TNT 135 ផ្លាស់ប្តូរបច្ចេកវិទ្យា ក្រោយពន្យារចេញលក់លើទីផ្សារម្តងហើយម្តងទៀត

2016-10-17 19:44:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Benelli បានពន្យារពេលក្នុងការបញ្ចេញលក់ម៉ូតូ TNT 135 លើទីផ្សារម្តងហើយម្តងទៀត។ យ៉ាងណា ការផ្លាស់ប្តូរបច្ចេកវិទ្យាមួយចំនួនដែលត្រូវបានអភិវឌ្ឍបន្ថែម ជាមូលហេតុសំខាន់ដែលក្រុមហ៊ុនបានលើកឡើង សម្រាប់ការយឺតយ៉ាវនេះ។

លោក ផេង ដារ៉ា អ្នកគ្រប់គ្រងទូទៅរបស់ក្រុមហ៊ុន Nengshun & Ranqun Motor បានឲ្យដឹងថា TNT 135 បានផ្លាស់ប្តូរបច្ចេកវិទ្យាមួយចំនួន បន្ទាប់ពីបានតេស្តបើកបរសាកល្បងជាង ១០ ០០០ គីឡូម៉ែត្រនៅប្រទេសថៃនិងម៉ាឡេស៊ីដោយរកឃើញចំណុចខ្វះខាតដែលត្រូវអភិវឌ្ឍបន្ថែម។

លោកថា TNT 135 បានអភិវឌ្ឍបន្ថែមប្រព័ន្ធស្អំ ដើម្បីជួយកាត់បន្ថយការឡើងកម្ដៅនៃម៉ាស៊ីន ក្នុងពេលបើកបរផ្លូវឆ្ងាយ។ ចង្កៀងមុខដែលបំពាក់ដោយគុជចំនួន ៤ គ្រាប់ ត្រូវបានផលិតឡើងថ្មីចេញពីរោងចក្រផ្ទាល់របស់ក្រុមហ៊ុន Benelli។ ចំណែកសម្បកកង់ក៏មានការផ្លាស់ប្តូរថ្មី រួមទាំងកែបក៏មានការកែសម្រួលថ្មីឡើងវិញ។

TNT 135 បានអភិវឌ្ឍកម្លាំងម៉ាស៊ីនរហូត 135 សេសេ ជាមួយការបំពាក់បច្ចេកវិទ្យា EFI ដែលជួយម៉ាស៊ីនដំណើរស្ងាត់និងមានសន្ទុះខ្លាំង។ ម៉ូតូដែលផលិតផ្តោតលើទីផ្សារយុវវ័យនេះប្រើប្រាស់ប្រអប់លេខ ៥ វគ្គ មានបំពង់ស៊ីមាំងភ្លោះពីរ។ កម្រិតនៃការស៊ីសាំង ១ លីត្រអាចបើកបរបានចម្ងាយផ្លូវប្រហែល ៤០ ទៅ ៥០ គីឡូម៉ែត្រ។

អ្នកគ្រប់គ្រងជាន់ខ្ពស់រូបនេះ ទទួលស្គាល់ភាពយឺតយ៉ាវការចេញលក់ TNT 135 ម្តងហើយម្តងទៀតដែលធ្វើឲ្យប៉ះពាល់ទឹកចិត្តអ្នកគាំទ្រមួយចំនួន។ ប៉ុន្តែការព្យាយាមកែប្រែចំណុចខ្វះខាត ដើម្បីនាំស្តង់ដាផលិតផលម៉ូតូដែលអាចបំពេញតម្រូវការប្រើប្រាស់ និងផ្តល់ការពេញចិត្តដល់អតិថិជន។