ព្រឹត្តិការណ៍សន្តិសុខនយោបាយពិភពលោកសំខាន់ៗ (វីដេអូ)

2017-06-17 06:39:39
ចំនួនមតិ 0 | ចំនួនចែករំលែក 0

ចន្លោះមិនឃើញ

រុស្ស៊ីនឹងប្រើអាវុធបច្ចេកវិទ្យាថ្មីក្នុងសង្គ្រាមស៊ីរី

រុស្ស៊ីបានចេញផែនការថ្មីមួយទៀត ដើម្បីជួយប្រយុទ្ធក្នុងសង្គ្រាមស៊ីរី គាំទ្ររដ្ឋាភិបាលលោក បាសា អាល់អាសាត ដោយផែនការថ្មីនេះ ជាផែនការសង្គ្រាមរយៈពេលមធ្យម មានទាំងការពង្រឹងសព្វាវុធយោធា និងបង្កើនកម្លាំងទ័ពជាដើម។

លោកប្រធានាធិបតីរុស្ស៊ី វ្ល៉ាទីមៀ ពូទីន អះអាងកាលពីថ្ងៃព្រហស្បតិ៍ថា ខ្លួនបានប្រកាសផែនការថ្មីនេះ ពេលចូលរួមក្នុងកម្មវិធីទូរទស្សន៍មួយ ដែលបើកឱកាសឲ្យពលរដ្ឋ អាចសួរដេញដោលពីគោលនយោបាយការបរទេសរបស់ជាតិ។

លោក ពូទីន ប្រាប់ថា រដ្ឋាភិបាលក្រុងម៉ូស្គូ មានផែនការសង្គ្រាមរយៈពេលមធ្យមក្នុងសង្គ្រាមស៊ីរី ដោយគ្រោងផ្ដល់ជំនួយសព្វាវុធយោធា និងពង្រឹងសមត្ថភាពកងកម្លាំងរដ្ឋាភិបាល របស់លោក អាសាត ចំណែកកងយោធារបស់រុស្ស៊ី ក៏នឹងត្រូវបញ្ជូនបន្ថែម ទៅកាន់មូលដ្ឋានទ័ព ដែលមានស្រាប់ក្នុងទឹកដីស៊ីរី។ លោកថា ក្រោយពីពង្រឹងសមត្ថភាពសង្គ្រាមរបស់កងកម្លាំងរដ្ឋាភិបាលស៊ីរីហើយនោះ កងទ័ពរុស្ស៊ី នឹងបន្តជួយវាយប្រហារតាមតំបន់សំខាន់ៗជាច្រើនទៀត ក្នុងករណីចាំបាច់។

កងកម្លាំងពិសេអាមេរិក ចូលរួមសង្គ្រាមប្រឆាំងពួក ISIS នៅហ្វីលីពីន

កងយោធាអាមេរិក នៅសប្ដាហ៍នេះ បានទៅដល់ទីក្រុង Marawi ភាគខាងត្បូងប្រទេស ហ្វីលីពីន ប៉ុន្តែនៅមិនទាន់ចូលរួមក្នុងប្រតិបត្តិការសង្គ្រាម ប្រឆាំងពួកបះបោរ ISIS ដែលកំពុងកាន់កាប់ទីក្រុងនេះប្រមាណ៣សប្ដាហ៍នៅឡើយ។

តាមការអះអាងកន្លងមក កងកម្លាំងអាមេរិក គឺជាកងកម្លាំងពិសេស មានមូលដ្ឋានទ័ពក្នុងភាគខាងត្បូងទីក្រុង Zamboanga ប្រទេសហ្វីលីពីន។ កាលពីថ្ងៃពុធ កងកម្លាំងពិសេសមួយក្រុមនេះ បានចូលរួមជាមួយយោធារដ្ឋាភិបាល ត្រឹមតែជំនួយបច្ចេកទេសនៅឡើយ ក្នុងសង្គ្រាមថ្មើរជើងប្រឆាំងពីពួកបះបោររដ្ឋអ៊ីស្លាម ISIS។

អគ្គីភ័យត្របាក់អគារ២៤ជាន់ សម្លាប់មនុស្ស ១៧នាក់

អគ្គីភ័យបានលេបត្របាក់អគារស្នាក់នៅកម្ពស់២៤ជាន់ កណ្តាលទីក្រុងឡុងដុងចក្រភពអង់គ្លេស ក្រោយប្រទេសមហាអំណាចមួយនេះ រងការវាយប្រហារជាបន្តបន្ទាប់ ពីសំណាក់ក្រុមរដ្ឋអ៊ីស្លាម ISIS។

អគ្គីភ័យបានចាប់ផ្ដើមឆាប់ឆេះ នៅយប់រំលងអធ្រាត្រឈានចូលថ្ងៃពុធ ម៉ោងក្នុងប្រទេសអង់គ្លេស ដោយឆេះចេញពីជាន់ទី២ នៃអគារ Grenfell បន្តឡើងទៅលើ បើកទោះជាមានការអន្តរាគមន៍ពីក្រុមពន្លត់អគ្គីភ័យជាច្រើនរយនាក់ក្ដី។

គិតមកទល់នឹងពេលនេះ ចំនួនអ្នកស្លាប់ មានការកើនឡើងដល់ទៅ ១៧នាក់ និង ៧៧នាក់រងរបួស ដោយក្នុងនោះ១៧នាក់ មានស្ថានភាពធ្ងន់ធ្ងរ ហើយតួលេខនេះត្រូវគេរំពឹងថា អាចបន្តកើនឡើង ព្រោះមានមនុស្សជាច្រើនកំពុងបាត់ខ្លួន។

អត្ថបទ៖ ៣០ដេលី