យុវជនក្មេងៗ ប្រជែងគ្នាបង្កើតកម្មវិធីដាក់លើ Play Store រហូតទទួលបានជយលាភី
- 2016-10-31 17:44:19
- ចំនួនមតិ 0 | ចំនួនចែករំលែក 0
យុវជនក្មេងៗ ប្រជែងគ្នាបង្កើតកម្មវិធីដាក់លើ Play Store រហូតទទួលបានជយលាភី
ចន្លោះមិនឃើញ
យុវវ័យខ្មែរជាច្រើនក្រុម បានចូលរួមប្រកួតប្រជែងគ្នាបង្កើតកម្មវិធីដាក់លើ Play Store យ៉ាងស្វិតស្វាញក្នុងព្រឹត្តិការណ៍បច្ចេកវិទ្យាប្រចាំឆ្នាំរបស់ក្រុមហ៊ុន Google ឆ្នាំ ២០១៦ (GDG DevFest Phnom Penh 2016) រហូតទទួលបានជយលាភីប្រចាំក្រុមរៀងខ្លួន។
នៅក្នុងព្រឹត្តិការណ៍នោះ មានកម្មវិធីមួយមានឈ្មោះថា Hack+Marathon ឬដែលហៅកាត់ថា Hackathon (ហែកថុន) តម្រូវឲ្យអ្នកចូលរួមប្រជែងសមត្ថភាពគ្នាលើការបង្កើត App លើទូរសព្ទដៃដែលដំណើរការលើប្រព័ន្ធប្រតិបត្តិការ Android ក្រោមប្រធានបទ "ការផ្លាស់ប្តូរផ្នត់គំនិតទៅលើដៃគូស្វាមី ឬដៃគូស្និទ្ធស្នាល"
ក្រុមដែលទទួលបានចំណាត់ថ្នាក់ មានតែបីក្រុមប៉ុណ្ណោះ ក្នុងចំណោមក្រុមចូលរួមរហូតដល់ ៧ ក្រុម ក្នុងនោះមានក្រុម DevFWo(Development for Women) បានបង្កើតកម្មវិធីឈ្មោះថា Saffy ជាដែលក្រុមដែលទទួលបានចំណាត់ថ្នាក់លេខ ១ នៅក្នុងការប្រកួត។ ក្រុម Mr.Robot បានបង្កើតកម្មវិធីឈ្មោះថា Woman Assistant ចំណាត់ថ្នាក់លេខ ២ និងក្រុម CDev Group បានបង្កើតកម្មវិធីឈ្មោះថា Change ទទួលបានចំណាត់ថ្នាក់លេខ ៣ ។
ចំពោះប្រាក់រង្វាន់ក្នុងការប្រកួតប្រជែង ក្រុមចំណាត់ថ្នាក់លេខ១ ទទួលបានទឹកប្រាក់ ១២ ០០០០០រៀល ក្រុមចំណាត់ថ្នាក់លេខ ២ ទទួលបានទឹកប្រាក់ ៨ ០០០០០រៀល និងក្រុមចំណាត់ថ្នាក់លេខ ៣ ទទួលបានទឹកប្រាក់ ៤ ០០០០០រៀល។ សម្រាប់ព័ត៌មានបន្ថែមពី App ដែលបានឈ្នះ Sabay នឹងផ្សាយជូននៅពេលក្រោយ។
ព្រឹត្តិការណ៍នេះត្រូវបានផ្ដោតចម្បងលើបច្ចេកវិទ្យានានារបស់ Google មានដូចជា Android, App Engine, Google Maps, Drive ជាដើមនៅក្នុងមជ្ឃមណ្ឌលសហប្រតិបត្តិការកម្ពុជា-កូរ៉េ(CKCC) ដែលកម្មវិធីនេះបង្កើតឡើងតាំងពីឆ្នាំ២០០៨ នៅសហរដ្ឋអាមេរិក ក្នុងគោលបំណងជួបជុំជាមួយនឹងអ្នកអភិវឌ្ឍក្នុងតំបន់ (Local Developer) និងអ្នកចូលចិត្តបច្ចេកវិទ្យាមកសិក្សា បង្រៀន បង្កើតទំនាក់ទំនងជាមួយគ្នាទៅវិញទៅមក និងធ្វើឡើងនៅតាមប្រទេសជាង ១០០ នៅទូទាំងពិភពលោក ដោយមានកិច្ចសហការឧបត្ថម្ភពីក្រុមហ៊ុនបច្ចេកវិទ្យាយក្ស Google ៕
អត្ថបទ៖ រក្សា
រូបភាពផ្តល់ឲ្យ៖ ckcc