Sterling ចេញពីកាតាទៅស្រុកអង់គ្លេស ក្រោយមានចោរគាស់ផ្ទះ

2022-12-05 11:59:48
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធក្រុមជម្រើសជាតិអង់គ្លេសកីឡាករ Raheem Sterling បានចាកចេញពីប្រទេសកាតា ទៅកាន់ប្រទេសអង់គ្លេស ក្រោយពីឮថាចោរប្រដាប់អាវុធគាស់ផ្ទះរបស់ខ្លួន។ នេះបើតាមការចុះផ្សាយរបស់សារព័ត៌មាន BBC។

លោក Gareth Southgate គ្រូបង្វឹកក្រុមជម្រើសជាតិអង់គ្លេសបានអនុញ្ញាតឱ្យកីឡាករក្លឹប Chelsea រូបនេះទៅផ្ទះវិញ ហើយនៅរង់ចាំមើលប៉ុន្មានថ្ងៃទៀតសិន។

Sterling អវត្តមានក្នុងប្រកួតប៉ះនឹងក្រុមសេណេហ្គាល់ កាលពីថ្ងៃអាទិត្យកន្លងទៅ។ ប្រកួតបន្ទាប់របស់អង់គ្លេស គឺប៉ះបារាំងនៅថ្ងៃសៅរ៍សប្ដាហ៍នេះ សម្រាប់វគ្គ ៨ក្រុមចុងក្រោយនៃ World Cup។

ចោរប្រដាប់អាវុធមួយក្រុមបានគាស់ចូលផ្ទះរបស់ Sterling ដោយលួចយករបស់មានតម្លៃមួយចំនួនរួមមាន គ្រឿងអលង្ការ និងនាឡិកាដៃជាដើម។ យ៉ាងណាមិញ មិនមានអំពើហិង្សាណាបានផ្ទុះឡើងទេ ខណៈពេលត្រូវចោរគាស់ចូល មិនមានមនុស្សនៅក្នុងផ្ទះទេ។ នេះបើតាមរបាយការណ៍របស់ប៉ូលិស។

អ្នកនាំពាក្យរបស់ Sterling បានលើកឡើងថា កីឡាកររូបនេះត្រលប់ទៅអង់គ្លេសវិញ ដោយសារតែបារម្ភពីសុវត្ថិភាពរបស់កូនៗរបស់ខ្លួន៕

ប្រភព៖ BBC អត្ថបទ៖ សេរី មង្គល