ក្រោយអ្នកគាំទ្រខ្លះមិនពេញចិត្តការដឹកនាំរបស់ Honda អតីតកីឡាករជម្រើសជាតិតបដូច្នេះ

2022-05-18 08:57:45
ចំនួនមតិ 0 | ចំនួនចែករំលែក 0

ចន្លោះមិនឃើញ

«គួរតែលេីកទឹកចិត្ត និងផ្ដល់ការគោរពជូនគាត់ ( Keisuke Honda ) ព្រោះគាត់លះបង់ច្រេីនណាស់សម្រាប់បាល់ទាត់កម្ពុជា កាលពីមុនចំណាយលុយច្រេីនជួលគ្រូបង្វឹក តែទម្រង់លេងដូចជាមិនលេីសហ្នឹងទេ» នេះជាសម្ដីរបស់កីឡាករវិសាខា ទៀត គឹមហេង ក្រោយឃើញអ្នកគាំទ្រមួយចំនួនចង់ឲ្យអ្នកចាត់ការរូបនេះចាកចេញពីការដឹកនាំកម្ពុជា បន្ទាប់ពីចាញ់ធ្លាក់ចេញពីស៊ីហ្គេមនៅវៀតណាមត្រឹមវគ្គជម្រុះពូល B។

អតីតយុវជនដែលដុះខាត់ចេញពីសាលាបាល់ទាត់ជាតិបាទីរូបនេះបានពន្យល់យ៉ាងដូច្នេះថា លោក Honda ជាកីឡាករបាល់ទាត់ដែលជោគជ័យម្នាក់នៅប្រទេសជប៉ុន ដែលល្បីពេញពិភពលោក។ លោកបានចំណាយទាំងពេលវេលា និងថវិកាផ្ទាល់ខ្លួន ក្នុងការជួយជ្រោមជ្រែងដឹកនាំក្រុមជម្រើសជាតិកម្ពុជា។

កីឡាកររបស់ក្លឹបវិសាខាខាងលើបាននិយាយថា «ដោយសារតែខ្ញុំមើលឃើញ ហើយក៏ជាកីឡាករមួយរូបដែរបង ខ្ញុំយល់ដឹងថាអ្វីទៅជាបាល់ទាត់។ គាត់មកលះបង់ច្រើនក្នុងវិស័យបាល់ទាត់នៅកម្ពុជាយើងទាំងពេលវេលាផ្ទាល់ខ្លួន ទាំងកម្លាំងកាយកម្លាំងចិត្ត។ ហេតុអ្វីបានជាខ្ញុំនិយាយចឹង ដោយសារតែគាត់ជាកីឡាករបាល់ទាត់ដែរជោគជ័យម្នាក់របស់ប្រទេសជប៉ុន»។

រំលឹកថា លោក Honda នឹងផុតកុងត្រាក្នុងការដឹកនាំក្រុមជម្រើសជាតិកម្ពុជានាអំឡុងផុតស៊ីហ្គេមឆ្នាំ២០២៣ ប៉ុន្តែចំពោះការបន្តកុងត្រាបន្ថែមក្រោយពេលផុតឬអត់នៅមិនទាន់មានអ្នកណាដឹងឡើយ ព្រោះពេលវេលាដឹកនាំនៅវែងឆ្ងាយ។ ប៉ុន្តែលោកត្រូវបានអ្នកគាំទ្រមួយចំនួនធំពេញចិត្តចំពោះការជួយមួយនេះ៕

អត្ថបទ៖ ស្រី សុវណ្ណដារ៉ា