Jimmy Kiss គ្រោងចេញចម្រៀងថ្មី២បទ គ្រាន់តែឮចំណងជើងក៏ស្រស់ស្រាយដែរ

2017-08-03 23:48:52
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង Original song លោក Jimmy Kiss បានបង្ហើបឲ្យដឹងថា ឆាប់ៗខាងមុននេះលោកគ្រោងផលិតបទចម្រៀងចំនួន២បទ ដែលទាក់ទងនឹងការដើរលេងជាមួយសម្រស់ធម្មជាតិ ។

បទចម្រៀងទាំង២បទនោះ មាន១បទទាក់ទងនឹងសម្រស់ភ្នំឱរ៉ាល់ និង១បទទៀតស្រដៀងទៅហ្នឹងបទ"អាស់ ការ៉េទិព្វ" ដែលអាចនិយាយថា ជាបទ "អាសង់ការ៉េទិព្វ" វគ្គ២។ ចំពោះចំណងជើងពិតប្រាកដនៃបទចម្រៀងទាំង២បទនេះ នៅមិនទាន់កំណត់ច្បាស់ទេ ព្រោះបច្ចុប្បន្នកំពុងតែសរសេរនៅឡើយ។

"ខ្ញុំបានសរសេរខ្លះហើយ មិនទាន់កំណត់ចំណងជើងច្បាស់លាស់ឡើយ លុះត្រាតែយើងចេញទៅថតតែម្ដង ហើយបទទាក់ទងភ្នំឱរ៉ាល់ ខ្ញុំចេញមុនគេ អាច១ខែ ២ខែកន្លះនេះហ្នឹង!” Jimmy Kiss លើកឡើង។

ម្ចាស់បទ "Baby I'm Sorry” រូបនេះបានបន្តឲ្យដឹងទៀតថា បទទាក់ទងភ្នំឱរ៉ាល់ ជាមេឡូឌីថ្មី ចង្វាក់បែបសប្បាយៗ រៀបរាប់ពីសម្រស់ធម្មជាតិព្រៃភ្នំ ភ្ជាប់ទៅនឹងដំណើរកម្សាន្ត ដែលមនុស្សទូទៅពេលទៅដើរលេងនៅតំបន់ព្រៃភ្នំធម្មជាតិ អាចយកមកច្រៀងលេងបាន។

ចំពោះបទ "អាសង់ការ៉េទិព្វ" វគ្គ២ លោកបានប្រាប់ថា នៅតែរក្សាការដើរលេងជាមួយម៉ូតូអាសង់ការ៉េដដែល ប៉ុន្តែអត្ថន័យអាចផ្សេង ហើយសាច់ភ្លេចក៏អាចកែប្រែខុសបទដើម និងមានការរ៉េបច្រើនជាងបទចាស់។ ពេលវេលាច្បាស់លាស់នៃការចេញបទ "អាសង់ការ៉េទិព្វ" វគ្គ២នោះ មិនទាន់កំណត់បាននៅឡើយ រង់ចាំធ្វើបទទាក់ទងសម្រស់ភ្នំឱរ៉ាល់រួចរាល់សិន។

តាមការលើកឡើងរបស់ Jimmy Kiss កន្លងមកលោកធ្លាប់និពន្ធបទចម្រៀងទាក់ទងនឹងសម្រស់ ធម្មជាតិបែបនេះចំនួន ៣បទ មកហើយ មានបទ "អាល័យធម្មជាតិ” បទ"ទំនួញធម្មជាតិមុនពេលព្រាត់គ្នា" និងបទ"មុនពេលព្រាត់គ្នា"។ តារាចម្រៀងរូបនេះមិនបានសម្ដែងសុទិដ្ឋិនិយមថា បទចម្រៀងទាំង២បទដែលគ្រោងបញ្ចេញនេះនឹងទទួលបានការគាំទ្រយ៉ាងណាឡើយ ដោយទុកឲ្យទស្សនិកជនជាអ្នកផ្ដល់ពិន្ទុវិញចុះ៕

អត្ថបទៈ ស៊ុនហួត