CNC ប្រកាសបើកសង្វៀនថ្មីដណ្ដើមប្រាក់លានមួយទៀតរៀងរាល់រសៀលថ្ងៃអាទិត្យ

2020-06-01 10:25:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថានីយទូរទស្សន៍ CNC ព្រឹកមិញនេះ ប្រកាសបើកសង្វៀនប្រដាល់ថ្មី១កម្មវិធីទៀតហើយផ្ដល់ឱកាសឲ្យកីឡាករឆ្នើមៗនៅកម្ពុជាដណ្ដើមប្រាក់លានរៀងរាល់រសៀលថ្ងៃអាទិត្យចាប់ពីម៉ោង ២កន្លះតទៅ។

សង្វៀនថ្មី

លោក ម៉ុល រ៉ាស៊ី តំណាងទូរទស្សន៍ CNC បានឲ្យដឹងថាកម្មវិធីថ្មី **«អាឡិចហ្សង់ដែនដីប្រយុទ្ធគុនខ្មែរ»** នេះនឹងរៀបចំឲ្យមានកីឡាករ១០រូបត្រូវនិង៥គូប្រកួតរៀងរាល់សប្ដាហ៍។ ក្នុងចំណោម៥គូនេះគឺមានគូពិសេសដែលត្រូវប្រកួតដណ្ដើមប្រាក់លានបន្ថែមបូកពីលើតម្លៃខ្លួនដែលមានស្រាប់។

តំណាងទូរទស្សន៍ខាងលើបន្តលើកឡើងទៀតថា លោកជឿជាក់នេះជាឱកាសពិសេសសម្រាប់កីឡាករគ្រប់រូបពង្រឹងសមត្ថភាព បទពិសោធបន្ថែមលើសង្វៀនប្រដាល់គុនខ្មែរថ្មីខាងលើដើម្បីឈានទៅរកភាពជោគជ័យក្នុងអាជីពរបស់ខ្លួន។

ទិដ្ឋភាពព្រឹកមិញ

ទន្ទឹមនិងនេះលោកក៏បានសំណូមពរដល់សហព័ន្ធបន្តពង្រឹងសមត្ថភាពបច្ចេកទេស គណៈកម្មការចៅក្រម អាជ្ញាកណ្ដាល គណៈវិនិច្ឆ័យដើម្បីរក្សាគោលជំហរយុត្តិធម៌ពិតប្រាកដ។ ខាងស្ថានីយក៏ថ្លែងអំណរគុណដល់សហព័ន្ធប្រដាល់គុនខ្មែរផងដែរដែលតែងតែសហការ និងឆ្លើយតបដល់ការស្នើសុំផ្សេងកន្លង។

ទិដ្ឋភាពព្រឹកមិញ

បញ្ជាក់ដែរថា កម្មវិធីប្រដាល់ថ្មី «អាឡិចហ្សង់ដែនដីប្រយុទ្ធគុនខ្មែរ» របស់សង្វៀន CNC នេះនឹងចាប់ផ្ដើមការប្រកួតរបស់ខ្លួនពីថ្ងៃអាទិត្យសប្ដាហ៍ហើយវេលាម៉ោង ២កន្លះតទៅ៕

អត្ថបទ៖ នួន ស៊ីណា