ពេជ្រ សីហា ដឹងថាខ្លួនចាញ់ព្រោះវាយ ឡុង សុវណ្ណឌឿន មិនឈឺផង

2016-09-19 17:27:36
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងកណ្ដាប់ដៃ ពេជ្រ សីហា ថាសម្រាប់ការចាញ់ប្រកួតវគ្គផ្ដាច់ព្រ័ត្រដណ្ដើមខ្សែក្រវាត់ភេសជ្ជៈគោជល់របស់ទូរទស្សន៍ PNN ទម្ងន់ ៦៩ គីឡូក្រាមនេះគឺពិតអស់ចិត្តហើយព្រោះដឹងថាខ្លួនវៃដៃគូមិនឈឺបន្តិចផង។

បើតាមការឲ្យដឹងកីឡាករមុខតាន់ ពេជ្រ សីហា ដោយសារតែមានជំងឺផ្ដាសាយទើបធ្វើឲ្យជើងខ្លាំងរូបនេះគ្មានកម្លាំងក្នុងការប្រកួតនោះទេ បើទោះខំព្យាយាមវៃយ៉ាងក៏មិនធ្វើឲ្យកីឡាករ ឡុង សុវណ្ណឌឿន ឈឺដែរ ។ ចំពោះការចាញ់ខ្សែក្រវាត់ល្ងាចថ្ងៃអាទិត្យម្សិលមិញនេះកីឡាករពូកែប្រើដៃរូបនេះពិតជាអស់ចិត្តហើយ មិនមានអ្វីតវ៉ាឬចាញ់ដោយសារភ្លាត់ស្នៀតដូចអំឡុងប្រកួតផ្ដាច់ព្រ័ត្រជាមួយកីឡាករ រឿង សុភ័ណ្ឌ នៅទូរទស្សន៍ CNC នោះទេ។

ក្រោយបញ្ចប់ការប្រកួតវគ្គផ្ដាច់ព្រ័ត្រខ្សែក្រវាត់ភេសជ្ជៈគោជលរដូវកាលទី៣រវាងកីឡាករ ឡុង សុវណ្ណឌឿននិង ពេជ្រ សីហា នៅស្ថានីយទូរទស្សន៍ PNN ក៏បានធ្វើសន្និសីទកាសែតបើកការប្រកួតដណ្ដើមខ្សែក្រវាត់រដូវកាលទី៤ ក្នុងពេលនោះផងដែរ។ ការប្រកួតដណ្ដើមខ្សែក្រវាត់នេះជាការប្រកួតក្នុងប្រភេទទម្ងន់ ៧៥ គីឡូក្រាមដែលមានបេក្ខភាពខ្មែរ៤រូបនិងថៃ៤រូប។

បេក្ខភាពដែលចូលរួមប្រកួតបែងចែកជា២ពូល ដោយពូល A កីឡាករកម្ពុជារួមមាន មាស ភារម្យ សុខ ទូច ព្រុំ សំណាង អ៊ុង វីរៈ ឯពូល B កីឡាករថៃវិញមាន ឌីសេសលេក ឡាយផេត ណាក់រ៉បដាំ តងចេ ឆាយណាធីប ។ សម្រាប់ប្រកួតសន្សំពិន្ទុទៀតសោតកីឡាករខ្មែរមិនប្រកួតប៉ះគ្នានោះទេ ពួកគេនឹងធ្វើការប្រកួតឆ្លងពូលខ្មែរប៉ះថៃនៅវគ្គសន្សំពិន្ទុ។ បញ្ចប់ការប្រកួតវគ្គសន្សំពិន្ទុកីឡាករខ្មែរនិងកីឡាករថៃរូបណាមានពិន្ទុខ្ពស់ជាងគេមានសិទ្ធទៅប្រកួតវគ្គផ្ដាច់ព្រ័ត្រតែម្ដង៕