អ៊ុំ ចំរើន បើឈ្នះខ្សែក្រវាត់លើកនេះ នឹងយកលុយទៅពង្រីកហាងចាក់សាក់

2016-09-07 22:29:43
ចំនួនមតិ 0 | ចំនួនចែករំលែក 0

ចន្លោះមិនឃើញ

សិស្សគុនក្លឹបតាឡីដំរីមានរិទ្ធិ អ៊ុំ ចំរើននឹងយកប្រាក់រង្វាន់របស់ខ្លួនទៅពង្រីករបបរកស៊ីថែមទៀត ប្រសិនបើរូបគេអាចឈ្នះខ្សែក្រវាត់ភេសជ្ជៈគោជល់ដែលត្រូវប្រកួតវគ្គផ្តាច់ព្រ័ត្រនៅ CNC ថ្ងៃសៅរ៍ ទី១៧ ខែកញ្ញា ឆ្នាំ២០១៦នេះ។

អ៊ុំ ចំរើន

អ្នកលេងវ័យក្មេង អ៊ុំ ចំរើនត្រូវប្រឈមនឹងរៀមច្បង កន ចន្ថា ក្នុងវគ្គផ្តាច់ព្រ័ត្រនៃការប្រកួតដណ្តើមខ្សែក្រវាត់គោជលក្នុងប្រភេទទម្ងន់ ៦៥ គីឡូក្រាម។ កីឡាកររូបនេះប្រាប់ Sabay ថាប្រសិនបើឈ្នះខ្សែក្រវាត់ រូបគេនឹងយកប្រាក់ទៅពង្រីកការងាររកស៊ីថែមទៀត។ សម្រាប់ជយលាភីដែលជាម្ចាស់ខ្សែក្រវាត់នេះនឹងទទួលបានប្រាក់រង្វាន់៥ពាន់ដុល្លារអាមេរិក និងខ្សែកមាសទម្ងន់៣ជីថែមទៀត។

ក្រៅពីអាជីពប្រដាល់ដែលជាអាជីពឈឺខ្លួនមួយនេះ អ៊ុំ ចំរើនបានបើកហាងចាក់សាក់ផ្ទាល់ខ្លួនមួយដែលមានឈ្មោះថា OTR ដែលដំណើរការបានជាងកន្លះឆ្នាំហើយ។ កីឡាករប្រាប់ថា រូបគេត្រូវការប្រាក់ដើម្បីទៅរៀនបច្ចេកទេសចាក់បន្ថែមទៀតនៅប្រទេសថៃ និងត្រូវទិញសម្ភារផ្សេងៗសម្រាប់ប្រើប្រាស់ និងពង្រីកហាងចាក់សាក់ OTR របស់ខ្លួន។

មុនឈានដល់វគ្គផ្ដាច់ព្រ័ត្រនេះ អ៊ុំ ចំរើន បានផ្ដួលកីឡាករ មាជ សុខរ៉ា ឲ្យបោះបង់ការប្រកួតត្រឹមទឹកទី២ក្នុងវគ្គពាក់កណ្តាលផ្តាច់ព្រ័ត្រ ខណៈ កន ចន្ថា បានទាត់កីឡាករ វី សេរីចាន់ឌីន ឲ្យសុំចុះចាញ់ត្រឹមទឹកទី៣ផងដែរ។

រង្វាន់សម្រាប់អ្នកលេខ១ បានទឹកប្រាក់ ៥០០០ ដុល្លារ ខ្សែក្រវាត់១ ខ្សែកមាស៣ជី និងពាន១ ហើយលេខ២ បានទឹកប្រាក់ ២៥០០ ដុល្លារ ខ្សែកមាស៣ជី និងពាន១។ ចំណែកចំណាត់ថ្នាក់លេខ៣ បានទឹកប្រាក់១៥០០ ដុល្លារ ខ្សែកមាស ៣ជី និងពាន១ ខណៈចំណាត់ថ្នាក់លេខ៤ បានទឹកប្រាក់ ១០០០ ដុល្លារ និងពាន១៕

អត្ថបទ៖ នួន ស៊ីណា