បាត់មុខជិតកន្លះទសវត្សរ៍ ពេលនេះ Kim Hyun Joong វិលមកវិញក្នុងរឿងឆ្លងភពថ្មី១

2018-07-01 04:18:06
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងប្រុសដែលល្បីឈ្មោះបំផុតនាប៉ុន្មានឆ្នាំមុន Kim Hyun Joong បានធ្វើឲ្យអ្នកគាំទ្រទាំងអស់របស់ខ្លួនរីករាយម្ដងទៀត ក្រោយមានព័ត៌មានថាលោកនឹងវិលចូលការសម្ដែងវិញ។

នៅថ្ងៃទី ២៧ ខែមិថុនា ឆ្នាំ២០១៨ មានសេចក្ដីរាយការណ៍មួយបានបញ្ជាក់ពី ផលិតកម្ម KeyEast ថាក្រោយ ចុះកុងត្រាជាមួយផលិតកម្មជាថ្មី ពេលនេះតារាប្រុសល្បីឈ្មោះក្នុងពិភពភាពយន្ត និងហើយធ្លាប់មានរឿងអាស្រូវជាប់ខ្លួនច្រើនរូបនេះ ត្រូវបានជ្រើសរើសឲ្យសម្ដែងក្នុងរឿងភាគមួយមានចំណងជើងថា "When Time Stopped”។ វាជាភាពយន្តបែបអភិនីហារ វេទមន្តប្លែកភ្នែក និងរៀបរាប់ពីជីវិតរបស់មនុស្សអាចឆ្លងភពម្នាក់ ដែលវិលវល់ក្នុងភពឯកាតែឯង រហូតពេលមួយបានជួបនឹងនារីម្នាក់ ទើបជីវិតបុរសកំព្រានោះចាប់ផ្ដើមមានន័យវិញ។

បើតាមការឲ្យដឹងពីវិបសាយ Allkpop ខ្សែភាពយន្តនេះនឹងចាប់ផ្ដើមថតនៅខែកក្កដានេះ និងគ្រោងបញ្ចាំងនៅខែតុលា។

ជាក់ស្ដែង ភាពយន្តនេះនឹងក្លាយជាស្នាដៃទី១ ក្រោយអវត្តមានក្នុងពិភពសម្ដែងរយៈពេល ៤ឆ្នាំ ដោយសារមានក្ដីក្ដាំជាច្រើនពាក់ព័ន្ធនឹងរឿងរ៉ាវឯកជនរបស់លោក ដែលក្នុងនោះរួមមាន រឿងអាស្រូវជាមួយអតីតមិត្តស្រី និងករណីសេពគ្រឿងស្រវឹងហើយបើកបរកាលពិខែមីនា ឆ្នាំមុន។ ប៉ុន្តែទោះជាយ៉ាងណា វាជារឿងពីមុន សម្រាប់អ្នកគាំទ្រក៏នៅតែគាំទ្រវត្តមានរបស់ Hyun Joong សម្រាប់រឿងថ្មីនេះដែរ៕

ប្រភព៖ Allkpop ប្រែសម្រួល៖ យី សុធារី