Benelli ជំរុញទីផ្សារម៉ូតូ មិនផ្ដោតលើការផ្សព្វផ្សាយពាណិជ្ជកម្ម

2016-11-15 08:34:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Benelli ដែលជាយីហោម៉ូតូដ៏ល្បីមួយរបស់អ៊ីតាលី មើលឃើញពីការប្រើប្រាស់បណ្តាញទំនាក់ទំនងជាមួយអ្នកគាំទ្រ សំខាន់ជាជាងការផ្សព្វផ្សាយពាណិជ្ជកម្ម ដើម្បីជំរុញទីផ្សារលក់ម៉ូតូរបស់ខ្លួនក្នុងប្រទេសកម្ពុជា។

លោក Dante Ricardo Bustos នាយកផ្នែកទីផ្សារក្រុមហ៊ុន Benelli ប្រចាំតំបន់អាស៊ី អាហ្វ្រិកនិងអាមេរិកលើកឡើងក្នុងឱកាសសម្ពោធហាងថ្មីនៅខេត្តសៀមរាបថា Benelli មិនប្រើប្រាស់ការផ្សាយពាណិជ្ជកម្មដើម្បីជំរុញទីផ្សារម៉ូតូ Benelli ទោះបីក្នុងស្ថានភាពដែលមានការប្រកួតប្រជែងម៉ាកយីហោម៉ូតូក្រុមហ៊ុនដទៃទៀតដែលបានឈរជើងជាច្រើនឆ្នាំ។

លោកថា៖ "ខុសពីក្រុមហ៊ុនប្រកួតប្រជែងមួយចំនួនទៀត យើងចង់អតិថិជនបានស្វែងយល់ពីផលិតផលម៉ូតូរបស់យើងដោយផ្ទាល់ ជាជាងការឃោសនាផ្សព្វផ្សាយដែលពលរដ្ឋភាគច្រើនយល់ថាតែងតែមានការបំផ្លើសហួសការពិត"។

ម៉ូតូ Benelli មានប្រវត្តិជាង ១០០ ឆ្នាំ ហើយពលរដ្ឋទូទាំងពិភពលោកស្គាល់ពីយីហោម៉ូតូនេះ។

លោកថា Benelli ទើបហក់ចូលទីផ្សារកម្ពុជាបានជាង ៣ ឆ្នាំ។ ពលរដ្ឋមិនទាន់ស្គាល់ច្រើន ប៉ុន្តែការបង្កើតទំនាក់ទំនងជាមួយអ្នកគាំទ្រ នឹងនាំឲ្យអតិិថជនចាប់ផ្តើមស្គាល់ផលិតផលម៉ូតូ Benelli បន្តិចម្តងៗ ទោះបីវាអាចត្រូវចំណាយពេលយូរបន្តិចក៏ដោយ។

លោកក៏លើកពីជោគជ័យនៃម៉ូតូ TNT 135 ជាម៉ូតូ Mini-Bike ដំបូងដែលក្រុមហ៊ុនបានអភិវឌ្ឍជាមួយការរចនារូបរាងថ្មីប្លែក បច្ចេកវិទ្យាទំនើបដែលផ្តោតលើទីផ្សារក្នុងតំបន់អាស៊ី។

លោកថា TNT 135 មានការគាំទ្រច្រើនទាំងពលរដ្ឋកម្ពុជានិងទីផ្សារប្រទេសក្នុងតំបន់ ដោយសារការរចនារូបរាងរបស់វាប្លែកខុសពីគេនិងបច្ចេកវិទ្យាទំនើបជាងគូប្រកួតប្រជែង ហើយតម្លៃអាចនិយាយបានថាទាបជាងគូប្រកួតប្រជែង ទោះបីវាមានសមត្ថភាពខ្លាំងជាងក៏ដោយ។

លោកលីន ឆាវណេង អគ្គនាយកក្រុមហ៊ុន Nengshun &Ranqun ប្រាប់ថា តាមរយៈការរៀបចំឲ្យមានកម្មវិធិជួបជុំរវាងអ្នកគាំទ្រ គោលដៅដើម្បីឲ្យអតិថិជនបានជួប សាកសួរ និងបញ្ចេញយោបល់ផ្សេងៗពីម៉ូតូ Benelli និងគូប្រកួតប្រជែង ធ្វើយ៉ាងណាឲ្យពួកគេចាប់ផ្តើមស្គាល់ពីម៉ូតូជាប្រេនរបស់អ៊ីតាលី។ ជាមួយគ្នានេះ ក្រុមហ៊ុនក៏យកចិត្តទុកដាក់ក្នុងការផ្តល់សេវាកម្មដល់ប្រសើរដល់អតិិថជនក្រៅពីការស្វែងរកចំណេញ ដើម្បីជំរុញយីហោម៉ូតូថ្មី Benelli ទទួលបានការគាំទ្រពីអតិិថជនថ្មីៗបន្ថែមទៀត។

លោកអះអាងថា នៅពេលអតិថិជនចាប់ផ្តើមស្គាល់ ពួកគេនឹងផ្សព្វផ្សាយពីមាត់មួយទៅមាត់ និងមិនយូរមិនឆាប់ យីហោម៉ូតូថ្មីនេះនឹងចាប់ផ្តើមជ្រាបលើទីផ្សារ។

បន្ទាប់ពីបានបើកនាំចូលជាផ្លូវការក្នុងប្រទេសកម្ពុជាក្នុងឆ្នាំ ២០១៣ ក្រុមហ៊ុន Benelli Keeway បានឈានទៅពង្រីកសាខាលក់ម៉ូតូរបស់ខ្លួននៅខេត្តសៀមរាប ដែលក្រុមហ៊ុនរំពឹងថានឹងជួយពង្រីកយីហោនេះនៅខេត្តដែលមានសក្តានុពលលើវិស័យទេសចរណ៍នោះ។

ចុចអាន៖ TNT 135 ម៉ូដែលថ្មីមួយទៀតចេញមុខប្រជែង MSX

អត្ថបទ៖ ប៊ុណ្ណារ៉ា