ណូវែលហ្សឺឡង់ បាននិយាយកាលពីថ្ងៃសៅរ៍ថា ការផ្ទុះថ្មី​ នៃវីរុសកូរ៉ូណាបានពន្យារពេលការចាប់ផ្តើម នៃការប្រកួតបាល់ឱបស្ត្រី នៅប្រទេសណូវែលហ្សឺឡង់ យ៉ាងហោចណាស់ពីរសប្តាហ៍។

រដ្ឋាភិបាលណូវែលហ្សឺឡង់ បានដាក់ទីក្រុងអាក់ឡែនចូលទៅក្នុងតំបន់ហាមឃាត់ និងការរឹតត្បិតកាន់តែខ្លាំងឡើងៗ នៅទូទាំងប្រទេស កាលពីថ្ងៃពុធ បន្ទាប់ពីការផ្ទុះករណីថ្មីកើតឡើងនៅកណ្តាលទីក្រុងធំបំផុតរបស់ប្រទេសនេះ។

ការរឹតត្បឹតនេះបានបង្ខំឱ្យលុបចោលការប្រកួតចុងក្រោយ ដែលបានគ្រោងទុក នៃការប្រកួត Super Rugby Aotearoa របស់បុរសនៅឯឧទ្យាន Eden Park កាលពីថ្ងៃអាទិត្យ និង NZR បាននិយាយថា ការប្រកួតតាមខេត្តរបស់ស្ត្រី​ ដែលគ្រោងនឹងចាប់ផ្តើមនៅថ្ងៃទី ២២ ខែសីហា ក៏នឹងរងផលប៉ះពាល់ផងដែរ។

ប្រទេសណូវែលហ្សឺឡង់ បានរកឃើញមេរោគកូវីដ១៩ សរុបចំនួន ១,៦០៩ករណី និងព្យាបាលជាសះស្បើយសរុប ១,៥៣១នាក់ និងមានអ្នកស្លាប់សរុបចំនួន២២នាក់ គិតត្រឹមព្រឹកថ្ងៃទី១៥ ខែសីហា ឆ្នាំ២០២០៕

ប្រភព៖ CNA   ប្រែ​សម្រួល៖ ប៊ិន ប៊ុណ្ណា