យ៉ាងហោចក៏មាន ការប្រណាំងទូកបែបសហគមន៍ចំនួន៧កន្លែងនៅតាកែវ តំណាលគ្នានឹងភ្នំពេញ

2017-11-01 01:52:13
ចំនួនមតិ 0 | ចំនួនចែករំលែក 0

ចន្លោះមិនឃើញ

អំឡុងពិធីបុណ្យអុំទូកនាឆ្នាំនេះ នៅទូទាំងខេត្តតាកែវមានរៀបចំពិធីបុណ្យអុំទូកចំនួន៧កន្លែងផ្សេងៗគ្នា នៅក្នុងស្រុកចំនួនបី ដែលរួមមានស្រុកសំរោងចំនួនបីកន្លែង ស្រុកបាទីបីកន្លែង និងស្រុកព្រៃកប្បាសមួយកន្លែង ព្រមទាំងមានល្បែងកម្សាន្តនានាផង។

សម្រាប់ស្រុកសំរោង ពិធីបុណ្យនេះនឹងធ្វើនៅវត្តចំនួនបីគឺវត្តអង្គជុំ ក្នុងភូមិព្រៃញឹក ឃុំខ្វាវ។ បើតាមការឱ្យដឹងពីលោក ប៉ាត់ រិន គណៈកម្មការរៀបចំបុណ្យអុំទូកឱ្យដឹងថាក្រៅពីការប្រណាំងទូកនេះក៏មានល្បែងរបាំនានាលេងកំដរក្នុងបរិវេណវត្តនាពេលរាត្រីផងដែរ។

(សមាជិកគណៈកម្មការប្រណាំងទូកកំពុងរៀបចំច្រវា)

ចំណែកវត្តអង្គចង្អេរស្ថិតនៅភូមិត្រពាំងវិហារ ឃុំជើងគួន ក៏មានការប្រណាំងទូកនៅបឹងធំខាងត្បូងវត្តផងដែរ។ នេះបើតាមការបញ្ជាក់របស់លោក ឡាច ព្រំ ជាប្រធានភូមិ និងជាប្រធានគណៈកម្មការរៀបចំបុណ្យអុំទូកនៅទីនោះ។ សម្រាប់ស្ពានត្នោតទេស្ថិតនៅភូមិត្នោតទេ ឃុំទ្រាក៏មានការរៀបចំប្រណាំងទូក និងលេងល្បែងកម្សាន្តផងដែរ។ នេះបើតាមលោក ហង្ស ឯក ជាគណៈកម្មការរៀបចំការប្រណាំងទូក។

(ពលរដ្ឋក្នុងភូមិត្រពាំងយោងកំពុងអុំទូកសាកល្បងត្រៀមប្រណាំង)

ងាកមកស្រុកបាទីវិញ ក៏មានដែរការប្រណាំងទូកនេះ ដោយមានធ្វើនៅទំនប់ថ្នល់ដាច់ ក្នុងឃុំគ្រាំងលាវ ប្រឡាយមេភូមិត្បូងដំរី នៅក្នុងឃុំក្រាំងធ្នង់ និងកន្លែងទីបីនៅ ប្រឡាយមេភូមិត្រពាំងយោង ក្នុងឃុំពារាម តែប្រើធុងសាំងសម្រាប់អុំប្រណាំង។

ដោយឡែកនៅស្រុកព្រៃកប្បាសវិញ រៀបចំពិធីបុណ្យអុំទូកនៅក្នុងបឹងធំ នាភូមិកំពែង ឃុំកំពែង និងថាមានល្បែងរបាំកំដរផងដែរ។

គណៈកម្មការរៀបចំបុណ្យអុំទូកខាងលើ លើកឡើងប្រហាក់ប្រហែលគ្នាថាការរៀបចំពិធីបុណ្យអុំទូកនេះមានគោលបំណងជួយថែរក្សាប្រពៃណីវប្បធម៌ជាតិ ធ្វើឱ្យមូលដ្ឋានមានភាពសប្បាយរីករាយ ជួយសម្រួលដល់ប្រជាពលរដ្ឋដែលមិនមានលទ្ធភាពទៅទស្សនាកម្សាន្តនៅទីក្រុងភ្នំពេញ ជួយកាត់បន្ថយគ្រោះថ្នាក់ចរាចរណ៍ និងបង្កើនចំណូលដល់ពលរដ្ឋនៅមូលដ្ឋាន។

ការរៀបចំនេះទៀតសោតគឺទទួលបានការឧបត្ថម្ភពីប្រជាពលរដ្ឋនៅតាមសហគមន៍ និងសប្បុរសជននានា ហើយការបែងចែកប្រាក់រង្វាន់គឺអាស្រ័យលើចំណូលទទួលបានជាក់ស្ដែង៕

អត្ថបទដោយ៖ សូទ្រី