ពិតអត់ ចាក់សាំងពេលព្រឹក ចំណេញជាងពេលថ្ងៃ?

2017-07-11 23:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មានមតិជាច្រើនលើកឡើងដូចៗគ្នាថាការចាក់បំពេញប្រេងឥន្ធនៈនាពេលព្រឹក ឬ ពេលល្ងាច (ពេលមេឃត្រជាក់) ចំណេញជាងការចាក់ពេលថ្ងៃ (ពេលអាកាសធាតុក្ដៅ)។ នេះដោយសារប្រេងឥន្ធនៈដូចជាវត្ថុរាវដទៃទៀតដែរ ដោយរីកមាឌពេលត្រូវកម្ដៅ។ ហេតុបើតាមទ្រឹស្ដីនេះប្រេងឥន្ធនៈនឹងមានភាពខាប់ខ្លាំងនៅពេលព្រឹកត្រជាក់ៗ ដែលមានន័យថាអ្នកអាចទទួលបានប្រេងឥន្ធនៈបានច្រើនជាងពេលចាក់ពេលថ្ងៃ។

ទ្រឹស្ដីខាងលើជាការពិត ប៉ុន្តែការណែនាំខាងលើមិនមានប្រយោជន៍ប៉ុន្មានឡើយ។ ប្រេងឥន្ធនៈពិតជារីកមាឌ ឬ រួមមាឌតិចតួចទៅតាមសីតុណ្ហភាពមែន។ ពេលប្រេងឥន្ធនៈឡើងសីតុណ្ហភាពពី ១៤ ទៅ ២៤ អង្សាសេ វារីកមាឌចំនួន ១% ស្របពេលដែលថាមពលនៅកម្រិតដដែល។ ប៉ុន្តែស្ថានីយប្រេងឥន្ធនៈជាធម្មតារក្សាទុកប្រេងឥន្ធនៈនៅក្នុងស៊ីទែនបង្កប់ក្រោមដី ដោយសីតុណ្ហភាពក្នុងស៊ីទែនមិនមានការប្រែប្រួលខ្លាំងដូចសីតុណ្ហភាពខាងក្រៅឡើយ។

Craig Eerkes អតីតនាយកក្រុមហ៊ុនប្រេងឥន្ធនៈ Petroleum Marketers Association of America លើកឡើងថាការរីកមាឌ និង រួមមាឌនៃប្រេងឥន្ធនៈទៅតាមសីតុណ្ហភាព ចំពោះអតិថិជនគឺពិតជាមានកម្រិតតិចតួចមែនទែនដែលសឹងមិនអាចចាត់ទុកថាវាបានរីកមាឌ ឬ រួមមាឌនោះទេ។

សរុបមកការយល់ឃើញថាចាក់ប្រេងឥន្ធនៈពេលព្រឹកចំណេញជាងការចាក់ពេលថ្ងៃមិនមែនជាការយល់ខុសនោះទេ ប៉ុន្តែត្រូវដឹងថាកម្រិតនៃការចំណេញគឺតិចមែនទែន ឬ ស្ទើរគ្មានតែម្ដង។ ដូចនេះប្រសិនបើរថយន្ត ឬ ម៉ូតូរបស់អ្នកអស់ប្រេងឥន្ធនៈនៅពេលថ្ងៃហើយ មិនចាំបាច់ចាំដល់ល្ងាច ឬ ដល់ព្រឹកស្អែកសឹមចាក់បំពេញនោះទេ៕

ទទួលបានព័ត៌មានថ្មីៗ គន្លឹះមានប្រយោជន៍រួមទាំងចំណេះដឹងផ្សេងៗពីបច្ចេកវិទ្យា កុំភ្លេចចុច Like Page Sabay News Technology...

ចុចអាន៖

ប្រភព៖ ConsumerReports ប្រែសម្រួល៖ សុខហេង