រឿងភាគរ៉ូមែនទិកថ្មីបែប Web-drama «កាហ្វេឡាតេ» ចេញផ្សាយផ្លូវការ ថ្ងៃមិញនេះ
- 2017-02-15 08:41:34
- ចំនួនមតិ 0 | ចំនួនចែករំលែក 0
រឿងភាគរ៉ូមែនទិកថ្មីបែប Web-drama «កាហ្វេឡាតេ» ចេញផ្សាយផ្លូវការ ថ្ងៃមិញនេះ
ចន្លោះមិនឃើញ
«កាហ្វេឡាតេ» ភាពយន្តភាគជាស៊េរីបែប Web-drama ថ្មី ទើបចេញផ្សាយភាគ១ ផ្លូវការក្ដៅៗនៅថ្ងៃមិញនេះតែម្ដង នៅលើផេកហ្វេសប៊ុក Prahok TV បន្ទាប់ពីសម្ពោធជាសាធារណៈកាលពីម្សិលមិញ ក្នុងកម្មវិធី Big Love Pop-Up Cinema នៅកោះពេជ្រ។
ក្នុងវគ្គ១ ដែលមានចំណងជើងថា «សម្រស់ និង ខួរក្បាល» អ្នកទស្សនានឹងដឹងពីដើមកំណើតរបស់កាហ្វេ ព្រមទាំងស្គាល់តួអង្គជាច្រើនក្នុងសាច់រឿងនេះ។ ក្នុងនោះ អ្នកនឹងដឹងពីរឿងរ៉ាវរបស់តួឯកស្រីឈ្មោះ នី ណា ដែលជាមនុស្សស្រលាញ់សម្រស់ជាងអ្វីៗទាំងអស់។
ចង់សាច់រឿងយ៉ាងម៉េច សូមមើលវីដេអូខាងក្រោម៖
ភាគ២ នឹងត្រូវចេញផ្សាយនៅថ្ងៃព្រហស្បតិ៍ ស្អែកនេះ លើផេក Prahok TV ខណៈ Prahok TV នឹងត្រូវចេញផ្សាយ ១ សប្ដាហ៍ ២ ភាគ រាល់ថ្ងៃពុធ និងព្រហស្បតិ៍។
«កាហ្វេឡាតេ» សរុបមាន ៣០ ភាគ ចែកជាវគ្គផ្សេងៗគ្នា ដោយមានលោក ប៊ើរី ដើរតួឯកឈ្មោះ ហ្វីល។ ហ្វីល ជាទេវតាអផ្សុកខ្លាំង រួចក៏សម្រេចចិត្តមកលេងឋានមនុស្ស។ របស់ទី១ ដែលហ្វីលសាកនៅឋានមនុស្ស គឺកាហ្វេឡាតេ ហើយក៏ចូលចិត្តខ្លាំង។ ហ្វីលក៏សម្រេចនៅឋានមនុស្ស រួចបើកហាងកាហ្វេ គ្រាន់តែសម្រាប់កម្សាន្តប៉ុណ្ណោះ។ មនុស្សជាច្រើនទៅហាងកាហ្វេ ដើម្បីជួបជុំគ្នាជាមួយមិត្តភ័ក្ដិ ជជែកពីនេះពីនោះ ចែករំលែកភាពរីករាយ ប៉ុន្តែក៏មានអ្នកដែលចែករំលែកក្តីទុក្ខព្រួយដែរ។ ហ្វីលចាប់អារម្មណ៍ថាមនុស្សមួយចំនួនតែងប្រាថ្នាចង់បានអ្វីមួយខ្លាំងហួសហេតុ ទោះបីជារឿងនោះជារឿងមិនត្រឹមត្រូវ ឬខុសសីលធម៌ក៏ដោយ ក៏ពួកគេនៅតែចង់ធ្វើមិនខ្វល់ថាប៉ះពាល់ដល់អ្នកណាខ្លះ ឬក៏ពួកគេត្រូវលះបង់អ្វីមួយនោះទេ។
ហ្វីលសម្រេចចិត្តផ្ដល់បទពិសោធន៍ដល់ពួកគេដោយជួយសម្រេចក្ដីប្រាថ្នានោះ ប៉ុន្តែផ្ទុយទៅវិញពួកគេបែរជាចង់បានថែម។ ហ្វីល យល់ថា មនុស្សម្នាក់ពេលចង់បានអ្វីមួយខ្លាំងហួសហេតុពេក ប្រៀបដូចជាឃុំខ្លួនឯងក្នុងគុកដែលមានតែបង្អួចតូចមួយមើលមិនឃើញរឿងផ្សេង។ ជួនកាល គេចង់បានរបស់អ្វីមួយ ហើយគិតថាវាសំខាន់ តែពេលទទួលបានរបស់នោះទើបដឹងថាវាមិនសំខាន់នោះទេ ប៉ុន្តែជួនកាលវាអាចនឹងហួសពេលត្រឡប់ក្រោយ។ ហ្វីល ចាប់ផ្ដើមជួយពីមនុស្សម្នាក់ទៅមនុស្សម្នាក់ដោយប្រើវិធីខុសៗគ្នា៕