រំលឹកឡើងវិញ កម្ពុជាចំណាយជាង១ម៉ឺនដុល្លារយក Leo មកដឹកនាំគឺដើម្បីឈ្នះការប្រកួត

2017-10-20 01:45:24
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី២ខែមីនាឆ្នាំ២០១៧កន្លងទៅ សហព័ន្ធបាល់ទាត់កម្ពុជាបានចុះកុងត្រាយកលោក Leonardo Vitorino មកដឹកនាំក្រុមជម្រើសជាតិជំនួសលោក Lee Tae Hoon ដែលអស់កុងត្រា។

ក្នុងឱកាសនោះដែរ លោក សៅ សុខា ប្រធានសហព័ន្ធបាល់ទាត់កម្ពុជាបានលើកឡើងដូច្នេះថា៖ “ថ្ងៃនេះអាចនិយាយបានថា ជាប្រវត្តិសាស្ត្ររបស់ខ្ញុំ និងបាល់ទាត់កម្ពុជា ដែលយើងយកគ្រូបាល់ទាត់មកពីប្រទេសប្រេស៊ីល ជាកន្លែងល្បីខាងបាល់ទាត់នៅលើពិភពលោក មកធ្វើជាគ្រូបង្វឹកក្នុងក្រុមជម្រើសជាតិរបស់យើង។ ការយកគាត់មកធ្វើជាគ្រូបង្វឹកនេះ ក្នុងគោលដៅដើម្បីឈ្នះក្នុងការប្រកួតជាមួយគេ ព្រោះកីឡាកររបស់យើងបច្ចុប្បន្ននេះ បើប្រៀបធៀបទៅនឹងរយៈពេល ៣ ឆ្នាំមុន គឺយើងមានការរីកចម្រើន និងប្រែប្រួល អ៊ីចឹងគ្រូបង្វឹករបស់យើងក៏ប្រែប្រួលដែរ គឺមានន័យថា ជាគ្រូដែលមានបទពិសោធច្រើន និងល្បីឈ្មោះដើម្បីមកបង្ហាត់ក្រុមជម្រើសជាតិរបស់យើង ទើបការលេងរបស់យើងកាន់តែមានគុណភាពល្អ”។

ក្នុងការចុះកុងត្រានោះដែរ លោក Leonardo នឹងទទួលបាន១២ ០០០ដុល្លារក្នុង១ខែ សម្រាប់គ្រូទាំងបីនាក់ដែលជាក្រុមការងាររបស់លោក។ លើសពីនេះទៅទៀត សហព័ន្ធបានផ្ដល់កន្លែងស្នាក់នៅហូបចុក និងមធ្យោបាយធ្វើដំណើរ ជាពិសេសអនុញ្ញាតឲ្យទៅលេងស្រុកកំណើត១ឆ្នាំមួយដងទៀតផង។

យ៉ាងណាមិញ ក្ដីរំពឹងរបស់សហព័ន្ធចំពោះគ្រូបង្វឹកសញ្ជាតិប្រេស៊ីលហាក់មិនបានដូចចិត្តឡើយ ពោលគឺតាំងពីចូលដឹកនាំមកភាគច្រើនកម្ពុជាមិនទទួលបានជោគជ័យឡើយ (ដឹកនាំក្រុមធំ៧ប្រកួត ចាញ់៦ប្រកួត) ខណៈដែលទៅស៊ីហ្គេមនោះ ៥ប្រកួត ចាញ់ទាំង៥ប្រកួត មិនទទួលបានពិន្ទុទេ។ លើសពីនេះទៅទៀត ថែមទាំងមានបញ្ហាកីឡាករបញ្ឈរជើងដល់ទី២នាក់ថែមទៀត។

ដូច្នេះហើយកាលពីយប់មិញនេះ សហព័ន្ធបានចែកផ្លូវគ្នាដើរជាមួយអតីតគ្រូបង្វឹកយុវជនថ្នាលរបស់ Buriram United ខាងលើនេះហើយ ដោយយកលោក Kazunori Ohara ជនជាតិជប៉ុនមកដឹកនាំក្រុមបាល់ទាត់ជម្រើសជាតិកម្ពុជាជាបណ្តោះអាសន្ន៕

អត្ថបទ៖ មុន្នីរម្យ