ដោយសារពុកមាត់ធ្វើឲ្យ លាង ឧត្ដម មានទីផ្សារដល់ថ្នាក់ហ្នឹង

2017-04-03 08:47:09
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងកំពុងតែឡើងកូដខាងតួឪពុក លោក លាង ឧត្ដម បានថ្លែងឲ្យដឹង កត្តាដែលនាំឲ្យខ្លួនមានទីផ្សារច្រើនស្ទើរមិនមានពេលសម្រាក ក៏ដោយសារតែពុកមាត់ អ្នកដឹកនាំភាគច្រើនពេញចិត្ត ជ្រើសឲ្យសម្ដែងតួឪពុក។

លោក លាង ឧត្ដម បានចូលសិល្បៈជាង១២ឆ្នាំមកហើយ ដោយអាជីពសិល្បៈដំបូងរបស់លោក គឺជាតារាចម្រៀង។ ជាង១ឆ្នាំចុងក្រោយនេះ លោកបានហក់មកចូលជាតារាសម្ដែង បន្ទាប់ពីប្រលូកលើវិធីនេះភ្លាម ទីផ្សារតារារូបនេះ ចាប់ផ្ដើមឡើងតែខ្លាំងឡើងៗតែម្ដង។ តាមការបញ្ជាក់ពី សាមីខ្លួន តារាវ័យ៣៨ឆ្នាំរូបនេះ ធ្លាប់បានសម្ដែងភាពយន្តមិនតិចជាង២០ទៅ៣០ រឿងឡើយ។

លោក លាង ឧត្ដម បានលើកយកតែភាពយន្តល្បីៗធ្លាប់សម្ដែង ក្នុងនោះមានដូច រឿង"លាក់ស្នេហ៍ក្នុងបេះដូង” "សម្បត្តិបុរស” "ផ្ការីកក្នុងចិត្ត” "បំណុលស្នេហ៍” "វរសេនីយ៍កំពូលស្នេហ៍” "ហង្សបាក់ស្លាប” ជាដើម។ លោកថា ភាពយន្តបានរៀបរាប់ខាងលើ គឺខ្លួនសម្ដែងតែ ឪពុកស្ទើរតែទាំងអស់ ព្រោះការសម្ដែងឪពុកនេះ អ្នកដឹកនាំភាគច្រើនពេញចិត្តលោកតែម្ដង។

ឧត្ដមបានរំលឹក ពីមូលហេតុដំបូងដែលនាំឲ្យលោកបានសម្ដែងជាតួឪពុក។ លោកថា កាលណោះ មានអ្នកដឹកនាំសម្ដែងម្នាក់ បានហៅខ្លួនទៅធ្វើតេស្ត ដោយឲ្យលោកពាក់ពុកមាត់ សម្ដែងឲ្យមើល។ ដោយមានទេពកោសល្យសិល្បៈខ្លះៗផងនោះ ដូចនេះការសម្ដែង មិនជារឿងពិបាកសម្រាប់លោកឡើយ ឧត្ដម ធ្វើបានយ៉ាងល្អ ក្រោយមកក៏មានឱកាសបានសម្ដែងតួឪពុកជាបន្តបន្ទាប់ ដោយប្រើពុកមាត់រហូត។

លោក លាង ឧត្ដម បានឲ្យដឹងបន្ថែមថា បច្ចុប្បន្នមានផលិតកម្មច្រើនណាស់បានទាក់ទងខ្លួនឲ្យថតរឿងជាបន្តបន្ទាប់ ប៉ុន្តែខ្លួនមិនទាន់ទទួល ព្រោះរាល់នៅជាប់កុងត្រាថតរឿងឲ្យផលិតកម្ម ២ទៅ៣ រឿងក្នុងដៃមិនទាន់ចប់។ ការចង់បានលោកទៅសម្ដែង ពីបណ្ដាផលិតកម្មទាំងនោះ ឧត្ដមថា មិនខុសពីផលិតកម្មមុនៗឡើយ គឺចង់ឲ្យលោកសម្ដែងតែតួឪពុកប៉ុណ្ណោះ។

ដោយសារតែ ទីផ្សារសម្ដែងកាន់តែមមាញឹកបែបនេះ ធ្វើឲ្យលោក មិនសូវជាទទួលការងារច្រៀងឡើយ។ ប៉ុន្តែបែបក្ដី ឧត្ដម ប្រាប់ថា មិនបោះបង់ចោលអាជីពជាតារាចម្រៀងឡើយ ជារឿយៗលោកនៅតែឆ្លៀតទៅច្រៀងការងារគេម្ដងម្កាលដែរ ចៀសវាងដាច់ម៉ូយ៕

អត្ថបទ៖ ស៊ុនហួត