រឿងមិនពិត ៣ នេះ ល្មមឈប់ជឿទៅ
- 2020-02-27 10:09:28
- ចំនួនមតិ 0 | ចំនួនចែករំលែក 0
រឿងមិនពិត ៣ នេះ ល្មមឈប់ជឿទៅ
ចន្លោះមិនឃើញ
ពាក់ព័ន្ធនឹងការប្រើប្រាស់ប្រេងឥន្ធនៈយានយន្ត មានការយល់ឃើញជាច្រើនដែលគេនិយាយតៗគ្នា ដោយគិតថាវាជារឿងពិត។ ផ្ទុយទៅវិញមានការយល់ឃើញមួយចំនួនគ្រាន់តែជាពាក្យនិយាយតៗគ្នា ហើយបច្ចុប្បន្នបានក្លាយជារឿងគ្មានបានការ។ ការយល់ឃើញទាំងនោះមានដូចជា ៖
១. រថយន្តកាន់តែចាស់ស៊ីសាំងកាន់តែច្រើនជាងមុន
ប្រសិនបើមិនថែទាំរថយន្តឲ្យបានល្អទេនោះ ពិតណាស់សមត្ថភាពរថយន្ត រួមសមត្ថភាពសន្សំសំចៃរបស់ម៉ាស៊ីនរថយន្តក៏ថយចុះទៅតាមហ្នឹងដែរ។ ប៉ុន្តែប្រសិនបើអ្នកថែទាំ និងត្រួតពិនិត្យរថយន្តបានទៀតទាត់ និងជួសជុលកន្លែងដែលត្រូវជួសជុល នោះអ្នកនឹងមិនឃើញថារថយន្តរបស់អ្នកស៊ីប្រេងឥន្ធនៈច្រើនជាងមុននោះទេ។ ទន្ទឹមនឹងនេះដែរកន្លែងដែលអ្នកត្រូវត្រួតពិនិត្យពេលរថយន្តកាន់តែចាស់ មានដូចជាប៊ិចសាំង, Sensor វាស់កម្រិតអុកស៊ីហ្សែន, ប៊ូស៊ី, ខ្សែប៊ូស៊ី និងពិនិត្យលើគម្របប្រេងឥន្ធនៈផងដែរ៕
២. រថយន្តប្រើលេខដៃ ស៊ីសាំងតិចជាងរថយន្តលេងអូតូ
រាប់សិបឆ្នាំមុនជម្រើសនៃប្រអប់លេខរថយន្តមាន លេខដៃ ៥ វគ្គ ឬ លេខស្វ័យប្រវត្តិ ៣ វគ្គ។ រថយន្តប្រើប្រអប់លេខដៃស៊ីសាំងតិចក៏ដោយសារតែអ្នកបើកបរមានជំនាញ អាចគ្រប់គ្រងម៉ាស៊ីនរថយន្តតាមការប្ដូរលេខ។ ប៉ុន្តែបច្ចេកវិទ្យាទំនើបបច្ចុប្បន្ន ជួយឲ្យប្រអប់លេខស្វ័យប្រវត្តិមានសមត្ថភាព និងសន្សំសំចៃប្រេងឥន្ធនៈជាង អ្នកបើកបររថយន្តលេខដៃដែលមានជំនាញទៅទៀត។
៣. ចាក់ប្រេងឥន្ធនៈពេលមេឃត្រជាក់ចំណេញបានប្រេងឥន្ធនៈច្រើន
ក្រុមការងារ Sabay ធ្លាប់បកស្រាយម្ដងរួចមកហើយថា ស្ថានីយប្រេងឥន្ធនៈភាគច្រើនរក្សាទុកប្រេងឥន្ធនៈនៅក្រោមដី ហេតុទោះបីជាសីតុណ្ហភាពខាងក្រៅក្ដៅ ឬ ត្រជាក់យ៉ាងណាក៏វាមិនប៉ះពាល់ដល់ប្រេងឥន្ធនៈនៅក្រោមដីខ្លាំងអីណាស់ណាទេ។ ដោយសារចំណុចនេះ ធ្វើឲ្យកម្រិតចំណេញដែលអ្នកទទួលបានគឺតិចមែនទែន។ ដូចនេះបើយានយន្តអ្នក អស់ប្រេងឥន្ធនៈនៅពេលថ្ងៃហើយ មិនចាំបាច់ចាំដល់ល្ងាច ឬ ដល់ព្រឹកស្អែកសឹមចាក់បំពេញនោះទេ។