យុវជនម្នាក់ ប្ដឹង Apple ទារសំណងរហូតដល់ ១ ពាន់លានដុល្លារ

2019-04-23 08:01:39
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងពាក្យបណ្ដឹងមួយដែលបានដាក់ទៅកាន់តុលាការសហព័ន្ធក្រុង New York នាថ្ងៃនេះ យុវជនវ័យ ១៨ ឆ្នាំឈ្មោះ Ousmane Bah បានប្ដឹង Apple ទាមទារសំណងទឹកប្រាក់រហូតដល់ ១ ពាន់លានដុល្លារ។

Bah បាននិយាយថា ខ្លួនត្រូវបានគេចាប់ខ្លួនទាំងដែលគ្មានកំហុស ទាក់ទងនឹងការប្លន់ទំនិញពីហាង Apple Store ដោយសារតែឈ្មោះរបស់គេ ត្រូវបានភ្ជាប់នឹងចោរពិតប្រាកដ។ Bah បានលម្អិតថា Apple បានមានកំហុស ក្នុងការអនុញ្ញាតឲ្យអត្តសញ្ញាណរបស់ Bah ភ្ជាប់គ្នានឹងចោរពិតប្រាកដ។

យុវជនរូបនេះថា ខ្លួនបានបាត់នូវលិខិតរៀនបើកបរដែលមានឈ្មោះរបស់ខ្លួនសរសេរលើនោះ ប៉ុន្តែគ្មានរូបថត ហើយទំនងជាត្រូវបានចោរយកធ្វើជាអត្តសញ្ញាណ។ Bah ត្រូវបានចាប់ខ្លួននៅវេលាម៉ោង ៤ ព្រឹក ថ្ងៃទី ២៩ ខែវិច្ឆិកា ជាមួយនឹងដីកាចាប់ខ្លួនមានរូបថត ដែលមិនដូច Bah សោះឡើយ។ ទោះបីមុខមាត់ខុសគ្នាមែន ប៉ូលិសនៅតែធ្វើការចាប់ខ្លួន។

អ្នកស៊ើបអង្កេតនៃស្នងការដ្ឋាន New York ជឿជាក់ថាចោរពិតប្រាកដ បានប្រើប្រាស់លិខិតរៀនបើកបររបស់ Bah ធ្វើជាអត្តសញ្ញាណរបស់ខ្លួន ដែលបណ្ដាលឲ្យឈ្មោះរបស់ Bah មានជាប់ទាក់ទងនឹងមុខមាត់របស់ចោរ។ ក្នុងពាក្យបណ្ដឹងនេះក៏មានរំលឹកអំពីបច្ចេកវិទ្យាស្កេនមុខនៅក្នុងហាង Apple ប៉ុន្តែមិនច្បាស់ថាមានន័យបែបណានោះទេ៕

ចុចអាន ៖

ប្រភព៖ 9to5Mac ប្រែសម្រួល៖ សុខហេង