យុទ្ធសាស្ត្របញ្ជ្រាបការអានដល់យុវវ័យកម្ពុជាពី លោក សុខ ឡាក់

2017-03-13 03:30:07
ចំនួនមតិ 0 | ចំនួនចែករំលែក 0

ចន្លោះមិនឃើញ

សព្វថ្ងៃនេះ គេសង្កេតឃើញថាការអានសៀវភៅនៅក្នុងស្រទាប់យុវវ័យកម្ពុជា ហាក់មានកម្រិតទាបនៅឡើយ។ ដូចនេះដើម្បីលើកកម្ពស់ដល់ការអានអោយមានភាពល្អប្រសើរ លោក សុខ ឡាក់ដែលជាសហស្ថាបនិកនៃបណ្ណាល័យបញ្ញវន្តបានណែនាំពីយុទ្ធសាស្ត្រមួយចំនួនសម្រាប់បញ្ជ្រាបការអានដល់យុវវ័យកម្ពុជាដូចខាងក្រោម៖

១ យុទ្ធនាការផ្សព្វផ្សាយ

ជាការពិតណាស់ យុវវ័យភាគច្រើនដែលពុំចាប់អារម្មណ៍នឹងការអាន ក៏ព្រោះតែពួកគេមិនបានយល់ដឹងពីសារប្រយោជន៍ដ៏ធំធេងនៃសៀវភៅ។ ដូចនេះ ការផ្សព្វផ្សាយអោយបានទូលំទូលាយពីសារសំខាន់នៃការអានសៀវភៅគឺជាអ្វីដែលត្រូវធ្វើមុនគេ។ គេអាចមានជាបទបង្ហាញនៅក្នុងសិក្ខាសាលា ការប្រារព្ធទិវាជាតិអំណាន និង មានជាពិព័រណ៍សៀវភៅថ្នាក់ជាតិជាដើម។ មិនតែប៉ុណ្ណោះ គេត្រូវពន្យល់ទៅកាន់យុវវ័យថា បុគ្គលជោគជ័យភាគច្រើន គឺជាមនុស្សដែលចូលចិត្តអានសៀវភៅ ហើយប្រទេសដែលរីកចម្រើនខ្លាំងក៏ដោយសារតែ ប្រជាជនគេពូកែអានសៀវភៅផងដែរ។

២ បង្កើតជាក្រុមអាន

ជាធម្មតាពេលអានសៀវភៅម្នាក់ឯងគឺតែងមានអារម្មណ៍ឯកោ។ ដូចនេះដើម្បីអោយការអានសៀវភៅមានអារម្មណ៍ស្រស់ស្រាយ គេអាចបង្កើតជាការអានសៀវភៅជាក្រុមឡើង។ លើសពីនេះទៀត ការអានជាក្រុមក៏អាចជួយអោយពួកគេទទួលបានការរាប់អានគ្នា និង បង្កើនចំណងមិត្តភាពទៀតផង។

៣ បង្កើតជាកម្មវិធីប្រកួតសង្ខេបសៀវភៅ

លោកសុខ ឡាក់បានលើកឡើងថា តាមការសង្កេតរបស់លោកគឺយុវវ័យខ្មែរបច្ចុប្បន្នមានទំនោរក្នុងការមើលភាពយន្ត។ ដូចនេះប្រសិនបើបង្កើតអោយមានកម្មវិធីប្រកួតសង្ខេបសៀវភៅមួយ ដោយមានផ្ដល់នូវរង្វាន់លើកទឹកចិត្តដូចជាសំបុត្រកុនជាដើម នោះពួកគេនឹងចាប់អារម្មណ៍ក្នុងការចូលរួម។ ទីមួយគឺទទួលបានការចេះដឹង ហើយទី២គឺទទួលបានអារម្មណ៍សប្បាយរីករាយចំពោះលទ្ធផលនៃការអាន។

៤ ជួយណែនាំសៀវភៅអោយគ្នា

ការបញ្ជ្រាបនៃការអានគឺត្រូវធ្វើតាំងពីក្មេងមកម្ល៉េះ ដោយឪពុកម្ដាយគ្រប់រូបគួរតែទម្លាប់អោយកូនៗអានសៀវភៅអោយបានច្រើន និង ចាប់ផ្ដើមស្រលាញ់សៀវភៅតាំងពីតូចមក។ ចំណែកឯមិត្តភក្តិ ក៏អាចណែនាំសៀវភៅល្អៗដែលខ្លួនបានអាន ទៅកាន់មិត្តភក្តិដទៃទៀតរបស់ខ្លួនផងដែរ។

អត្ថបទ៖ ចន្ថា