តារាចម្រៀងខ្មែរជាប់លេខ១នៅអូស្ត្រាលី លើកគ្នាមកថត MV នៅកម្ពុជាចុងខែនេះហើយ!
- 2020-09-10 03:23:33
- ចំនួនមតិ 0 | ចំនួនចែករំលែក 0
តារាចម្រៀងខ្មែរជាប់លេខ១នៅអូស្ត្រាលី លើកគ្នាមកថត MV នៅកម្ពុជាចុងខែនេះហើយ!
ចន្លោះមិនឃើញ
លោក ឱ សាទិត្យា គឺជាតារាចម្រៀងឯករាជ្យមួយរូបនៅអូស្ត្រាលីដែលបាន និងកំពុងពេញនិយមទាំងនៅអូស្ត្រាលី និងអាមេរិកនោះ ឥឡូវនេះបានឲ្យតម្រុយថា លោកនឹងចុះមកថតស្រុកខ្មែរនៅចុងខែនេះ។
នេះគឺជាសកម្មភាពសិល្បៈដំបូងបំផុតរបស់លោកនៅលើទឹកដីប្រទេសកំណើតចាប់តាំងពីលោកបានចាកចេញទៅរស់នៅប្រទេសអូស្រ្តាលីតាំងពីតូចក្រូចឆ្មា និងពិសេសគឺចាប់តាំងពីលោកបានហក់មកប្រឡូកសិល្បៈ ចម្រៀងទៅតាមនិស្ស័យ ក៏ដូចជាបេះដូងសិល្បៈរបស់លោកប្រមាណជាជាង ៣ឆ្នាំមកនេះ។
ឱ សាទិត្យា មានស្រុកកំណើតនៅក្នុងខេត្តបាត់ដំបង តែលោកត្រូវឪពុកម្ដាយនាំចេញទៅរស់នៅប្រទេសអូស្ត្រាលីតាំងពីតូចៗ ជាហេតុធ្វើឲ្យលោកមានសញ្ជាតិពីរ គឺខ្មែរ-អូស្ត្រាលី ។ បច្ចុប្បន្នលោក គឺជាតារាចម្រៀង និងជាអ្នកនិពន្ធបទចម្រៀងពេញនិយមមួយរូបក្នុងសហគមន៍ខ្មែរនៅអូស្ត្រាលី។ សាទីយ៉ា បានហក់ចូលក្នុងសិល្បៈចម្រៀងតាមរយៈការប្រឡងចម្រៀងក្នុងកម្មវិធីមួយនៅទីក្រុងស៊ីដនីក្នុងឆ្នាំ ២០០៥ ហើយពេលនោះ លោកបានគ្រងជយលាភីលេខ១។
២ឆ្នាំបន្ទាប់ លោកក៏បានចាប់ផ្ដើមអាជីពសិល្បៈរបស់លោកជាមួយជំនាញហ្គីតា ហើយបន្តបន្ទាប់ក៏បន្តវិវត្តខ្លួនមកជាអ្នកនិពន្ធថែមទៀត។ ដើម្បីអភិវឌ្ឍខ្លួនឯងក្នុងវិស័យនេះឲ្យកាន់តែប្រសើរ រហូតដល់បានការពេញនិយម សាទិយ៉ា តែងស្ដាប់ និងសិក្សាអំពីការប្រើប្រាស់សំឡេងរបស់វីរសិល្បករល្បីៗជំនាន់មុនដូចជា អធិរាជសំឡេងមាស ស៊ីន ស៊ីសាមុត រស់ សិរីសុទ្ធា ហ៊ួយ មាស ជាដើម។
មកទល់បច្ចុប្បន្នលោកមានបទ Original ផ្ទាល់ខ្លួន និងបទចម្រៀង Cover របស់វីរសិល្បករ សិល្បកររៀមច្បងជាច្រើន ដូចជាបទ "យប់មិញបងផឹក" “ស្នេហ៍ក្នុងសុបិន” "គូព្រេងអ្នកណា" និងបទ " លួចស្នេហ៍ដួងច័ន្ទ" ជាដើម។ តាមរយៈសំឡេងស្រួយ ស្រឡះរបស់លោក នាំឲ្យលោកទទួលបានការគាំទ្រជាច្រើន ពិសេសនៅអូស្ត្រាលី និងបណ្ដាប្រទេសនៅលោកខាងលិច ដែលមានសហគមន៍ខ្មែររស់នៅ។ នេះបើតាមកញ្ញា Sun Malis Michelle ហៅ Michelle អ្នកតំណាង។
“គាត់ត្រូវបានគេអញ្ជើញទៅចូលរួមកម្មវិធីជាច្រើននៅសហរដ្ឋអាមេរិក កាណាដា ជាដើម ប៉ុន្តែគាត់មិនដែលបានចុះមកធ្វើសកម្មភាពសិល្បៈដូចគ្នាទៅស្រុកខ្មែរទេ អីចឹងហើយ គាត់នឹងចុះមកស្រុកខ្មែរឆាប់ៗនេះហើយ!”។ ឱ សាទិត្យា នឹងចុះមកកម្ពុជាដើម្បីថតវីដេអូចម្រៀងជាច្រើន នៅថ្ងៃទី ២៤ ខែកញ្ញានេះ។ ធ្វើបែបនេះ តាមកញ្ញា ខូវី គឺលោកចង់ភ្ជាប់អនុស្សាវរីយ៍ជាមួយទឹកដីប្រទេសកំណើត និងក៏ចង់នាំយកទិដ្ឋភាពស្អាតៗជាច្រើនរបស់កម្ពុជាទៅបង្ហាញពិភពលោកដែរ។
យ៉ាងណាក៏ដោយ មិនទាន់មានព័ត៌មានជាក់លាក់ថា លោកនឹងចុះទៅថតកន្លែងណាខ្លះនោះទេ ត្បិតថា មកលើកនេះ សាទិត្យា នាំយកបទចម្រៀងច្រើនណាស់មកថតនៅលើទឹកដីព្រះរាជាណាចក្រកម្ពុជា៕