១០ ចំណុចដកស្រង់ពីខ្សែជីវិតពិតរបស់ Jonghyun និមិត្តរូបម្នាក់ប្រចាំ K-POP

2022-04-08 03:09:48
ចំនួនមតិ 0 | ចំនួនចែករំលែក 0

ចន្លោះមិនឃើញ

កន្លងទៅរយៈពេល ៥ឆ្នាំហើយ ដែល Jonghyun (SHINee) បានលាចាកលោកនេះ ទៅកាន់ទីដ៏សែនស្ងប់ ហើយទោះបីឃ្លាតទៅឆ្ងាយទៅហើយក្ដី ក៏លោកនៅតែស្ថិតក្នុងដួងចិត្តរបស់អ្នកគាំទ្រគ្រប់គ្នាដែរ។

ជាក់ស្ដែងសម្រាប់សមាជិក SHINee វិញ ក៏តែងចាត់ទុកថាក្រុមមានសមាជិក ៥នាក់ដដែល មិនផ្លាស់ប្ដូរឡើយ។ ស្រមោលរបស់ Jonghyun នៅតែនៅជាប់គ្រប់គ្នា អមជាមួយនឹងនឹងអនុស្សាវរីយ៍ល្អៗបំភ្លេចមិនបាន។

ពេលនេះសូមលើកយករឿងរ៉ាវល្អៗ និងចំណុចមួយចំនួនរបស់តារាប្រុសសំឡេងខ្ពស់បំផុតប្រចាំផលិតកម្ម SM៖

១. Kim Jonghyun កើតនៅថ្ងៃទី០៨ ខែមេសា ឆ្នាំ១៩៩០ ក្នុងទីក្រុងសេអ៊ូល ប្រទេសកូរ៉េខាងត្បូង។ លោកមានបងស្រីម្នាក់ឈ្មោះ Kim Song Dam។

២. តាមពិតទៅ Jonghyun ជាមនុស្សដែលកម្របង្ហាញពីជីវិតឯកជនណាស់ ប៉ុន្តែតាមការឲ្យដឹងពីបណ្ដាញសារព័ត៌មានកន្លងមក Jonghyun ធំដឹងក្ដីក្រោមការមើលថែទាំងស្រុងពីម្ដាយ និងបងស្រី។ ម្យ៉ាងពេលចេញមុខក្នុងកម្មវិធី ជាទូទៅលោកកម្រនិយាយដល់ឪពុកណាស់ ប៉ុន្តែក៏មានម្ដង Jonghyun បានបង្ហើបថាឪពុកលោកជាមនុស្សតឹងរឹងណាស់។ ជាក់ស្ដែងម្ដាយ និងបងស្រី តែងបង្ហាញក្ដីស្រឡាញ់ទៅកាន់កូន/ប្អូនម្នាក់នេះ ដោយឧស្សាហ៍ចំណាយពេលទៅគាំទ្រ ឬទៅមើល Concert ផ្ទាល់ មិនថាការប្រគំតន្ត្រីក្រុម ឬទោលទេ។

៣. លោកបោះបង់ការសិក្សាថ្នាក់ទី ១០ ដើម្បីបន្តអាជីពសិល្បៈ ប៉ុន្តែលោកបានរៀននៅសាកលវិទ្យាល័យ Chungwoon មុនចូលសាកលវិទ្យាល័យ Myongji ជាកន្លែងដែលលោកបានទទួលសញ្ញាប័ត្រអនុបណ្ឌិត ផ្នែកភាពយន្ត និងតន្ត្រី។

៤. Jonghyun មិនត្រឹមតែពូកែខាងច្រៀង និងរាំទេ ប៉ុន្តែលោកក៏ចំណាប់ខាងលេងឧបករណ៍តន្ត្រីដែរដូចជា ហ្គីតា បាស និងព្យ៉ាណូ។

៥. សមាជិក SHINee ម្នាក់នេះឧស្សាហ៍ច្រឡំទិសណាស់ ហើយវង្វេងញឹកញាប់ទៀតផង។

៦. លោកចូលចិត្តមើលរឿងខ្មោច ឬរឿងបែបភ័យរន្ធត់ ហើយរឿងដែលចូលចិត្តមើលជាងគេគឺ «Phone Booth»។

៧. ទម្លាប់របស់ Jonghyun គឺថាឲ្យតែពេលភ័យបុកពោះរឿងអ្វីមួយ លោកទៅជានិយាយញាប់ ប៉ុន្តែដោយសារលោកជាមនុស្សនិយាយច្រើនស្រាប់ ទើបគ្មានអ្នកណាចាប់អារម្មណ៍ពីទម្លាប់មួយនេះ។

៨. បើមានពេលទំនេរ Jonghyun ចូលចិត្តមើលរឿង រាំលេង តែងបទចម្រៀង និងលេងព្យ៉ាណូ។

៩. Jonghyun គឺជាមនុស្សម្នាក់ដែលរ៉ូមែនទិកបំផុត ងាយប៉ះទង្គិចផ្លូវអារម្មណ៍ ហើយងាយយំណាស់។ បុរសម្នាក់នេះគឺជាមនុស្សដែលចូលចិត្តរៀបចំអ្វីគ្រប់យ៉ាងឲ្យមានសណ្ដាប់ធ្នាប់ និងចាត់ចែងការងារហើយអស់ មុនចំណាយពេលលេងកម្សាន្តអ្វីមួយ។

១០. ឈានដល់ថ្ងៃទី១៨ ខែធ្នូ ឆ្នាំ ២០១៧ Jonghyun សម្រេចលាចាកឆ្ងាយពីគ្រប់គ្នាលើពិភពលោកនេះទៅទីដ៏សែនឆ្ងាយលែងវិលត្រឡប់មកវិញជារៀងរហូត។ លោកបានស្លាប់ដោយសារឥទ្ធិពលផ្សែងពុលមួយប្រភេទ។ មូលហេតុធំ ដែលត្រូវបានគេរកឃើញ គឺបណ្ដាលមកពីទំហំនៃជំងឺបាក់ទឹកចិត្ត វាយប្រហារមកលើលោកខ្លាំងពេក៕