សរ រាជសីហ៍«ខ្ញុំមានក្ដីបារម្ភខ្លះៗ តាំងពីមុនប្រកួតពេលដឹងថាប៉ះ ពេជ្រ សីហា»

2016-09-05 16:29:01
ចំនួនមតិ 0 | ចំនួនចែករំលែក 0

ចន្លោះមិនឃើញ

«ខ្ញុំមានក្ដីបារម្ភខ្លះៗ តាំងពីមុនប្រកួតពេលដឹងថាប៉ះ ពេជ្រ សីហា»។ ជាសម្ដីរបស់ សរ រាជសីហ៍ បន្ទាប់ពីរូបគេត្រូវបាន ពេជ្រ សីហា ផ្ដួលត្រឹមទឹកទី១ កាលពីម្សិលមិញនេះក្នុងការប្រកួតដណ្ដើមខ្សែក្រវាត់សង្វៀន PNN វគ្គពាក់កណ្ដាលផ្ដាច់ព្រ័ត្រ ដែលឧបត្ថម្ភដោយភេសជ្ជៈគោជល់។

ការប្រកួតរបស់ សរ រាជសីហ៍ និង ពេជ្រ សីហា ចាប់ផ្ដើមបានត្រឹមពាក់កណ្ដាលផ្លូវនៃទឹកទី១ ប៉ុណ្ណោះ។ ពេជ្រ សីហា បានប្រើកណ្ដាប់ដៃចំនួន ៥ដៃជាប់ៗគ្នាធ្វើឲ្យ រាជសីហ៍ សន្លប់មិនអាចបន្តការប្រកួតបាន។

ទាក់ទិននឹងការបរាជ័យនេះ សរ រាជសីហ៍ បានឲ្យដឹងថា រូបគេមានក្ដីបារម្ភខ្លះៗតាំងពីមុនការប្រកួតដោយសារដឹងថា ពេជ្រ សីហា មានស្នៀតល្អជាងខ្លួន ខណៈបទពិសោធន៍ សីហា ហាក់មានកម្រិតលើសរូបគេ។ បច្ចេកទេសមិនសូវលើសគ្នាខ្លាំងប៉ុន្មានទេ ប៉ុន្តែរូបគេគិតថាពិតជាពិបាកយកឈ្នះក្នុងការប្រកួតនេះតាំងពីមុនការប្រកួតចាប់ផ្ដើមមកម្ល៉េះ។

អ្នកប្រដាល់បទពិសោធន៍ច្រើនគួរសមរូបនេះបន្ថែមថា ចំពោះការហ្វឹកហាត់ពេញលេញល្អ ការសន្លប់លើកនេះអាចមកពីភ្លាត់ស្នៀតរបស់ខ្លួនឯង។ តាំងចិត្តថានឹងធ្វើឲ្យបានល្អដែរក្នុងការប៉ះរៀមច្បងរូបនេះ ប៉ុន្តែធ្វើមិនអាចធ្វើបាន។

ការបរាជ័យរបស់ សរ រាជសីហ៍ បានធ្វើឲ្យ ពេជ្រ សីហា ឡើងទៅប៉ះ ឡុង សុវណ្ណឌឿន នាវគ្គផ្ដាច់ព្រ័ត្រដណ្ដើមខ្សែក្រវាត់ PNN នាថ្ងៃទី១៨ ខែកញ្ញា ឆ្នាំ២០១៦ខាងមុខនេះ៕