សមាគមចុងភៅកម្ពុជា មានមោទនភាពដែលខ្មែរយើង មានកសិដ្ឋានកែច្នៃទឹកដោះគោដោយខ្លួនឯង

2022-02-22 02:06:37
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្រុកបាទី៖ ប្រធានសមាគមសហគមន៍ចុងភៅកម្ពុជា រួមទាំងសមាជិក បានសម្តែងនូវមោទនភាព និងការកោតសរសើរ ក្រោយពីបានមើលឃើញដោយផ្ទាល់ភ្នែកថា កម្ពុជា មានកសិដ្ឋានចិញ្ចឹម និងកែច្នៃទឹកដោះគោ ប្រកបដោយស្តង់ដារ និងទំនើប ដោយខ្លួនឯង ដូចជា គិរីសួគ៌ ដែលមានទីតាំងស្ថិតនៅជើងភ្នំតាម៉ៅ ស្រុកបាទី ខេត្តតាកែវ។

មេចុងភៅ សុង តេង ប្រធានសមាគមសហគមន៍ចុងភៅកម្ពុជា ដែលរួមដំណើរជាសមាជិកចំនួន៤៤នាក់ផ្សេងទៀត បាននិយាយថា លោកមានការប្លែកអារម្មណ៍យ៉ាងខ្លាំង នៅពេលធ្វើដំណើរទៅដល់កសិដ្ឋានចិញ្ចឹម និងកែច្នៃទឹកដោះគោ គិរីសួគ៌ លើផ្ទៃដីដ៏ធំទូលាយ ដើម្បីបំពេញដំណើរទស្សនាកិច្ចរយៈពេលមួយថ្ងៃពេញ កាលពីថ្ងៃសៅរ៍ ទី១៩ ខែកុម្ភៈ ឆ្នាំ២០២២។

មេចុងភៅរូបនេះ បានប្រាប់ Sabay ថា៖ «នេះជាលើកទីមួយហើយដែលសមាគមសហគមន៍ចុងភៅកម្ពុជា បានមកធ្វើទស្សនកិច្ចកសិដ្ឋានចិញ្ចឹមគោ និងមើលឃើញពីដំណើរការនៃការចិញ្ចឹម ការយកទឹកដោះគោ និងដំណើរការនៃការកែច្នៃទឹកដោះគោ។ នេះគឺជារឿងដ៏គួរឲ្យមានមោទនភាពដែលប្រទេសជាតិយើងមានកសិដ្ឋានចិញ្ចឹមគោយកទឹកដោះប្រកបដោយស្តង់ដារបែបនេះ»។

លោកបានបន្ថែមទៀតថា៖ «ទាំងខ្ញុំផ្ទាល់ និងសមាជិករបស់យើង ពិតជាប្លែកអារម្មណ៍ពេលបានមកមើលឃើញដោយផ្ទាល់ភ្នែកពីរបៀបចិញ្ចឹមគោយកទឹកដោះ ក៏ដូចជាដំណើរការនៃការកែច្នៃ ដែលនេះគឺជារឿងគួរជាទីមោទនៈដែលកម្ពុជាយើង មានកសិដ្ឋានដ៏ធំបែបនេះ»។

ក្នុងដំណើរទស្សនកិច្ចប្រកបដោយភាពរីករាយនេះ លោកគួច សុខលី ដែលសហស្ថាបនិកកសិដ្ឋានចិញ្ចឹម និងកែច្នៃទឹកដោះគោគិរីសួគ៌ បានធ្វើបទបង្ហាញយ៉ាងលម្អិតពីដំណើរការនៃការចិញ្ចឹមគោយកទឹកដោះ ការថែទាំ ការឲ្យចំណី ការបង្កាត់ពូជ ក៏ដូចជាដំណាក់កាលនៃការកែច្នៃ ការថែរក្សាអនាម័យ និងគុណភាពដើម្បីកែច្នៃទឹកគោសុទ្ធប្រកបដោយគុណភាព១០០%។

លោកបានបញ្ជាក់ប្រាប់ថា៖ «យើងចង់បង្ហាញថា យើងមានកសិដ្ឋានចិញ្ចឹម និងកែច្នៃទឹកដោះគោដ៏ទំនើបដោយខ្លួនឯង ដោយមិនចាំបាច់នាំចូលពីស្រុកក្រៅ ព្រោះយើងអាចគ្រប់គ្រងគុណភាពតាំងពីដើមដល់ចប់ មិនថា ដំណាក់កាលចិញ្ចឹម ថែទាំ និងកែច្នៃ ជាដើម។ យើងបង្កើតកសិដ្ឋានមួយនេះ ដើម្បីផ្តល់ជូនឲ្យប្រជាពលរដ្ឋខ្មែរយើងនូវផលិតផលទឹកគោស្រស់សុទ្ធ១០០% ពីកន្លែងកែច្នៃទឹកដោះគោដោយខ្លួនឯង ដែលមានការធានា និងការយកចិត្តទុកដាក់ខ្ពស់ទាំងគុណភាព និងអនាម័យ»។

ក្រោយពីបានស្តាប់ពីការធ្វើបទបង្ហាញនានា និងចង្វាក់ផលិតកម្មទាំងមូល នៅកសិដ្ឋានគិរីសួគ៌ មេចុងភៅជើងចាស់ សុង តេង ក៏បានបង្ហាញថ្វីដៃ និងទេពកោសល្យធ្វើម្ហូបរបស់លោក ផងដែរ ដោយយកទឹកដោះគោស្រស់គិរីសួគ៌ មកធ្វើជាគ្រឿងផ្សំ ដើម្បីធ្វើឲ្យមុខម្ហូបកាន់តែមានរសជាតិឆ្ងាញ់ពិសាមួយកម្រិតទៀត។

សូមបញ្ជាក់ថា កសិដ្ឋានគិរីសួគ៌ គឺជាកសិដ្ឋានទឹកដោះគោធំជាងគេបំផុតនៅកម្ពុជា ដោយបច្ចុប្បន្ន កសិដ្ឋាន មានគោចិញ្ចឹមយកទឹកដោះជាង៩០០ក្បាល ដែលត្រូវបាននាំចូលមកពីប្រទេសអូស្ត្រាលី ស្ថិតលើលើផ្ទៃដី៣០០ហិកតា ក្បែរជើងភ្នំតាម៉ៅ ស្រុកបាទី ខេត្តតាកែវ។

ជាមួយគ្នានេះ លោក គួច សុខលី បានបញ្ជាក់ថា កសិដ្ឋានរបស់លោក ដែលបច្ចុប្បន្នមានរោងចក្រកែច្នៃទឹកដោះគោប្រកបដោយបច្ចេកវិទ្យាទំនើបដោយខ្លួនឯង និងមានសមត្ថភាពផលិតទឹកដោះគោបាន១២០០០លីត្រជារៀងរាល់ថ្ងៃនោះ គ្រោងកែច្នៃទឹកដោះគោឲ្យបាន២ម៉ឺនលីត្រក្នុង១ថ្ងៃ និងពង្រីកផ្ទៃដីឲ្យបានពី៥ ទៅ៦ហិកតា ក្នុងឆ្នាំ២០២២ ដើម្បីឆ្លើយតបទៅនឹងតម្រូវការទីផ្សារ។

កសិដ្ឋានគិរីសួគ៌ បានដំណើរការលក់យ៉ាងជោគជ័យនូវផលិតផលទឹកដោះគោ២ប្រភេទបន្ថែមទៀតនៅឆ្នាំនេះ គឺ KRISU Barista សម្រាប់ទីផ្សារកាហ្វេដែលកំពុងរីកចម្រើនយ៉ាប់ឆាប់រហ័សនៅកម្ពុជា និង KIRISU 0% Fat សម្រាប់អ្នកដែលផ្តោតលើសុខភាព។

គិរីសួគ៌ ក៏បានក្លាយជាកសិដ្ឋានដំបូងគេក្នុងការឈ្នះ «ពានមាសឧស្សាហកម្មបៃតងកម្ពុជា ឬ Cambodia Green Industry Awards» ផងដែរ ក្នុងកម្មវិធីចែកវិញ្ញាបនបត្រ និងប្រគល់ពានរង្វាន់ ដែលត្រូវបានរៀបចំជាលើកទី១ដោយក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ កាលពីថ្ងៃទី១៦ ខែធ្នូ ឆ្នាំ២០២១៕

អត្ថបទ៖ In Sopheng

ពាក្យទាក់ទង