រឿងរ៉ាវនារីបរទេស ដែលស្រមៃចង់ក្លាយជាតារានៅកូរ៉េ តែត្រូវធ្លាក់ខ្លួនជាទាសករផ្លូវភេទ

2020-06-18 03:44:51
ចំនួនមតិ 0 | ចំនួនចែករំលែក 0

ចន្លោះមិនឃើញ

សារព័ត៌មានកម្សាន្តរបស់កូរ៉េ Koreaboo ធ្លាប់ផ្សាយថា ជារៀងរាល់ឆ្នាំ មានជនបរទេសប្រមាណ ៤៥០០នាក់ ចូលប្រទេសកូរ៉េខាងត្បូងជាមួយទិដ្ឋាការការកម្សាន្ត (Entertainment Visa) និងមានក្ដីស្រមៃចង់ក្លាយជាតារាចម្រៀងអាជីព។ ប៉ុន្តែនារីចំនួន ៧០% ដែលមកជាមួយទិដ្ឋាការនេះ បែរក្លាយទៅជាជនរងគ្រោះនៃការរំលោភបំពានផ្លូវភេទ និងជាច្រើននាក់ទៀត បានធ្លាក់ទៅជាទាសករការជួញដូរផ្លូវភេទ។

ទិដ្ឋាការដ៏ល្បីឈ្មោះមួយគឺ E-6 Entertainment Visa បានអនុញ្ញាតឲ្យជនបរទេស ដូចជា អ្នកចម្រៀង អ្នករាំ ដ៏ដូចជាអត្តពលិកមកប្រទេសកូរ៉េ អាចធ្វើការក្នុងក្លឹប សណ្ឋាគារ និងរង្គសាល។

Tesse Aquino អាយុ ៣១ឆ្នាំ ដែលបានចាកចេញពីប្រទេសហ្វីលីពីន ដើម្បីចង់បំពេញក្ដីសុបិនក្លាយជាតារាចម្រៀង បានចែករំលែកបទពិសោធន៍របស់ខ្លួនថា ពេលនាងមកដល់ប្រទេសកូរ៉េដំបូង នាងធ្វើការនៅក្លឹបមួយកន្លែងនៅជិតមូលដ្ឋានកងទ័ពអាមេរិក។ នាងគិតថានឹងមានការងារពេញម៉ោងជាអ្នកចម្រៀងនៅក្លឹបនោះ ប៉ុន្តែចៅហ្វាយថ្មីរបស់នាងដែលបុគ្គលិកគ្រប់គ្នាហៅថា “Papa” បានបង្ខំនាងស្លៀកពាក់លេចលើលេចក្រោម និងឲ្យនាងចេះបញ្ចុះបញ្ចូលភ្ញៀវឲ្យចំណាយលុយកាន់តែច្រើនលើការផឹកស៊ី។

រូបតំណាង (រូបភាពពី Nextshark

Aquino និងមិត្តរួមការងារផ្សេងទៀត ត្រូវធ្វើការ ១២ម៉ោងក្នុងមួយថ្ងៃ និងស៊ូទ្រាំនឹងរឿងមិនសប្បាយចិត្តជាច្រើននៅពេលនោះ។ ពួកនាងត្រូវភ្ញៀវលូកលាន់ដោយគឃ្លើន ហើយពួកគេមិនអាចធ្វើអ្វីបានទាំងអស់។ លើសពីនេះ ប្រសិនបើពួកនាងមិនអាចរកប្រាក់បាន ៦៦០ ០០០វ៉ុន (ប្រហែល ៥៩៧ដុល្លារ) ប្រចាំសប្ដាហ៍តាមការកំណត់ ពួកនាងត្រូវរងពិន័យ មានន័យថា ត្រូវបង្ខំចិត្តបម្រើផ្លូវភេទជាមួយភ្ញៀវខាងក្រៅ។

នេះគ្រាន់ជាករណីមួយក្នុងចំណោមច្រើនករណី ដែលជនបរទេសកាន់វីហ្សាកម្សាន្ត ត្រូវធ្លាក់ខ្លួនជាទាសករផ្លូវភេទនៅកូរ៉េ។ ពួកគេជាច្រើននាក់ បាបប្តឹងអតីតថៅកែរបស់ពួកគេដែលបានកេងប្រវ័ញ្ចនាពេលកន្លងមក។ យ៉ាងណាក្ដី មេធាវីរបស់ក្រុមនារីរងគ្រោះទាំងនោះ ធ្លាប់បានឲ្យដឹងថា ចំណាត់ការរំលោភបំពានមកលើពួកគេនៅខ្សោយ ដោយសារខាងមន្ត្រីអន្តោប្រវេសន៍កូរ៉េចាត់ទុកពួកគេជាជនអន្តោប្រវេសន៍ខុសច្បាប់ ជាជាងជនរងគ្រោះដោយការរំលោភបំពានផ្លូវភេទ។

តាមការប៉ាន់ប្រមាណមនុស្សប្រហែលជា ៩៣ ៧០០នាក់ កំពុងជាប់ក្នុងទាសភាពសម័យទំនើប ហើយកូរ៉េស្ថិតនៅលេខ៤៩ ក្នុងចំណោមប្រទេសចំនួន ១៦៧ នៅលើពិភពលោកដែលជួបបញ្ហាបែបនេះ៕