សុខា រ៉ានាថ៖ សំបុត្រ៥ម៉ឺនសន្លឹកលក់អស់ហើយ សម្រាប់កម្ពុជា ប៉ះ ទីម័រ ថ្ងៃស្អែក

2016-05-29 01:08:37
ចំនួនមតិ 0 | ចំនួនចែករំលែក 0

ចន្លោះមិនឃើញ

សំបុត្រសម្រាប់ចូលទស្សនាការប្រកួតមិត្តភាពអន្តរជាតិរវាងក្រុមជម្រើសជាតិកម្ពុជា និងទីម័រខាងកើតម៉ោង៧យប់ស្អែកនេះត្រូវបានលក់អស់ហើយគិតត្រឹមល្ងាចថ្ងៃសៅរ៍ ទី២៨ ខែឧសភា ឆ្នាំ២០១៦នេះ។

លោក សុខា រ៉ានាថ អ្នកទទួលបន្ទុកផ្នែកទីផ្សាររបស់សហព័ន្ធបាល់ទាត់កម្ពុជាបានប្រាប់វេលាម៉ោង៦ល្ងាចនេះថា សំបុត្រចំនួន៥ម៉ឺនសន្លឹកត្រូវបានលក់អស់ហើយ។ ល្ងាចនេះមិនមានសំបុត្រលក់ទៀតទេ។

លោកបន្ថែមថា ប្រសិនបើមានសំបុត្រលក់បន្ថែមសម្រាប់ថ្ងៃស្អែក ឬយ៉ាងណានោះ សហព័ន្ធនឹងផ្តល់ដំណឹងជូនពេលក្រោយទៀត។ សូមបញ្ជាក់ថា តម្លៃសំបុត្រប្រភេទ A តម្លៃ១ម៉ឺនរៀល និងប្រភេទ B តម្លៃ៥ពាន់រៀល។

នៅចាំបានថា នៅពេលដែលកម្ពុជាធ្វើម្ចាស់ផ្ទះប្រកួតនឹងក្រុមកោះម៉ាកាវ សម្រាប់ជម្រុះពានរង្វាន់បាល់ទាត់ពិភពលោក FIFA World Cup នៅស្តាតចាស់ ក៏លក់សំបុត្រអស់ដែរ ប៉ុន្តែនៅស្តាតចាស់មានកន្លែងអង្គុយតិចជាងពហុកីឡដ្ឋានជាតិ។ នេះអាចចាត់ទុកថា ជាលើកទីមួយដែលការប្រកួតនៅពហុកីឡដ្ឋានជាតិត្រូវបានលក់សំបុត្រអស់មុនការប្រកួតមួយថ្ងៃថែមទៀត៕

អត្ថបទ៖ ជាន ចាន់រ៉ា