មែនឬក៏អី ! ស្រ្តីកាត់ស្បូនប្រឈមនឹងជំងឺពុកឆ្អឹង?

2020-01-03 04:22:16
ចំនួនមតិ 0 | ចំនួនចែករំលែក 0

ចន្លោះមិនឃើញ

មិនខុសពីស្ត្រីអស់រដូវ គឺស្ត្រីដែលកាត់ស្បូនប្រឈមខ្ពស់នឹងជំងឺពុកឆ្អឹង។ តួលេខក៏បានបង្ហាញដែរថា ស្ត្រីច្រើនជាងបុរសប្រឈមកើតជំងឺពុកឆ្អឹង ខណៈដែលបុរសក្នុងចំណោម ៨ នាក់ គឺមានតែ ១ នាក់ ប៉ុណ្ណោះ អាចកើតជំងឺពុកឆ្អឹងបាន។

តើហេតុអ្វីបានជាស្រ្តីកាត់ស្បូនប្រឈមខ្លាំងនៃការកើតជំងឺពុកឆ្អឹង? ចុះហេតុអ្វីបានជាស្រ្តីច្រើនជាងបុរសដែលនឹងងាយកើតជំងឺពុកឆ្អឹង? តើអ្វីទៅជាជំងឺពុកឆ្អឹង? សំណួរទាំងអស់នេះ ត្រូវបាន លោកវេជ្ជបណ្ឌិត ម៉េង សុខ ឯកទេស វះកាត់ឆ្អឹង នៅមន្ទីរពេទ្យមិត្តភាព ខ្មែរ-សូវៀត និង គ្លីនិក លឹម តាំង បានធ្វើការពន្យល់ដូចខាងក្រោម៖

វេជ្ជបណ្ឌិត ម៉េង សុខ-07

Sabay៖ តើអ្វីទៅជាជំងឺពុកឆ្អឹង?

វេជ្ជបណ្ឌិត ម៉េង សុខ៖ ជំងឺពុកឆ្អឹងគឺជាជំងឺមួយប្រភេទនៅពេលដែលកំហាប់ឆ្អឹង ឬ រចនាសម្ព័ន្ធទ្រទ្រង់ឆ្អឹងមានការថយចុះ ដែលធ្វើឲ្យឆ្អឹងមិនរឹងមាំឈានទៅពុកឆ្អឹង។ ឧទាហរណ៍ នៅពេលយើងសាងសង់ផ្ទះចាក់ប្លង់សេ គឺកំហាប់តំណាងឲ្យស៊ីម៉ង់-ខ្សាច់ ដែលត្រូវប្រើ ហើយប្រសិនបើយើងប្រើស៊ីម៉ង់តិចពេកវានឹងមិនធ្វើឲ្យប្លង់សេរឹងមាំនោះទេ។

Sabay៖ ជំងឺពុកឆ្អឹងច្រើនកើតលើមនុស្សវ័យណា?

វេជ្ជបណ្ឌិត ម៉េង សុខ៖ ជំងឺពុកឆ្អឹងអាចកើតមានឡើងទាំងក្មេង និង មនុស្សចាស់

វ័យចំណាស់៖ ជំងឺពុកឆ្អឹងដែលកើតលើមនុស្សចាស់ គឺជារឿងធម្មតា ដែលជាពិសេសស្ត្រីដែលចាប់ផ្ដើមអស់រដូវ គឺប្រឈមនឹងជំងឺពុកឆ្អឹងរហូតដល់ទៅជិត ៤០% នៃស្ត្រីទូទៅ គេឃើញកើតមានជំងឺពុកឆ្អឹងនេះ។

វ័យក្មេង៖ ជំងឺពុកឆ្អឹងដែលកើតមានលើមនុស្សមានវ័យក្មេង គឺជា ជំងឺមិនប្រក្រតី ព្រោះអាចបណ្ដាលមកពីជំងឺផ្សេងៗ ដែលនៅក្នុងខ្លួនហើយវាបណ្ដាលទៅជាជំងឺពុកឆ្អឹង។ ជំងឺដែលនាំឲ្យកើតទៅជាជំងឺពុកឆ្អឹង ដូចជា ជំងឺពក ក បញ្ហាតម្រង់នោម ហើយប៉ះពាល់ដល់អ័រម៉ូន ជាដើម។ អ័រម៉ូននេះគឺជាមូលហេតុចម្បងដែលធ្វើឲ្យកើតជំងឺពុកឆ្អឹងដូចមនុស្សចាស់ដែលអស់រដូវ ព្រោះតែការប្រែប្រួលអ័រម៉ូន។

លម្អិតព័ត៌មានបន្ថែម សូមចុចវីដេអូ ទស្សនាខាងក្រោម៖

Sabay៖ តើស្ត្រី និង បុរស មួយណាប្រឈមនឹងជំងឺពុកឆ្អឹងជាងគេ?

វេជ្ជបណ្ឌិត ម៉េង សុខ៖ តាមការសិក្សារកឃើញថា ស្ត្រីប្រឈមខ្លាំងជាងបុរស។ បុរសតិចតួចបំផុតដែលនឹងប្រឈមនឹងកើតជំងឺពុកឆ្អឹង។ តួលេខ ៨នាក់ គឺមានតែ ១នាក់ ប៉ុណ្ណោះដែលអាចកើតជំងឺពុកឆ្អឹង និយាយរួមគឺតិចតួចបំផុត ហើយបើបុរសកើតជំងឺពុកឆ្អឹងវិញ ច្រើនកើតលើបុរស ដែលកើតដំក្នុងពងស្វាស ហើយត្រូវបានគេកាត់ចោល ដូច្នេះធ្វើឲ្យកង្វះអ័រម៉ូន និង មនុស្សចាស់ដែលមានវ័យចន្លោះពី ៦០ឆ្នាំឡើងទៅ ដែលខុសអំពីស្ត្រី គឺរាប់ចាប់ពីការអស់រដូវ។

Sabay៖ មានការលើកឡើងថា ស្រ្តីដែលកាត់ស្បូនប្រឈមមុខនឹងជំងឺពុកឆ្អឹង។ ហេតុអ្វីគ្រាន់តែកាត់ស្បូនបែរជាពាក់ព័ន្ធនឹងជំងឺពុកឆ្អឹងទៅវិញ?

វេជ្ជបណ្ឌិត ម៉េង សុខ៖ ជាការពិតណាស់ស្ត្រីកាត់ស្បូន គឺប្រឈមខ្ពស់នឹងជំងឺពុកឆ្អឹង ព្រោះការកាត់ស្បូន គេកាត់ទាំងក្រពេញភេទរបស់នារី (អូរវែរទាំងសងខាង)។ អូរវែរ មានតួនាទីបញ្ចេញអ័រម៉ូនភេទ អូស្ត្រូហ្សេន ដែលពីមុនវាបង្កើតនិងបញ្ចេញ នៅពេលយើងកាត់ចោល ដូច្នេះ អូស្រ្ដូហ្សេន នឹងធ្លាក់យ៉ាងគំហុក។ អូស្រ្តូហ្សេន គឺមានតួនាទីសំខាន់ណាស់នៅក្នុងការកសាងឆ្អឹង។ ដើម្បីបង្កើតបានឆ្អឹងមួយគឺមាន ៣ ទី ១ ស្រូប ២ បន្ថែម ឬបង្កើត និង ៣ កែរូបរាងឆ្អឹងឡើងមកវិញ។

លម្អិតព័ត៌មានបន្ថែម សូមចុចវីដេអូ ទស្សនាខាងក្រោម៖

Sabay៖ តើជំងឺពុកឆ្អឹងកើតឡើងដោយសារអ្វី?

វេជ្ជបណ្ឌិត ម៉េង សុខ៖ ជំងឺពុកឆ្អឹងបណ្ដាលមកពីកត្តាមិនប្រែប្រួល និង ប្រែប្រួល

កត្តាមិនប្រែប្រួល

១. មនុស្សចាស់ រាល់មនុស្សចាស់រមែងប្រឈមនឹងជំងឺពុកឆ្អឹង ជាពិសេសស្រ្តីដែលជិតអស់ និង អស់រដូវ
២. ពូជសាសន៍៖ អឺរ៉ុប និង អាស៊ីត្រូវបានគេរកឃើញថា កើតជំងឺពុកឆ្អឹងច្រើន ដោយថា នៅអឺរ៉ុបខ្វះពន្លឺថ្ងៃ ឯនៅអាស៊ីមនុស្សភាគច្រើនមិនចង់ឲ្យប៉ះពាល់ពន្លឺថ្ងៃ ខ្លាចខូចស្បែក ដូច្នេះ ពួកគេស្លៀកពាក់រុំជិតខ្លួន។
៣. តំណពូជ៖ ប្រសិនបើក្នុងគ្រួសារធ្លាប់មានប្រវត្តិពុកឆ្អឹង ដូច្នេះ កូនក៏ប្រឈមបញ្ហានេះដែរ

កត្តាប្រែប្រួល៖

១. អាល់កុល (ស្រាបៀ ស្រា)៖ កាលណាប្រើប្រាស់អាល់កុលច្រើន គឺនឹងធ្វើឲ្យប៉ះពាល់ដល់ដំណើរការនៃអ័រម៉ូន ហើយបញ្ឈប់វីតាមីនមួយចំនួននៅក្នុងថ្លើម វីតាមីនក្នុងថ្លើមអត់គ្រប់គ្រាន់វាជួយឆ្អឹងអត់បាន។
២. បារី៖ បារីប៉ះពាល់ដល់សរសៃឈាមតូច ដែលធ្វើដំណើរការឈាមរត់អត់ល្អ
៣. កង្វះវីតាមីនD៖ មនុស្សមួយចំនួនខ្វះវីតាមីន D និង កង្វះអាហារូបត្ថម្ភ (ហូបចុកអត់គ្រប់គ្រាន់) ក៏ជាបញ្ហាដែលនាំឲ្យប្រឈមនឹងកើតជំងឺពុកឆ្អឹងផងដែរ។
៤. កង្វះការហាត់ប្រាណ៖ អ្នកនៅភ្នំពេញភាគច្រើនមិនសូវហាត់កីឡា ដែលប្រឈមនឹងការកើតជំងឺពុកឆ្អឹង។ អ្នកហាត់ប្រាណភាគច្រើនគឺមានសរសៃឈាមធំៗ ហើយធ្វើឲ្យដំណើរឈាមដើរបានល្អ ស្របនឹងការហូបចុកបានគ្រប់គ្រាន់។
៥. ជំងឺ៖ អ្នកខ្លះមានបញ្ហាហើយបានរុំបង់យូរពេក ដែលធ្វើឲ្យឆ្អឹងមិនដំណើរការ ក៏ជាមូលហេតុមួយផ្នែកនាំឲ្យកើតជំងឺពុកឆ្អឹងដែរ។ ជំងឺរលាកសន្លាក់រ៉ាំរ៉ៃ ដែលពួកគេភាគច្រើនញាំថ្នាំផ្សះច្រើនហើយមិនសូវមានចលនា ក៏ជាដើមហេតុនាំទៅកើតជំងឺពុកឆ្អឹង។

លម្អិតព័ត៌មានបន្ថែម សូមចុចវីដេអូ ទស្សនាខាងក្រោម៖

Sabay៖ តើជំងឺពុកឆ្អឹងមានរោគសញ្ញាឲ្យយើងអាចដឹងបានដែរទេ?

វេជ្ជបណ្ឌិត ម៉េង សុខ៖ តាមការសិក្សាកន្លងមក គឺជំងឺពុកឆ្អឹងពុំមានសញ្ញាណាមួយប្រាប់អំពីរោគសញ្ញានៃជំងឺពុកឆ្អឹងឲ្យយើងបានដឹងនោះទេ វាអាចរកឃើញដោយចៃដន្យនៅពេលពួកគាត់មកមន្ទីរពេទ្យ ហើយមួយទៀតដោយសារតែអ្នកជំងឺមានបញ្ហា គឺគ្រាន់តែដួលបន្តិចបន្តួចក៏បាក់ឆ្អឹង។ ហើយបើរកឃើញដោយសាររោគសញ្ញានៃការឈឺចាប់ឆ្អឹង គឺមិនមាននោះទេ គឺពួកគេអាចរកឃើញជំងឺនេះបាននៅពេលពួកគេបានមកមន្ទីរពេទ្យ និង ផលលំបាកបាក់ឆ្អឹងរួចទៅហើយដូចបាននិយាយខាងលើ។

Sabay៖ តើជំងឺពុកឆ្អឹងអាចការពារបានទេ?

វេជ្ជបណ្ឌិត ម៉េង សុខ៖ ដើម្បីការពារជំងឺពុកឆ្អឹង គឺមនុស្សទាំងឡាយជាពិសេសនារី នៅពេលដឹងថា ខ្លួនចូលចិត្តគ្រឿងអាល់កុល (គ្រឿងស្រវឹង) បារី វ័យចំណាស់ ហើយជិតអស់រដូវ គឺចាំបាច់ត្រូវតាមដាននិងពិនិត្យសុខភាពជាមួយគ្រូពេទ្យជំនាញ ដោយការពិនិត្យឆ្អឹង (ថ្លឹងឆ្អឹង) ឬ ប្រើកាំរស្មី X ដើម្បីថតឆ្អឹងខ្នង ឬ ឆ្អឹងភ្លៅ គេអាចដឹងអំពីបញ្ហាឆ្អឹង ស្ពោត ឬ ពុកឆ្អឹង ជាដើម។ មួយទៀតត្រូវគេងឲ្យបានគ្រប់គ្រាន់ ហាត់ប្រាណឲ្យបានទៀងទាត់ និង ញាំគ្រប់គ្រាន់។

Sabay៖ តើជំងឺពុកឆ្អឹងអាចព្យាបាលបានទេ?

វេជ្ជបណ្ឌិត ម៉េង សុខ៖ ជំងឺពុកឆ្អឹងគេអាចព្យាបាលបាន។ ការព្យាបាលជំងឺពុកឆ្អឹងគឺបែងចែកជាពីរ គឺ ព្យាបាលលើមនុស្សវ័យក្មេង និង មនុស្សចាស់៖

ការព្យាបាលជំងឺពុកឆ្អឹងលើមនុស្សវ័យក្មេង

១. រកមូលហេតុឲ្យឃើញច្បាស់ ហើយព្យាបាលជំងឺដែលនាំឲ្យកើតមានជំងឺពុកឆ្អឹងនោះ។
២. ហាត់ប្រាណឲ្យបានទៀងទាត់ គេងគ្រប់គ្រាន់ និង ញាំគ្រប់គ្រាន់ ព្រមទាំងទាមទារឲ្យត្រូវពន្លឺពេលព្រឹក។

ការព្យាបាលលើមនុស្សចាស់

ការព្យាបាលលើមនុស្សចាស់ គឺពេទ្យនឹងផ្ដល់ថ្នាំជំនួយ និង តម្រូវឲ្យបញ្ឈប់ទម្លាប់ខ្លះដែលនាំឲ្យពុកឆ្អឹង ដូចជា បញ្ឈប់ការញាំគ្រឿងស្រវឹង, ជក់បារី ជាដើម។ មួយទៀតត្រូវញាំ និង គេងឲ្យបានគ្រប់គ្រាន់ ជាពិសេស លំហាត់ប្រាណឲ្យបានទៀងទាត់ គឺចន្លោះពីម៉ោង ៧-៩ ព្រឹក ដើម្បីទទួលបានពន្លឺថ្ងៃល្អសម្រាប់ឆ្អឹង។ ប៉ុន្តែ ការព្យាបាលលើមនុស្សចាស់ គឺទាមទាររយៈពេលយូរ ដោយត្រូវញាំថ្នាំយូរអង្វែង និង តាមដានជាមួយគ្រូពេទ្យឲ្យបានទៀងទាត់។ ចំពោះរយៈពេលនៃការព្យាបាលមិនអាចកំណត់បាននោះទេ អាស្រ័យលើស្ថានភាពជំងឺ និង ការសហការពីអ្នកជំងឺជាមួយគ្រូពេទ្យជំនាញ៕

លម្អិតព័ត៌មានបន្ថែម សូមចុចវីដេអូ ទស្សនាខាងក្រោម៖