វត្តប្រាសាទ ល្បីខាងចារយ័ន្តលើលុយ និងបន់ស្រន់អ្វីៗច្រើនបានផល

2016-12-05 10:07:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ទើររៀងរាល់ថ្ងៃសីល និងថ្ងៃបុណ្យទានធំៗ គឺពុទ្ធបរិស័ទជាច្រើនបានទៅបន់ស្រន់ និងធ្វើពិធីស្រោចទឹក ចារយ័ន្តលើលុយ និងបន់ស្រន់ព្រះអង្គធំដើម្បីសុំសេចក្ដីសុខ រកស៊ីមានបាន ហើយខ្លះបន់សុំកូន ក៏សម្រេចបានដូចបំណងជាច្រើន ម៉្លោះហើយទើបមានអ្នកមកលាបំណន់ ដោយជាវរូបសំណាកពុទ្ធបដិមាជាហូរហែមកតម្កល់ទុកនៅវត្តប្រាសាទ។ វត្តប្រាសាទស្ថិតនៅក្នុងសង្កាត់ពញាពន់ គឺជាឃុំមួយក្នុងចំណោមឃុំដែលទើបកាត់ចេញពីស្រុកពញាឮ ក្នុងខណ្ឌសែនសុខ កាលពីពេលថ្មីៗនេះ។

*ពុទ្ធបរិស័ទជាច្រើនបានទៅវត្តប្រាសាទដើម្បីឲ្យព្រះចៅអិធការប្រោសព្រហ្ម និងចារយ័ន្តលើលុយ*

ព្រះចៅអធិការវត្ត ព្រះតេជគុណ សោម ស៊ីម មានសង្ឃដីកាថា តាមពិតទៅជំនឿលើពិធីស្រោចទឹក ចារលុយលើយ័ន្ត ពុំមាននៅក្នុងសាសនាព្រះពុទ្ធនោះទេ ប៉ុន្តែជាតំណតតាំងពីដូនតាមក ខ្មែរកាន់សាសនាពីរ គឺព្រះពុទ្ធផង និង ព្រហ្មញ្ញសាសនាផង ទើបកើតមានទម្លាប់ស្រោចទឹកលើករាសី ឬបន់ស្រន់រកស៊ីមានបាននៅក្នុងទីវត្តអារាមដែលកាន់សាសនាព្រះពុទ្ធ។

*ព្រះចៅអធិការវត្ត ព្រះតេជគុណ សោម ស៊ីម*

ព្រះតេជគុណ មានសង្ឃដីកាទៀតថា "អាត្មាក៏មិនដឹងដែរថាគេបន់អី ហើយគេជោគជ័យដូចម្ដេច តែគេចេះតែមកឲ្យអាត្មាស្រោចទឹក និងចារជាយ័ន្តលើលុយ ហើយខ្លះបន់ស្រន់នឹងព្រះធំ ក៏រកស៊ីមានបានទៅ ដូច្នេះហើយពុទ្ធបរិស័ទដែលសម្រេចបានតាមការប្រាថ្នា ក៏បានមកលាបំណន់ដូចជាជាវរូបសំណាកពុទ្ធបដិមា ខ្លះមានឈឺប្រណិតជារូបផ្សេងៗ មកតម្កល់ទុកនៅក្នុងវត្តនេះទើបធ្វើឲ្យវត្តនេះសម្បូរគ្រឿងជាទីសក្ការ"។

ជាក់ស្ដែងពេលចូលផុតក្លោងទ្វារវត្ត គេឃើញមានរូបចម្លាក់តូច ធំ ច្រើនម៉ូដ ច្រើនបែប សាងឡើងអំពីថ្មភក់ ឃើញមានដាក់តាំងស្អេកស្កះ ពេញប៉ែកខាងត្បូង និងខាងមុខព្រះវិហារ ដែលរូបចម្លាក់ទាំងអស់នេះ សុទ្ធសឹងតែជារបស់ពុទ្ធបរិស័ទដែលបួងសួងប្រាថ្នាបានសម្រេចដូចបំណងរួចហើយជាវយកមកតម្កល់នៅក្នុងទីអារាមនេះ។

សូមទស្សនាវីដេអូខាងក្រោមនេះ

ដោយសារតែការជឿលើអប្បិយជំនឿហើយបន់ស្រន់ច្រើនបានសម្រេច ដូច្នេះហើយវត្តប្រាសាទមួយនេះ អាចស្រូបបានអ្នកមកបន់ស្រន់ ស្រោចទឹក ចារយ័ន្តលើលុយ យ៉ាងតិចណាស់ក៏មាន ១០០ នាក់ក្នុង១ថ្ងៃ រៀងរាល់ថ្ងៃចុងសប្ដាហ៍ និងពិសេសថ្ងៃសីល អាចច្រើនលើសនេះជាពីរដង ទៅបីដងឯណោះ៕