CAMSOC បន្តកិច្ចប្រជុំផ្ដោតលើ២ចំណុច និមិត្តសញ្ញា បាវចនា ស៊ីហ្គេម និងការរៀបចំអាស៊ានប៉ារ៉ាហ្គេម

2020-06-17 03:10:33
ចំនួនមតិ 0 | ចំនួនចែករំលែក 0

ចន្លោះមិនឃើញ

គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ហៅកាត់ថា CAMSOC ប្រជុំប្រចាំសប្ដាហ៍នេះគឺផ្ដោតលើ២ចំណុចធំៗ គឺស្លាកសញ្ញា (Logo) កែសម្រួលលើនិមិត្តសញ្ញា (Mascot) និងការរៀបចំអាស៊ានប៉ារ៉ាហ្គេម លើកទី១២ ឆ្នាំ២០២៣។

រូបភាពរបស់ Cambodia SEA GAMES 2023

ឯកឧត្ដម វ៉ាត់ ចំរើន អគ្គលេខាធិការ CAMSOC បានឲ្យដឹងថា ២ចំណុចដែលត្រូវបានលើកឡើងមកប្រជុំនេះទី១៖ គឺការត្រួតពិនិត្យចុងក្រោយទៅលើស្លាកសញ្ញា (Logo) និងកែសម្រួលលើនិមិត្តសញ្ញា (Mascot) ក៏ដូចជាកែសម្រួលលើពាក្យស្លោក ឬបាវចនា ស៊ីហ្គេម ឆ្នាំ២០២៣។ អ្នកជំនាញខាងកីឡារូបនេះលើកឡើងទៀតថា ក្រោយពីបានពិនិត្យពិចារណាទៅលើស្លាកសញ្ញា និមិត្តសញ្ញា និងបាវចនានេះគឺដើម្បីធ្វើយ៉ាងណាឲ្យទស្សនាទាននៃស៊ីហ្គេម ឆ្នាំ២០២៣ របស់កម្ពុជាមានភាពទូលំទូលាយទទួលយកបានទាំងបណ្ដាប្រទេសអាស៊ានទាំងអស់ (១១ប្រទេសរួមទាំងម្ចាស់ផ្ទះកម្ពុជា)។

រូបភាពរបស់ Cambodia SEA GAMES 2023

ចំពោះចំណុចទី២៖ គឺពិនិត្យពិភាក្សាគ្នាលើការរៀបចំទទួលធ្វើម្ចាស់ផ្ទះអាស៊ានប៉ារ៉ាហ្គេម (កីឡាជនពិការ) លើកទី១២ ឆ្នាំ២០២៣ ក្រោយបញ្ចប់ ស៊ីហ្គេម ដោយបានធ្វើពង្រាងកាលបរិច្ឆេទ យកថ្ងៃទី១ដល់ថ្ងៃទី១០ ខែមិថុនា។ ម្យ៉ាងទៀត CAMSOC និង NPCC បានពិនិត្យរួមគ្នាអំពីស្លាកសញ្ញា និមិត្តសញ្ញា បាវចនា ដោយគ្រាន់តែផ្លាស់ប្ដូរបន្តិចបន្តួចទៅតាមរបៀប និងបច្ចេកទេសរបស់ជនពិការ។ ចំពោះពិធីបើក-បិទ គឺកិច្ចប្រជុំបានពិភាក្សាគ្នាធ្វើដោយឡែកពីគ្នា ប៉ុន្តែការរត់ភ្លើងគប់ គឺធ្វើរួមគ្នាតែមួយជាមួយស៊ីហ្គេមដែរ។ ទាំងអស់នេះគឺជាអ្វីដែលបានធ្វើការរួមគ្នា ដោយឲ្យគណៈកម្មការជំនាញទាំង១៤នៃ CAMSOC បញ្ចូលអំពីការរៀបចំការប្រកួតអាស៊ានប៉ារ៉ាហ្គេម និងបញ្ជូលសកម្មភាពការងារនានាក្នុងដំណើរឆ្ពោះទៅទទួលរៀបចំរបស់អាស៊ានប៉ារ៉ាហ្គេម លើកទី១២ ឆ្នាំ២០២៣ របស់កម្ពុជាផងដែរ។

រូបភាពរបស់ Cambodia SEA GAMES 2023

រំលឹកដែរថា កម្ពុជានឹងទទួលរៀបចំធ្វើជាម្ចាស់ផ្ទះកីឡាស៊ីហ្គេម លើកទី៣២ នៅ ឆ្នាំ២០២៣ នឹងបន្តរៀបចំអាស៊ានប៉ារ៉ាហ្គេម (កីឡាជនពិការ) លើកទី១២ នាពេលបន្ទាប់ពីបញ្ចប់កម្មវិធីនេះផងដែរ។ ចំពោះកិច្ចប្រជុំរបស់ CAMSOC សប្ដាហ៍នេះគឺធ្វើឡើងកាលពីថ្ងៃទី១៥ ខែមិថុនា ឆ្នាំ២០២០ នៅ NOCC ៕