សាលាវេសឡាញ ចុះ MoU ជាមួយបឹងកេត ដើម្បីអភិវឌ្ឍថ្នាលយុវជន

2019-05-02 00:12:42
ចំនួនមតិ 0 | ចំនួនចែករំលែក 0

ចន្លោះមិនឃើញ

សាលាវេសឡាញ បានចុះអនុស្សរណៈយោគយល់ ជាមួយក្លឹបបាល់ទាត់បឹងកេត ដើម្បីអភិវឌ្ឍថ្នាលយុវជនឱ្យកាន់តែល្អថែមទៀត ជួយវិស័យបាល់ទាត់នៅកម្ពុជា។

ការចុះអនុស្សរណៈយោគយល់នេះធ្វើឡើង កាលពីល្ងាចថ្ងៃទី៣០ ខែមេសា ឆ្នាំ២០១៩ នៅ សាខាសាលារៀនវេសឡាញ ស្ថិតនៅសង្កាត់ទឹកល្អក់ ខណ្ឌទួលគោក រាជធានីភ្នំពេញ ដើម្បីរៀបចំការបណ្តុះបណ្តាល និងអភិវឌ្ឍន៍វិស័យកីឡាបាល់ទាត់ថ្នាលយុវជនរបស់វេសឡាញឱ្យត្រឹមត្រូវបានក្បួនបច្ចេកទេសបាល់ទាត់។

លោក ប៉ិច បូឡែន ប្រធាននាយកប្រតិបត្តិវេសឡាញ បាននិយាយថានេះជាឱកាសល្អសម្រាប់សិស្សបានទទួលការបណ្ដុះបណ្ដាលប្រកបដោយស្ដង់ដារខ្ពស់ក្នុងការលេងបាល់ទាត់។ ជាពិសេសសម្រាប់សិស្សានុសិស្សណាចង់ចាប់អាជីពជាកីឡាករបាល់ទាត់ នាថ្ងៃអនាគត ក៏អាចសម្រេចបានដែរ នៅពេលដែលរូបគេមានសមត្ថភាពជាមួយក្លឹបបឹងកេត។

លោកស្រី ពុធ ធីតា ប្រធាននាយកប្រតិបត្តិ នៃក្លឹបបាល់ទាត់បឹងកេតវិញ ក៏សប្បាយចិត្តនៅពេលបានចាប់ដៃគូជាមួយសាលាវេសឡាញនេះ។ អ្នកស្រីសង្ឃឹមថា ការជួយបណ្ដុះបណ្ដាលថ្នាលយុវជននៅសាលានេះ នឹងធ្វើឱ្យបឹងកេតទទួលបានយុវជនល្អៗថែមទៀត ទៅថ្ងៃអនាគត៕

អត្ថបទ៖ មុន្នីរម្យ