រឿងខ្លី«វិលមកផ្ទះ»កំពុងដាស់តឿនកូនឈប់ឲ្យឪចាំមើលផ្លូវទៀត (វីដេអូ)

2017-06-18 01:02:00
ចំនួនមតិ 0 | ចំនួនចែករំលែក 0

ចន្លោះមិនឃើញ

សម័យនេះ តើមានយុវវ័យដែលសុខចិត្តលះបង់ការដើរលេងជួបជុំមិត្តភ័ក្ត ទៅញុំាបាយជុំជាមួយគ្រួសារទេ ? ពិសេសគ្រួសារដែលមានតែឪពុកចាស់ឈឺដេកនៅពេទ្យត្រមង់ត្រមោចម្នាក់ឯងអង្គុយទន្ទឹងរង់ចាំកូនប្រុសសំណព្វចិត្តមកសួរសុខទុកខ្លួនជារៀងរាល់ថ្ងៃ។ នេះគឺជាស្ថានភាពក្នុងរឿងវីដេអូខ្លីរយៈពេល ៦នាទីមានចំណងជើងថា វិលមកផ្ទះ(Back Home) ដែលបានដាក់បង្ហោះលើបណ្តាញសង្គមកាលពីម្សិលមិញនេះ។

សាច់រឿងខ្លីមែនពិត តែបានកន្ត្រាក់អារម្មណ៍អ្នកទស្សនាមិនតិចទេ ពិសេសត្រង់ឈុតបង្ហាញពីការលំបាករបស់ឪពុកដែលប្រឹងធ្វើការជាកម្មករសំណង់ដើម្បីទំនុកបម្រុងកូនប្រុសឲ្យបានរៀនសូត្ររហូតដល់ចប់ និងមានអនាគតល្អ។

ឈុតចាក់ដោតបោះដូងបំផុតមួយទៀតនោះ គឺនៅនាទីចុងក្រោយដែលបង្ហាញពីពេលវេលាផ្អែមល្ហែមរបស់ឪពុកកូនកាលពីកូននៅតូច។ រស់នៅជុំគ្នារាល់ថ្ងៃហាក់ពោរពេញដោយសេចក្តីសុខទោះនៅផ្ទះឈើតូចចង្អៀតមែនពិត ក៏មិនបាច់ត្រូវខ្វល់ចិត្តចាំមើលផ្លូវកូនរាល់ថ្ងៃដែរ ។

ចង់ដឹងថាទីបំផុតកូនប្រុសវិលរកឪពុក ឬអត់ តោះ! មើលវីដេអូ ៖

លោក ឡេង ភារុណ អ្នកនិពន្ធ និង ដឹកនាំរឿង «វិលមកផ្ទះ» បានឲ្យដឹងថា៖ «នេះជារឿងពិតរបស់មិត្តខ្ញុំម្នាក់ដែល ដែលតាមពិតទៅឪពុកគេលែងនៅក្នុងលោកនេះទៀតហើយ។ គួរឲ្យសោកសៅបំផុតនោះសូម្បីដណ្ហើមចុងក្រោយរបស់ឪពុក ក៏គេមិនមកមិនទាន់ដែរ»។

លោកបន្តថា៖«កាលនោះដោយសារតែគេរវល់ធ្វើការខ្លាំង ហើយក៏តែងតែជុំគ្នាជាមួយពួកម៉ាកស៊ីផឹកកាត់ស្ត្រេសស្ទើររាលថ្ងៃ។ គិតតែស្ត្រេសរបស់ខ្លួនឯង ភ្លេចគិតពីអារម្មណ៍របស់ឪពុកដែលតែងតែអង្គុយរង់ចាំនៅផ្ទះរាប់ម៉ោង ណាមួយបារម្ភពិកូនខ្លាចជួបហេតុការណ៍អាក្រក់អីទៀត»។

ពេលនេះមិត្តរបស់លោកពិតជាស្តាយក្រោយ និងនឹកនាដល់ឪពុកខ្លួនយ៉ាងខ្លាំង តែឪពុកចាស់ដែលបានឈឺចែកឋានទៅមិនវិលត្រលប់វិញឡើយ។ ដូច្នេះហើយទើបមិត្តរបស់លោកចង់ឲ្យមានវីដេអូនេះដើម្បីដាស់អារម្មណ៍កូនៗទាំងអស់ដែលកំពុងតែវក់ធ្វើការ ឬ ដើរលេង តែងតែចូលផ្ទះយឺតដូចខ្លួនកាលពីមុន ឲ្យប្រញាប់ភ្ញាក់រលឹកបានទាន់ពេលវេលា កុំឲ្យយឺតពេលដូចរូបគេ ដូចពាក្យថា«ទោះរកលុយបានច្រើនប៉ុណ្ណាក៏ដោយ ក៏មិនអាចទិញភាពកក់ក្តៅដែលប៉ាធ្លាប់ផ្តល់ឲ្យកូនបានឡើយ»៕