Sergio ​ជា​អ្នក​គាំទ្រ​របស់​ក្រុម Valencia ​រស់​នៅ​ប្រទេស​ឈីលី។ ​បុរស​វ័យ​កណ្ដាល​រូប​នេះ ​ស្រលាញ់​ក្រុម​អេស្ប៉ាញ​មួយ​នេះ​អស់​រយៈ​ពេល​ជាង​១០​ឆ្នាំ​មក​ហើយ ដោយ​គ្រប់​ការ​ប្រកួត​មិន​ដែល​ខកខាន​មើល​នោះ​ទេ។

តួយ៉ាង​កាល​ពី​ឆ្នាំ​មុន នៅ​ពេល Valencia ​​ប្រកួត​មុន​បើក​រដូវ​កាល​ដោយ​ទៅ​ប្រទេស​ឈីលី​ផ្ទាល់ ក៏ Sergio ​បាន​ទៅ​ទស្សនា​ផ្ទាល់​ដែរ ដោយ​កាល​នោះ​រូប​គេ​ធ្វើ​ដំណើរ​ពី​ផ្ទះ​ទៅ​កន្លែង​ប្រកួត​ចម្ងាយ​ដល់​ទៅ​១​ពាន់​គីឡូម៉ែត្រ​ឯ​ណោះ ដើម្បី​បាន​ជួប​ជាមួយ​កីឡាករ​ផ្ទាល់។

ដោយសារ​តែ​ដូច្នេះ​ហើយ ​ក្រុម​ខ្លាំង​នៅ​អេស្ប៉ាញ​មួយ​នេះ​បាន​សម្រេច​ក្ដី​ស្រមៃ​ឱ្យ​អ្នក​គាំទ្រ​រូប​នេះ ដោយ​បាន​អញ្ជើញ​រូប​គេ​ទៅ​ដល់​កីឡដ្ឋាន Mestalla ​របស់​ក្រុម Valencia ​ផ្ទាល់។ ដោយ​គ្រាន់​តែ​ទៅដល់​ភ្លាម Sergio ​បាន​បង្ហាញ​អារម្មណ៍​រំភើប​រីករាយ​ជា​ខ្លាំង ព្រោះ​វា​ជា​ក្ដី​ស្រមៃ​ក្នុង​ឆាក​ជីវីត​របស់​គេ។

ខាង​ក្រោម​នេះ​ជា​វីដេអូ​រឿង​របស់ Sergio ​អ្នក​គាំទ្រ​ស្មោះស្ម័គ្រ​របស់​ក្រុម​ប្រចៀវ​ខ្មៅ​អេស្ប៉ាញ៖

និយាយ​ពី​ក្រុម Valencia ​បច្ចុប្បន្ន​នេះ​វិញ ​ក្រោយ​ពី​បណ្ដេញ​លោក Gary Neville ​ចេញ​ទៅ ​ហើយ​យក​លោក Pako Ayestarán ​មក​ធ្វើ​ជា​គ្រូ​បង្វឹក​បណ្ដោះអាសន្ន​នោះ ​ហាក់​មាន​ទម្រង់​លេង​ល្អ​វិញ​បន្តិច ដោយ​ឈរ​នៅ​ចំណាត់​ថ្នាក់​លេខ​៨​ក្នុង​តារាង La Liga ​របស់​អេស្ប៉ាញ៕

អត្ថបទ៖ មុន្នី រម្យ វីដេអូ​និង​រូបភាព៖ ដៃ​គូ​សហការ Sabay & Valencia