មកស្ដាប់សម្ដីពិតដ៏រំជួលចិត្ត ពីក្មេងប្រុស២រូបហ៊ានបើកម៉ូតូ វែកផ្លូវសង្គ្រោះជីវិតមនុស្ស

2018-09-04 10:12:39
ចំនួនមតិ 0 | ចំនួនចែករំលែក 0

ចន្លោះមិនឃើញ

វីដេអូខ្លីមួយកំពុងល្បីល្បាញពេញបណ្ដាញសង្គមហ្វេសប៊ុកនៅកម្ពុជា ពីក្មេងប្រុស២រូបហ៊ានបើកម៉ូតូនាំមុខឡានសង្គ្រោះបន្ទាន់មួយ ដែលមានមនុស្សកំពុងស្រែកយំក្នុងឡានសង្គ្រោះនោះ ព្រោះម៉ោង៥ល្ងាចជាពេលវេលាដែលផ្លូវកំពុងពេញស្ទះខ្លាំងនៅរាជធានីភ្នំពេញ។

សកម្មភាពយុវជនទាំង២កំពុងបើកម៉ូតូវែកផ្លូវ

ឆ្លើយឆ្លងជាមួយ Sabay នៅល្ងាចថ្ងៃទី០៤ ខែកញ្ញា ឆ្នាំ២០១៨នេះ យុវជនវ័យ១៨ឆ្នាំ សុខលី ម៉ារាឌី គឺជាអ្នកកាន់ដៃចង្កូតម៉ូតូ ខណៈមិត្តភក្ដិម្នាក់ទៀតឈ្មោះ ម៉ែន វាសនា អាយុ១៨ឆ្នាំដូចគ្នាជាអ្នកសម្រួលចរាចរណ៍នាពេលនោះ។ ម៉ារាឌី បានរៀបរាប់ទាំងអារម្មណ៍ក្ដុកក្ដួលថា ពេលនោះខ្លួន និងមិត្តភក្ដិកំពុងជិះទៅរកទិញអីញ៉ាំនៅទួលទំពូង ស្រាប់តែប្រទះឃើញឡានសង្គ្រោះបន្ទាន់មួយ កំពុងជួបបញ្ហាកកស្ទះចរាចរណ៍យ៉ាងខ្លាំងនៅម្ដុំស្តុបពេទ្យចិន លើមហាវិថីព្រះមុនីវង្ស។ ដោយទ្រាំមើលស្ថានការណ៍ដ៏លំបាកនេះមិនបានខ្លួន និងមិត្តភក្ដិឯកភាពគ្នាថា ត្រូវតែជួយសម្រួលរហូតដល់គោលដៅទោះបីជាមិនត្រូវជាអ្វីជាមួយនឹងគ្នាក៏ដោយ។

យុវជន សុខលី ម៉ារាឌី

យុវជនដែលទើបប្រឡងបញ្ចប់មធ្យមសិក្សាទុតិយភូមិឆ្នាំ២០១៨នេះបន្តថា មូលហេតុដែលខ្លួន និងមិត្តភក្ដិសម្រេចចិត្តជួយសម្រួលចរាចរណ៍នៅពេលនោះ ព្រោះតែចង់ជួយសង្គ្រោះជីវិតមនុស្ស ដោយមិនចង់បានអ្វីតបស្នងមកវិញឡើយ គឺជួយដោយចេញពីទឹកចិត្តពិតប្រាកដ។ រាឌីនិយាយយ៉ាងដូច្នេះថា៖ «បាទបងខ្ញុំមានអារម្មណ៍ថា ឪពុកគេឪពុកយើង ម្ដាយគេម្ដាយយើង គឺជាជីវិតមួយដូចតែគ្នាគ្មាននរណាម្នាក់ចង់បាត់បង់សមាជិកគ្រួសារឡើយ ខ្ញុំមិនដឹងថាខ្ញុំអាចជួយអ្វីបានឡើយ ក្រៅពីធ្វើម៉េចឲ្យឡានសង្គ្រោះបន្ទាន់បានឆាប់ទៅដល់មន្ទីរពេទ្យតែប៉ុណ្ណោះ។»

យុវជន ម៉ែន វាសនា

សិស្សវិទ្យាល័យជាស៊ីមសន្ធរម៉ុករូបនេះរៀបរាប់ទៀតថា កន្លងមកខ្លួនធ្លាប់បានជួយបែបនេះម្ដងរួចមកហើយ ពេលកំពុងជិះម៉ូតូទៅសាលា ហើយឃើញឡានសង្គ្រោះបន្ទាន់មួយកំពុងកកស្ទះចរាចរណ៍ខ្លាំង រហូតដល់មន្ទីរពេទ្យរុស្ស៊ី។ ចំពោះលើកនេះ ខ្លួន និងមិត្តសម្លាញ់រៀននៅវិទ្យាល័យជាមួយគ្នាឈ្មោះ វាសនា បានធ្វើអំពើល្អរួមគ្នា ដោយបានជួយសម្រួលតាំងពីស្តុបពេទ្យចិន រហូតដល់មន្ទីរពេទ្យឯកជនមួយនៅក្បែរពេទ្យរុស្ស៊ី ដោយចំណាយពេលទាំងពីម៉ោង៥ រហូតដល់ម៉ោង៦ល្ងាច។

ទន្ទឹមនឹងនេះរាឌី និងវាសនា សូមបកស្រាយមូលហេតុដែលពួកគេមិនបានពាក់មួកសុវត្ថិភាព ព្រោះពេលនោះគិតថាគ្រាន់តែទៅទិញអីញ៉ាំនៅក្បែរៗនោះ ដោយផ្ញើមួកសុវត្ថិភាពជាមួយមិត្តភក្ដិផ្សេងទៀត ហើយស្របពេលនោះក៏ជួបករណីបន្ទាន់បែបនេះ ទើបសម្រេចចិត្តបើកម៉ូតូសង្គ្រោះជីវិតមនុស្សទាំងមិនបានពាក់មួកសុវត្ថិភាព។

សុខលី ម៉ារាឌី និងមិត្តភក្ដិ ម៉ែន វាសនា

ដោយឡែកលោក សោម ភីរឿន គឺជាកូនប្រុសបង្កើតដែលមានឪពុកគឺជាអ្នកជំងឺនៅក្នុងឡានសង្គ្រោះបន្ទាន់នោះ។ លោក ភីរឿន បានប្រាប់សប្បាយថា ពេលនោះឡានសង្គ្រោះបន្ទាន់បានបើកចេញពីមន្ទីរពេទ្យឯកជនមួយ ឆ្ពោះទៅកាន់ពេទ្យឯកជនមួយទៀត នៅក្បែរពេទ្យរុស្ស៊ី ដែលឪពុកលោកមានជំងឺគ្រួសក្នុងប្រមាត់ក្នុងស្ថានភាពធ្ងន់ធ្ងរ។ លោកពិតជាមានអារម្មណ៍ភ្ញាក់ផ្អើលនៅពេលឃើញសកម្មភាពក្មេងប្រុស២រូប កំពុងតែជួយសម្រួលចរាចរណ៍ទាំងពួកគេមិនមែនជាសាច់ញាតិអ្វីជាមួយគ្រួសារលោកសោះ។

អ្នកមកពីខេត្តព្រះសីហនុរូបនេះបន្តថា ពេលនេះលោកបានទាក់ទងទៅយុវជនទាំង២រូបខាងលើនេះហើយ ដើម្បីជួបសម្ដែងការអរគុណ និងមានជាសគុណជូនដល់ប្អូនទាំង២ទៀតផង។ ខណៈនេះដែរឪពុករបស់លោកបានចេញពីបន្ទប់សង្គ្រោះបន្ទាន់ហើយ និងកំពុងតាមដានស្ថានភាព ដើម្បីត្រៀមធ្វើការវះកាត់បន្តទៀត៕

សូមទស្សនាវីដេអូខាងក្រោមនេះ៖

អត្ថបទ៖ វឌ្ឍនៈ