ក្លាយជាឪពុកម្នាក់ ការគិតនិងទម្លាប់ផ្លាស់ប្តូរទាំងស្រុង

2016-06-16 17:06:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ជាទូទៅមនុស្សប្រុសចូលចិត្តសេរីភាព និងពេលវេលាឯកជនក្នុងការដើរលេងជួបជុំមិត្តភក្តិ តែទម្លាប់ទាំងនេះត្រូវកាត់បន្ថយ ឬក៏ផ្លាស់ប្តូរទាំងស្រុងនៅពេលមានភរិយានិងកូន។

ហេតុអ្វីនៅពេលក្លាយជាស្វាមីនិងឪពុក បុរសៗភាគច្រើនផ្លាស់ប្តូរទម្លាប់ និងការគិតមួយចំនួននោះ? ខាងក្រោមគឺជាការចែករំលែកបទពិសោធរបស់បុរសជាស្វាមី៣រូបដែលក្រុមការងារ Sabay បានសាកសួរៈ

មានតួនាទីជាមន្រ្តីរាជការ លោក ម៉ៅ ពិសិដ្ឋ អះអាងថាលោកបានផ្លាស់ប្តូរទម្លាប់ដោយមិនដឹងខ្លួនបន្ទាប់ពីក្លាយជាឪពុកម្នាក់។ ការផ្លាស់ប្តូធំបំផុតនោះ គឺពីមុនលោកជាមនុស្សម្នាក់ដែលចូលចិត្តក្មេង តែលោកមិនចេះទ្រាំនឹងសំឡេងក្មេងស្រែកយំ និងភាពរពឹសនៅមិនស្ងៀមរបស់គេ តែពេលនេះលោកអាចមើលថែកូនស្រីខ្លួនដោយផ្ទាល់ដៃបានយ៉ាងល្អ។ ទោះជាពេលនេះលោកចូលចិត្តជីវភាពជាឪពុកម្នាក់ តែលោកមិនប្រាថ្នាយកកូនច្រើនឡើយព្រោះលោកចង់ចិញ្ចឹមកូនឲ្យបានល្អ ប្រកបដោយភាពកក់ក្តៅស្និទ្ធស្នាល និងការអប់រំល្អ ដោយដៃរបស់លោកផ្ទាល់ ។

លោក ម៉ៅ ពិសិដ្ឋ និងគ្រួសារ

មិនខុសពីលោក ពិសិដ្ឋ ប៉ុន្មានទេ បុរសកូន៣ សៅ វណ្ណៈ និយាយថា «ពេលមានកូន១ ខ្ញុំផ្លាស់ប្តូរការគិតបន្តិច ដល់មានកូន២ គិតនិងផ្លាស់ប្តូរទម្លាប់រឹតតែច្រើន ដល់កូនទី៣មិនបាច់និយាយទេ លះបង់ម៉ាចប់ម៉ង»។ បុរសកូនបី វ័យ៤៥ឆ្នាំ ធ្វើការនៅក្រុមហ៊ុនឯកជនរូបនេះបន្តថា ជាដំបូងគិតរឿងចំណាយ គិតធ្វើម៉េចរកលុយឲ្យច្រើន គិតពីការសិក្សា អនាគតកូន គិតពីវេលាមើលថែទាំនិងអប់រំកូនឲ្យក្លាយជាមនុស្សល្អ។

(រូបតំណាង)

ងាកមកលោកឪពុកវ័យក្មេង ហេង វីរៈវិញម្តងនិយាយដោយឥតស្ទាក់ស្ទើរថា ខ្លួនពិតជាបានកាត់បន្ថយការដើរលេងខាងក្រៅ ថែមទាំងចាស់ទុំជាងមុន ព្រោះមានកាតព្វកិច្ចច្រើន។ បុរសអាជីវករកូន១រូបនេះប្រាប់បន្តថា មិនមែនជារឿងងាយស្រួលទេ តែដើម្បីគ្រួសារនិងកូនៗ លោករីករាយនឹងការផ្លាស់ប្តូរនេះ៕