត្ថបទ៖ ខុត សីហា