ស្ងាត់ៗ បារ៉ាក់ អូបាម៉ា ទិញផ្ទះថ្មីមួយខ្នង តម្លៃរាប់លានដុល្លារ

2017-06-01 08:34:18
ចំនួនមតិ 0 | ចំនួនចែករំលែក 0

ចន្លោះមិនឃើញ

អតីតប្រធានាធិបតីអាមេរិក បារ៉ាក់ អូបាម៉ា និង អតីតជំទាវទី១ លោកស្រី Michelle បានទិញផ្ទះថ្មីមួយខ្នង នៅក្នុងរដ្ឋធានី Washington សហរដ្ឋអាមេរិក ដែលអ្នកទាំង ២ ធ្លាប់បានជួលនាពេលកន្លងមក ក្នុងតម្លៃរហូតដល់ទៅ ៨,១ លានដុល្លារ កាលពីថ្ងៃពុធ ម្សិលមិញនេះ។

ផ្ទះថ្មីរបស់លោក អូបាម៉ា នៅក្នុងរដ្ឋធានី Washington

អ្នកនាំពាក្យរបស់លោក អូបាម៉ា គឺ លោក Kevin Lewis បានបញ្ជាក់បន្ថែមលើការទិញផ្ទះនេះថា «លោក និងលោកស្រី អូបាម៉ា នឹងស្នាក់នៅក្នុងរដ្ឋធានី Washington យ៉ាងហោចណាស់ ២ ឆ្នាំកន្លះទៀត ដូច្នេះវាត្រឹមត្រូវណាស់សម្រាប់អ្នកទាំង ២ ក្នុងការទិញយកផ្ទះនោះ ជាជាងបន្តការជួលរយៈពេលយូរទៀត»។

បើតាមប្រភពជិតស្និទ្ធមួយ បានប្រាប់ឲ្យដឹងថា លោក អូបាម៉ា នឹងបន្តកាន់កាប់ផ្ទះរបស់លោក នៅក្នុងទីក្រុង Chicago ដដែល បើទោះបីជាទិញផ្ទះថ្មីនេះក៏ដោយ។

ផ្ទះចាស់របស់លោក អូបាម៉ា នៅក្នុងទីក្រុង Chicago

គួរបញ្ជាក់ថា លោក អូបាម៉ា បានសម្រេចចិត្តស្នាក់នៅក្នុង រដ្ឋធានី Washington បន្ទាប់ពីចាកចេញពីសេតវិមាន កាលពីថ្ងៃទី២០ ខែមករា កន្លងទៅនេះ រហូតដល់កូនស្រីពៅ អាយុ ១៥ ឆ្នាំ ឈ្មោះ Sasha រៀនចប់ថ្នាក់វិទ្យាល័យ។

គួរឲ្យដឹងផងដែរថា ផ្ទះទំហំ ៧៦០ ម៉ែត្រការ៉េនោះ លោក អូបាម៉ា បានទិញពីអតីតលេខាធិការនៃសេតវិមាន លោក Joe Lockhart និងភរិយា គឺលោកស្រី Giovanna Gray Lockhart៕