Miss Grand Cambodia រួមជាមួយកុមារក្នុងកម្មវិធីប្រឡងចម្រៀង Kodomo ចែករំលែកក្ដីស្រឡាញ់

2016-09-21 17:36:24
ចំនួនមតិ 0 | ចំនួនចែករំលែក 0

ចន្លោះមិនឃើញ

បេក្ខភាពជយលាភី Miss Grand Cambodia 2016 កញ្ញា ហេង ចន្ថា រួមជាមួយប្អូនៗកុមារ៨នាក់ផ្សេងទៀត បានធ្វើសកម្មភាពសប្បុរសធម៌រួមគ្នានៅអង្គការលើកស្ទួយប្រជាពលរដ្ឋដោយការចែករំលែកក្ដីស្រឡាញ់របស់ពួកគេទៅកុមាររបស់អង្គការដែលសុទ្ធសឹងជា កុមារក្រីក្រ។

កញ្ញា ហេង ចន្ថា Miss Grand Cambodia 2016 ចែកអំណោយជូនកុមារអង្គការ "លើកស្ទួយប្រជាពលរដ្ឋ"

សកម្មភាពចម្បងៗដើម្បីចែករំលែងក្ដីស្រឡាញ់ មានដូចជាបញ្ចេញសមត្ថភាពរបស់ប្អូនៗកុមារក្នុងកម្មវិធីប្រឡងចម្រៀង Kodomo ទាំង៨រូប រួមទាំងការចែកចែកផលិតផលសម្រាប់កូនក្មេងជូនកុមាររបស់អង្គការផង។

នេះជាសកម្មភាពថ្មីមួយរបស់កញ្ញា ហេង ចន្ថា Miss Grand Cambodia 2016 ដែលត្រៀមតំណាងកម្ពុជាទៅប្រកួតនៅសហរដ្ឋអាមេរិកនៅខែក្រោយ។ យុវតីវ័យ ២១ បញ្ជាក់ថា នាងធ្លាប់តែធ្វើក្នុងលក្ខខណៈផ្ទាល់ខ្លួនជាមួយក្រុមគ្រួសារ ប៉ុន្តែលើកនេះ គឺក្នុងនាមការងារ។

ដូច្នេះហើយនាងសប្បាយចិត្តសម្រាប់កិច្ចការនេះ ព្រោះនាងជឿថា កុមារនឹងទទួលបានភាពកក់ក្ដៅ ក្នុងពេលពួកគេទាំងអស់ ភាគច្រើនជាកុមារក្រីក្រ និងកំព្រាថែមទៀត។ ងាកមកលោក មែ វិចិត្របុត្រ នាយកគ្រប់គ្រងក្រុមហ៊ុន BKA Entertainmentដែលដឹកនាំសកម្មភាពខាងលើ បានបញ្ជាក់ថា ធ្វើបែបនេះ ដើម្បីបណ្ដុះក្ដីស្រឡាញ់ក្នុងចិត្តរបស់កុមារកម្ពុជាក្រោមប្រធានបទ 3L(3L Charity(Love.Live.Laugh)"។

"គោលដៅរបស់យើង គឺចែករំលែកក្ដីស្រឡាញ់ ការរស់នៅប្រកបដោយផាសុកភាព ជាមួយនឹងស្នាមញញឹម រីករាយ និងក្ដីសង្ឃឹម"។ ប្អូនៗកុមារខ្ទង់១០០នាក់ក្នុងចំណោម ៦៨០នាក់ បានទទួលបានភាពសប្បាយរីករាយជាមួយការកម្សាន្ត ផ្ដល់ពី Miss Grand Cambodia និងកុមារទាំង៨រូបរបស់កម្មវិធីខាងលើ។

អ្នកស្រី នួន ភិមាន នាយិកាអង្គការលើកស្ទួយប្រជាពលរដ្ឋ បញ្ជាក់ថា ក្រៅពីទទួលយកការងារ ក៏ជាវគ្គបណ្ដុះបណ្ដាលផ្សេងៗ កុមារត្រូវការការលេងសប្បាយថែមទៀត។ ដូច្នេះហើយសម្រាប់សកម្មភាពនាំមកជូននៅព្រឹកនេះ ដោយក្រុមការងារខាងលើ អ្នកស្រីពិតជាមានក្ដីសោមនស្សមែនទែន។

"មើលទៅពួកគេសប្បាយណាស់ ហើយយើងចង់ឲ្យពួកគាត់ដូច្នេះ ពីមុនគាត់ធ្លាប់តែរើសសម្រាម សុំទាន តែឥឡូវបានរៀន មានញុំាបាយគ្រប់គ្រាន់ ហើយបានសប្បាយរីករាយទៀត។ អីចឹងហើយខ្ញុំសូមអរគុណមែនទែន!"។

អង្គការលើកស្ទួយប្រជាពលរដ្ឋ(PIO) មានទាំងអស់៣សាខា គឺសាខាធំស្ទឹងមានជ័យ បុរីកីឡា និងសាខាបុរីសន្តិភាព។ តាមអ្នកស្រីនាយិកា កុមារក្នុងអង្គការរបស់អ្នកស្រីសរុបទាំង៣សាខា មានចំនួន ១៤០០នាក់ ក្នុងនោះកុមារីប្រមាណជាង ៨០នាក់។ ពួកគេទាំងអស់ សុទ្ធជាអតីតកុមាររស់លើគំនរសម្រាម និងសុំទានគេ។

ដោយឡែកកុមាររបស់ Kodomo ទាំង៨រូបវិញ តាមអ្នកគ្រប់គ្រងខាងលើបញ្ជាក់ថា បន្ទាប់ពីសកម្មភាពព្រឹកមិញនេះ ពួកគេនឹងត្រូវប្រជែងគ្នាក្នុងវគ្គផ្ដាច់ព្រ័ត្រទៀត នៅថ្ងៃទី២២ កញ្ញា ខាងមុខនេះ ដើម្បីប្រជែងយកជយលាភី។ កម្មវិធីនឹងមានផ្សាយផ្ទាល់តាមរយៈទូរទស្សន៍ MyTV ផង៕