រឿង "តម្លៃស្នេហ៍" បញ្ចាំងជូនទស្សនាចាប់ពីថ្ងៃនេះទៅនៅភ្នំពេញ និងសៀមរាប

2016-04-11 15:48:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ភាពយន្តរឿង "តម្លៃស្នេហ៍" របស់ផលិតកម្ម "ខ្មែរមេគង្គ" ដែលបានសម្ពោធហើយកាលពីថ្ងៃទី៦ ខែ មេសា កន្លងទៅនៅរោងភាពយន្ត Major Cineplex by Cellcard ផ្សារទំនើបអ៊ីអន នឹងចាក់ជូនទស្សនិកជនបានទស្សនា ចាប់ពីថ្ងៃនេះតទៅ គ្រប់រោងកុនទំនើបទាំងអស់ក្នុងរាជធានីភ្នំពេញ និង ក្រុងសៀមរាប។

រឿង “តម្លៃស្នេហ៍” ជាខ្សែភាពយន្តខ្នាតធំមួយនិយាយទាក់ទងនឹងការផ្សំផ្គុំ គូស្រករ ដោយក្នុងសាច់រឿងមានលាយឡំមនោសញ្ចេតនា កំប្លែង ការស្រលាញ់ ជំទាស់ វាយឫក ប្រកាន់វណ្ណៈជាដើម។ ដែលសាច់រឿង សរសេរដោយលោក ស្ទូអាត ឈីឆាម សរសេរប៉ារ៉ូលដោយលោក ម៉ាធ្យូ រ៉ូប៊ីនសុន។

ស្រីស្អាត ស៊ីន យូប៊ីន និង លោក យិម សម្បត្តិ គឺជាតួអង្គឯកក្នុងខ្សែភាពយន្តខ្នាតធំមួយនេះ ជាមួយគ្នានោះ ក៏មានតារាសម្ដែងជាច្រើននាក់ផ្សេងទៀតចូលរួមសម្ដែងដែរមានដូចជា អែន យ៉ាដាវ លោក សាវិន ហ្វីលីព កញ្ញា សុខ មុនីរក្សា ជាដើម។

ភាពអស្ចារ្យនៃខ្សែភាពយន្តនេះ មិនទាន់បានដាក់បញ្ចាំងផ្លូវការនៅក្នុងស្រុកផង រឿង"តម្លៃស្នេហា" បានឈ្នះពានរង្វាន់រហូតដល់ទៅ៤ ពីមហោស្រពភាពយន្តនៅហូលីវូដ ឬ Hollywood International Moving Pictures Film Festival (HIMPFF)។

កន្លងមកផលិតកម្ម «ខ្មែរមេគង្គ»ធ្លាប់បានផលិតខ្សែភាពយន្តល្បីជាច្រើន មានដូចជា រឿង «រសជាតិជីវិត» រឿង «បាត់ខ្លួន» រឿង «នៅកំលោះដល់ណាខ្ញុំ?» និងរឿង «សន្យាស្នេហ៍» ជាដើម ដោយខ្សែភាពយន្តទាំងនោះសុទ្ធតែត្រូវទទួលបានការគាំទ្រច្រើនពី ទស្សនិកជន។

ក្នុងថ្ងៃឈប់សម្រាករដូវចូលឆ្នាំប្រពៃណីខ្មែរនេះ ប្រសិនបើលោកអ្នកមិនចង់ដើរលេងទៅណាឆ្ងាយទេ អាចនាំមិត្តភ័ក្ដិ ក្រុមគ្រួសារ ឬ សំណព្វចិត្តរបស់ខ្លួន ទៅទស្សនាភាពយន្តរឿង"តម្លៃស្នេហ៍" ចាប់ពីថ្ងៃនេះតទៅ គ្រប់រោងកុនទំនើបទាំងអស់ក្នុងរាជធានីភ្នំពេញ និង ក្រុងសៀមរាប៕