រម្លឹកពីឪពុក Z.Tao យំមួយរំពេច ព្រោះស្ដាយមិនបាននៅថែឲ្យបានដិតដល់ ដល់ដង្ហើមចុងក្រោយ

2021-07-12 05:51:04
ចំនួនមតិ 0 | ចំនួនចែករំលែក 0

ចន្លោះមិនឃើញ

Huang Zitao បានសម្រក់ទឹកភ្នែកកណ្ដាលកម្មវិធី ពេលរម្លឹកដល់ឪពុកដែលបានចែកស្ថានទៅកាលពីថ្ងៃទី១១ ខែកញ្ញា ឆ្នាំ២០២០។

ក្នុងភាគថ្មីនៃកម្មវិធី "The Detectives’ Adventures” Huang Zitao បានបង្ហើបរឿងពិតមួយថា ខ្លួនពិតជាមិនបានដឹងពីស្ថានភាពជំងឺរបស់ឪពុកទេពីដំបូង ហើយមកដល់ពេលនេះលោកពិតជាមានអារម្មណ៍សោកស្ដាយខ្លាំងដែលមិនអាចមើលថែ និងយកចិត្តទុកដាក់ឲ្យបានដិតដល់ចំពោះឪពុក។

លោកថា៖ «ពេលនោះខ្ញុំកំពុងជាប់ថតកម្មវិធី ប៉ាខ្ញុំដឹងខ្លួនគាត់ឈឺខ្ទង់មួយឆ្នាំហើយ ប៉ុន្តែគាត់អត់បានប្រាប់ម៉ាក់ និងខ្ញុំឲ្យដឹងទេ។ ខ្ញុំបានទូរសព្ទទៅប៉ា ហើយសួរគាត់ថាហេតុអ្វីគាត់អត់លើកអ៊ីចឹង? ទាំងដែលពេលនោះ ប៉ារបស់ខ្ញុំកំពុងស្ថិតនៅក្នុងមន្ទីរពេទ្យ និងអត់ទ្រាំពេញទំហឹង ប៉ុន្តែគាត់បានតបថា "ប៉ាអត់អីទេ ប៉ាសុខសប្បាយធម្មតាទេតើ" មុនប៉ាខ្ញុំចែកឋាន ខួរក្បាលរបស់គាត់មានកកសរសៃឈាម ខ្ញុំមិនទាំងមានឱកាសបានជួបនិយាយជាមួយនឹងគាត់ផ្ទាល់ជាលើកចុងក្រោយផង។ តាមទូរសព្ទមុនគាត់នៅមិនទាន់អី គាត់បានប្រាប់ខ្ញុំថា "កូនប្រុស ប៉ាមិនអីទេ ប៉ាបានត្រៀមគ្រប់យ៉ាងសម្រាប់កូនអស់ហើយ កុំបារម្ភពីប៉ាអីណា៎ ថតកម្មវិធីឲ្យបានល្អ!” ហើយសូម្បីម៉ាក់ខ្ញុំក៏អត់បានប្រាប់ខ្ញុំពីរឿងនេះដែរដំបូង»។

Z.Tao នៅបាននិយាយទៀតថា៖ «ខ្ញុំមានអារម្មណ៍ថាខ្លួនបីដូចកូនក្មេងអ៊ីចឹង យើងគួរតែរៀនយល់ឲ្យបានច្រើន ពីរស់នៅបែបដូចមនុស្សធំ។ ខ្ញុំមានអារម្មណ៍ថា វាជារឿងសំខាន់ អ៊ីចឹងហើយបានជាខ្ញុំស្ដាយក្រោយខ្លាំងបែបនេះ ខ្ញុំតែងតែគិតថា ខ្ញុំស្រឡាញ់ប៉ាម៉ាក់ខ្ញុំខ្លាំង ខ្ញុំតែងគិតថាខ្លួនឯងធ្វើបានល្អហើយ ខ្ញុំចង់ប្រាប់ប៉ាម៉ាក់ថា "កូនស្រឡាញ់ប៉ាម៉ាក់រាល់ៗថ្ងៃ កូននឹកប៉ាម៉ាក់រាល់ថ្ងៃ" ខ្ញុំចង់ផ្ញើសារទៅកាន់អ្នកទាំង ២ក្រោយពេលខ្ញុំងើបពីដេករាល់ថ្ងៃ ប៉ុន្តែខ្ញុំមិនដឹងថា តើលោកទាំង ២រស់នៅបែបណាទេ ពេលខ្ញុំមិនបាននៅជិត។ គ្រប់យ៉ាងដែលយើងដឹង តាមរយៈទូរសព្ទពេលខ្លះអាចជារឿងមិនពិតដូចជួបផ្ទាល់»។

នេះជារឿងដែល Z.Tao លាក់ទុកក្នុងចិត្ត ហើយទើបទម្លាយពេលនេះ រហូតលោកមិនអាចទប់ទឹកភ្នែកជាប់ពេលនិយាយចេញមក។ អ្វីដែលលោកនិយាយពេលនេះ ក៏សង្ឃឹមថាជាមេរៀន និងសង្ឃឹមថាគ្រប់គ្នាចំណាយរស់នៅជាមួយនឹងគ្រួសារឲ្យបានល្អ និងមានតែក្ដីសុខ៕

ប្រភព៖ Dramapanda

អត្ថបទ៖ យី សុធារី