ក្ដុកក្ដួលចិត្ត គ្រោះថ្នាក់ចរាចរណ៍សម្លាប់ឪពុក ទុកឲ្យកូនសួររករាល់ថ្ងៃ

2019-01-10 04:13:05
ចំនួនមតិ 0 | ចំនួនចែករំលែក 0

ចន្លោះមិនឃើញ

គ្រោះថ្នាក់ចរាចរណ៍បានសម្លាប់មនុស្សនៅកម្ពុជាជាង១ ៧០០នាក់ ក្នុងឆ្នាំ២០១៨ កន្លងមកនេះ ហើយបញ្ហានេះមិនមែនមានតែនៅកម្ពុជានោះទេ តែនៅបណ្តាប្រទេសផ្សេងទៀតក៏មានបញ្ហាប្រហាក់ប្រហែលគ្នានេះដែរ។

គ្រោះថ្នាក់ចរាចរណ៍ប្រមាណជា៩៣ភាគរយកើតមានឡើងនៅក្នុងប្រទេសមានប្រាក់ចំណូលទាប និងមធ្យម។ នេះបើតាមទិន្ន័យរបស់អង្គការសុខភាពពិភពលោកចេញផ្សាយកាលពីខែធ្នូ ឆ្នាំ ២០១៨ កន្លងមកនេះ។

បើតាមរបាយកាណ៍ប្រចាំខែរបស់នាយដ្ឋាននគរបាលចរាចរណ៍ផ្លូវគោកនៃក្រសួងមហាផ្ទៃ អ្នកស្លាប់ច្រើនជាងគេក្នុងចំណោមអ្នកស្លាប់ផ្សេងទៀតគឺអ្នកបើកបរម៉ូតូ។

និយាយដល់ករណីនេះ កាលពីខែធ្នូ កន្លងទៅនេះស្វាមីរបស់អ្នកស្រី ម៉ុល ស្រីផល បានស្លាប់ដោយគ្រោះថ្នាក់ចរាចរណ៍នៅពេលកំពុងជិះម៉ូតូចេញពីធ្វើការ។

ស្រ្តីវ័យ៣៥ ឆ្នាំ មានកូនក្នុងបន្ទុកបីនាក់ខាងលើឲ្យដឹងថាពេលចេញពីធ្វើការត្រឡប់មកផ្ទះវិញ ប្តីអ្នកស្រីត្រូវអ្នកជិះម៉ូតូដូចគ្នាបុក បណ្តាលឲ្យដួល និងរងរបួស ហើយបានស្លាប់នៅមន្ទីពេទ្យ។ អ្នកស្រីថាជនបង្ករគឺជាយុវជនម្នាក់ដែលបានជិះម៉ូតូជែងរថយន្ត ហើយបានជួបសត្វគោដើរឆ្លងផ្លូវ រួចក៏បើកងាកចូលគន្លងផ្លូវម៉ូតូប្តីអ្នកស្រីមកពីទិសផ្ទុយគ្នា។

មន្ត្រីជាន់ខ្ពស់គណៈកម្មការជាតិសុវត្ថិភាពចរាចរណ៍ផ្លូវគោក លោកជំទាវ មឹន ម៉ាណវី បានលើកឡើងក្នុងសន្និសីតស្តីពីសុវត្ថិភាពចរាចរណ៍កាលពីខែធ្នូ ឆ្នាំ២០១៨ ថាការវ៉ាជែង និងបើកបរលើសល្បឿនកំណត់ជាមូលហេតុចម្បងដែលនាំឲ្យមានគ្រោះថ្នាក់ចរាចរណ៍នាពេលបច្ចុប្បន្ននេះ។

(អ្នកធ្វើដំណើរខ្លះជិះបញ្ច្រាសទិសដៅចរាចរណ៍ពេលកកស្ទះម្តងៗ)

ក្រោយស្វាមីស្លាប់ដោយគ្រោះថ្នាក់ចរាចរណ៍ អ្នកស្រី ម៉ុល ស្រីផល ត្រូវទទួលបន្ទុកធ្ងន់មួយគឺចិញ្ចឹមកូនបីនាក់នៅក្នុងបន្ទុកតែម្នាក់ឯង។

អ្នកស្រីនិយាយថា៖ « ខ្ញុំមានការរន្ធត់ចិត្តពេក...ពិបាកទទួលអារម្មណ៍...វាតន់ហន់ពេកហើយ...ខ្លោចចិត្តអាណិតកូនស្រីពៅរហូតមកដល់ពេលនេះនៅតែមិនទាន់ដឹងថាឪពុកស្លាប់....នាងចេះតែសួរខ្ញុំថាម៉ាក់ប៉ាទៅធ្វើការយូរម្លេះអត់ឃើញមកវិញចឹង»។

បើតាមអ្នកស្រី ម៉ុល ស្រីផល ស្វាមីអ្នកស្រីជាបុគ្គលិកផ្នែក ធនធានមនុស្សរបស់សាលាឯកជនល្បីឈ្មោះមួយនៅភ្នំពេញ ហើយថាសាលាក៏បានទិញធានារ៉ាប់រងជីវិតសម្រាប់ស្វាមីអ្នកស្រីផងដែរ។ តាមរយៈការធានារ៉ាប់រងជីវិតនេះ អ្នកស្រីសង្ឃឹមថានឹងបានថវិកាសម្រាប់ជួយទ្រទ្រង់ជីភាពគ្រួសារ និងផ្គត់ផ្គង់ការរៀនសូត្ររបស់កូនៗអ្នកស្រី។

បច្ចុបន្នអ្នកស្រីរស់នៅផ្ទះតៀមផ្ទាល់ខ្លួនមួយខ្នងក្នុងខណ្ឌពោធិសែនជ័យ ក្រុងភ្នំពេញ ប្រកបរបរជាកម្មករកាត់ដេរ និងមានម្តាយរស់នៅជាមួយសម្រាប់ជួយមើលថែកូនៗពេលអ្នកស្រីទៅទៅធ្វើការ។

ដោយសារគ្រោះថ្នាក់ចរាចរណ៍បានធ្វើឲ្យអ្នកស្រីបាត់បង់ស្វាមី អ្នកស្រី បានស្នើឲ្យអ្នកបើកបរទាំងឡាយគោរច្បាប់ចរាចរណ៍ និងអាយុជិវិតអ្នកដទៃផងដែរ។ អ្នកស្រីបន្តថា៖ «ជាក់ស្ដែងប្ដីខ្ញុំបើកម៉ូតូយឺតណាស់....មិនដែលហ៊ានបើកលឿនទេ តែទីបំផុតនៅតែរងគ្រោះដដែល អ៊ីចឹងហើយសូមអ្នកបើកបរកុំវ៉ាឡានដោយមិនគិតពីសុវត្ថិភាពអ្នកដំណើរ»។

បើតាមទិន្ន័យអង្គការសុខភាពពិភពលោកក្នុងមួយឆ្នាំៗមនុស្សស្លាប់ដោយគ្រោះថ្នាក់ចរាចរណ៍ប្រហែលជា១,៣៥លាននាក់ ហើយខាតបង់សេដ្ឋកិច្ចប្រហែលជា៣ភាគរយនៃផលិតផលជាតិសរុបក្នុងប្រទេសទាំងនោះ។ ប្រភពដដែលឲ្យដឹងថាអ្នកដែលងាយរងគ្រោះដល់ស្លាប់នៃគ្រោះថ្នាក់ចរាចរណ៍គឺអ្នកថ្មើរជើង អ្នកជិះកង់ និងអ្នកជិះម៉ូតូ ដែលមានអាយុចន្លោះពី៥ទៅ២៩ឆ្នាំ៕

អត្ថបទដោយ៖ ជិន វេន