«ស្រលាញ់កូនមិនឲ្យដឹងចិត្ត» Dj Nana ថាឪពុកស្រុកយើងភាគច្រើនគឺអីចឹង

2017-06-12 03:39:03
ចំនួនមតិ 0 | ចំនួនចែករំលែក 0

ចន្លោះមិនឃើញ

«ក្នុងសង្គមខ្មែរភាគច្រើនឪពុកមិនសូវស្និទ្ធស្នាលជាមួយកូនទេ ព្រោះលោកច្រើនស្រលាញ់កូនមិនឲ្យដឹងចិត្ត» នេះជាការលើកឡើងរបស់កញ្ញា នាង សុវ៉ាតនា ហៅ Dj Nana ពិធីករពូកែវោហារ ដែលបច្ចុប្បន្នក៏ជាផលិតករកម្មវិធីវីដេអូតាមហ្វេសប៊ុកដ៏ ពេញនិយមមួយដែលតែងតែនិយាយពីបញ្ហាទំនាកទំនងសង្គម និងគ្រួសារ។

កញ្ញាបន្តថា៖ «ពេលខ្លះទោះជាលោកឪពុកបារម្ភនិង យកចិត្តទុកដាក់ចំពោះកូនយ៉ាងណាក៏ដោយក៏មិនសូវបង្ហាញចេញឲ្យកូនដឹងដែរ។ នេះជាទម្លាប់ទៅហើយឪពុកត្រូវគេចាត់ទុកជាតួកាចក្នុងគ្រួសារ បើមិនដូច្នេះទេខ្លាចប្រដៅកូនទៅមិនស្តាប់» ។

ដោយមិនច្រានចោលថាទម្លាប់បែបនេះខុសទាំងស្រុងនោះទេ តែ ណាណា យល់ថាគួរកែតម្រូវបន្តិចព្រោះទំនាក់ទំនងក្នុងគ្រួសារល្អប្រសើរទៅបានដោយការបើកទូលាយចិត្ត និងនិយាយគ្នាត្រង់ៗ ។ កញ្ញាក៏បានផ្តល់យោបល់ដែរថា ទោះស្ថានភាពគ្រួសារនិមួយៗមិនដូចគ្នា តែមានចំនុចរួមខ្លះដែលឪពុកគួរធ្វើប្រសិនបើលោកពិតជាស្រលាញ់កូន ដូចជា៖

គួរស្តាប់ការយល់ឃើញរបស់កូនទោះនោះជាគំនិតក្មេងខ្ចីក៏ដោយ
គួរបញ្ឈប់ទម្លាប់ស្តីបន្ទោសកូនពេលគេធ្វើខុស
ពេលទំនេរពីការងារ ឪពុកគួរស្ម័គ្រចិត្តធ្វើសកម្មភាពមួយចំនួនជាមួយកូន ដូចជាលេងកីឡា ដើរកម្សាន្តជុំគ្នា ដើរទិញអីវ៉ាន់ ឬកំដរកូនមើលកុន ជាដើម។

កញ្ញាក៏សំណូមពរកូនៗទាំងអស់ឲ្យយល់ពីទឹកចិត្តរបស់ឪពុកដូចគ្នា ដោយការចាប់ផ្តើមផ្លាស់ប្តូរការគិតអវិជ្ជមានចំពោះឪពុក និងបង្កើតភាពស្និតស្នាលជាមួយលោក ដូចជា៖

ត្រូវជឿជាក់ថាឪពុកជាមនុស្សដែលស្រលាញ់ខ្លួនជាទីបំផុត ដូច្នេះរាល់ទង្វើដែលគាត់ធ្វើ ឬនិយាយគឺដើម្បីឲ្យកូនល្អ
កូនគួរជាអ្នកចាប់ផ្តើមសកម្មភាពមុន ដូចជាបបួលលោកដើរកម្សាន្តជុំគ្នា ចាប់ដៃលោកមុន ញញឹម និងនិយាយទៅកាន់លោកមុន
ជូនអំណោយឪពុក រាល់កម្មវិធីពិសេសផ្សេងៗ អាចជាថ្ងៃខួបកំណើតលោក រដូវបុណ្យទានផ្សេងៗ ឬថ្ងៃទិវារំលឹកគុណឪពុក។

អត្ថបទ៖ លីដា