អាសន្នហើយ! ជំងឺហ្ស៊ីកា កំពុងរាតត្បាតក្នុងទីក្រុងបាងកក

2016-09-11 17:42:19
ចំនួនមតិ 0 | ចំនួនចែករំលែក 0

ចន្លោះមិនឃើញ

វីរុសហ្ស៊ីកា (Zika) ២១ករណី ត្រូវគេរាយការណ៍ថាកើតមាននៅក្នុងសង្កាត់ពាណិជ្ជកម្ម Sathon របស់ទីក្រុងបាងកក ខណៈដែលមន្ត្រីទទួលខុសត្រូវកំពុងឃ្លាំមើលយ៉ាងប្រុងប្រយ័ត្នលើករណីអាចឆ្លងទៅកាន់បណ្ដាសង្កាត់ផ្សេងៗទៀតនៅក្នុងទីក្រុងទាំងមូល។

លោកវេជ្ជបណ្ឌិត Wantanee Wattana លេខាធិការរងរបស់រដ្ឋបាលក្រុងបាងកក (BMA) បានប្រាប់ឲ្យដឹងថា អ្នកដែលឆ្លងវីរុសទាំងនោះ ក៏មានស្ត្រីពរពោះម្នាក់ផងដែរ ដែលប្ដីរបស់នាងទើបត្រឡប់មកពីសិង្ហបុរី។ នេះយោងតាមប្រព័ន្ធផ្សព្វផ្សាយព័ត៌មាននៅថៃ កាលពីថ្ងៃសៅរ៍ ម្សិលមិញនេះ។

ស្ត្រីនោះ មានអាការក្ដៅខ្លួនខ្លាំង ឡើងកន្ទួល ឈឺសន្លាក់ឆ្អឹង និងភ្នែកឡើងក្រហម។ នាងឆ្លងវីរុសនេះ ពេលដែលគភ៌មានអាយុ ៣៧ សប្ដាហ៍ទៅហើយ តែពេលនោះ នាងបានសម្រាលកូន ខណៈម្ដាយ និងកូន មានសុវត្ថិភាពទាំងអស់។

សង្កាត់ Sathon ស្ថិតនៅជាប់សង្កាត់ Bang Kholaem, Bang Rak, Khlong Toei, Pathumwan និង Yannawa នៃទីក្រុងបាងកក។ អ្នកឆ្លងវីរុស ត្រូវគេណែនាំឲ្យស្ថិតនៅក្នុងផ្ទះ ៣០ ថ្ងៃ។

អាជ្ញាធរថៃបានរាយការណ៍ថ្មីៗនេះថា ករណីឆ្លងវីរុសប្រមាណជា ២០ ករណី មាននៅខេត្ត Bung Kan, Chanthaburi, Chiang Mai និង Phetchabun ។

ហ្ស៊ីកា ជាវីរុសចម្លងតាមមូសខ្លាញី ដែលរកឃើញដំបូងលើសត្វស្វានៅប្រទេស Uganda នៃទ្វីបអាហ្វ្រិក ក្នុងឆ្នាំ១៩៤៧ និងលើមនុស្សនៅឆ្នាំ ១៩៥២ នៅ Uganda និងសាធារណរដ្ឋ តង់ហ្សានី។ ហ្ស៊ីកា ឆ្លងតាមរយៈមូសខ្លាញីមានផ្ទុកវីរុស ហ្ស៊ីកា និងជាជំងឺឆ្លងពីម្ដាយទៅទារកក្នុងផ្ទៃ។ ក្រោយរីករាលដាលខ្លាំងនៃជំងឺនេះ គេសង្កេតឃើញថា ទារកកើតដែលមកមានក្បាលតូច ទន់ដៃជើង កូនស្លាប់ក្នុងផ្ទៃ។ ហ្ស៊ីកា ជាធម្មតាបង្កឱ្យមានជំងឺស្រាលមិនធ្ងន់ធ្ងរ ដែលចេញរោគសញ្ញានៅរយៈពេលពីរឬបីថ្ងៃ ក្រោយមូសខ្លាផ្ទុកវីរុសខាំ។ អ្នកឆ្លងជំងឺនេះ មានរោគសញ្ញាគ្រុនក្ដៅតិចៗ ឈឺក្បាល កន្ទួលក្រហមលើស្បែក។ អ្នកខ្លះក្រហមភ្នែក ឈឺសាច់ដុំ ឈឺសន្លាក់ និងអស់កម្លាំង ហើយវានឹងបាត់ទៅវិញក្នុងរយៈពេល ២ ទៅ ៧ ថ្ងៃ ដោយប្រើថ្នាំបញ្ចុះកម្ដៅ ថ្នាំបំបាត់ការឈឺចាប់ និងផឹកទឹក សម្រាកឱ្យបានច្រើន។ ប៉ុន្តែបើរោគសញ្ញាវិវត្តកាន់តែអាក្រក់ អ្នកជំងឺត្រូវស្វែងរកការផ្ដល់ប្រឹក្សាវេជ្ជសាស្ត្រ ប៉ុន្តែបច្ចុប្បន្ន គ្មានការព្យាបាលជាក់លាក់ ឬវ៉ាក់សាំងការពារជំងឺនេះឡើយ។

ដោយ៖ សុផាត ប្រភព និងរូបភាព៖ Bangkok Post