Prahok TV ផ្ដាំទៅអ្នកដឹកនាំរឿងខ្លះថា «កុំគិតថា អ្នកមើលល្ងង់ពេក» និង «កុំគិតពីចំណេញពេក»
- 2017-02-06 08:45:54
- ចំនួនមតិ 0 | ចំនួនចែករំលែក 0
Prahok TV ផ្ដាំទៅអ្នកដឹកនាំរឿងខ្លះថា «កុំគិតថា អ្នកមើលល្ងង់ពេក» និង «កុំគិតពីចំណេញពេក»
ចន្លោះមិនឃើញ
"កុំគិតថា អ្នកមើលល្ងង់ពេកឲ្យសោះ"។ នេះជាសម្ដីរបស់អ្នកគ្រប់គ្រង Prahok TV ផ្ដាំដល់ផលិតករភាពយន្តកម្ពុជាមួយចំនួន នៅក្នុងកិច្ចសម្ភាសជាមួយ Sabay អំពីវិស័យភាពយន្តខ្មែរ និងរឿងភាគថ្មីដែល Prahok TV ត្រៀមចេញនៅថ្ងៃ ១៤ កុម្ភៈ ចំថ្ងៃ Valentine's Day តែម្ដង។
លោក Kenny អ្នកគ្រប់គ្រងទូទៅ Prahok TV បន្តថា ផលិតករខ្មែរមួយចំនួនតែងមានលេសមិនចេះអស់ ពេលផលិតកុនមិនសូវល្អ និងមិនសូវមានគុណភាព ដោយខ្លះថា មកពីពេលខ្លី លុយតិច បញ្ហាបច្ចេកទេស បើទោះជាក់ស្ដែងផលិតកម្មមួយចំនួនបានប្រើសម្ភារៈថតកប់ស៊េរីក៏ដោយ។ ការពិត "មកពីពួកគេគិតរឿងចំណេញពេក"។
យ៉ាងណាក៏ដោយ អ្នកគ្រប់គ្រង និងជាផលិតកររូបនេះ បានអះអាងថា ផលិតករខ្មែរទាំងនោះមួយចំនួន មានសមត្ថភាពអាចផលិតភាពយន្តកាន់តែល្អប្រសើរទៅទៀត បើពួកគេមានឆន្ទៈ និងដាក់ចិត្តដាក់កាយ ហើយមិនយកពាក្យ "ចំណេញខ្លាំង" ដាក់នៅពីមុខ។ ហើយផលិតករខ្មែរមួយចំនួនទៀតក៏កំពុងខំផលិតរឿងដែលមានគុណភាពកាន់តែល្អប្រសើរដែរ។
ជាក់ស្ដែង Prahok TV នឹងចេញផ្សាយរឿងភាគថ្មី «កាហ្វេឡាតេ» ដើម្បីដាស់ផលិតករផ្សេងៗដែលគិតតែពីចំណេញឲ្យភ្ញាក់ខ្លួន និងឲ្យដឹងថា មានអ្នកផ្សេងទៀត អាចផលិតកុនបានល្អជាង ដែលមិនសូវគិតពីចំណេញខ្លាំង។ ផលិតកររូបនេះ បន្ត។
«កាហ្វេឡាតេ» ជាភាពយន្តថ្មីបែប Web-drama ដែលផលិតដោយ Prahok TV ជាមួយនឹងផ្នត់គំនិតថ្មីបែបយុវវ័យ ហើយគុណភាពខ្ពស់។ រឿងនេះគ្រោងនឹងត្រូវគេចេញផ្សាយនៅថ្ងៃទី១៤ កុម្ភៈ នៅលើផេកហ្វេសប៊ុក និង YouTube Channel របស់ Prahok TV៕