ប្រធានសហព័ន្ធកីឡាជឺជីតស៊ូ៖ សកម្មភាពនានាជាចលនាជំរុញកីឡាមួយនេះឲ្យរីកចម្រើន

2023-01-30 03:42:30
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រធានសហព័ន្ធកីឡាជឺជីតស៊ូកម្ពុជា ថាសកម្មភាពតិច ឬច្រើន និងការប្រកួតនានាគឺជាចលនាជំរុញប្រភេទកីឡាមួយនេះឲ្យមានភាពរីកចម្រើន និងបណ្ដុះទឹកចិត្តយុវជនឲ្យស្រឡាញ់ចូលចិត្ត។

បណ្ឌិត សេង ប៊ុនសុង (រូបភាពផ្ដល់ជូន)

លោកបណ្ឌិត សេង ប៊ុនសុង ប្រធានសហព័ន្ធបានឲ្យដឹងថា លោកពិតជាមានចិត្តសប្បាយរីករាយជាខ្លាំងចំពោះភាពរីកចម្រើន និងការសហការគ្នារៀបចំការប្រកួតក៏ដូចជាព្រឹត្តិការណ៍ផ្សេងៗកន្លងមកនេះ។ ពិសេសភាពជោគជ័យនៃការប្រកួតជើងឯកថ្នាក់ជាតិលើកទី១ ឆ្នាំ២០២៣ នេះតែម្ដង។

(រូបភាពផ្ដល់ជូន)

ព្រឹទ្ធាចារ្យកីឡារូបនេះបន្ថែមទៀតថា អ្វីដែលលោកមើលឃើញគឺការខំប្រឹងប្រែងទាំងអស់របស់មន្ត្រីសហព័ន្ធ និងមិត្តដែលជាបរទេសមកជួយនានាគឺបានបង្ហាញភាពរីកចម្រើន និងធ្វើកាន់តែបានល្អពីមួយកម្រិតទៅមួយកម្រិតបើទោះជាកិច្ចការទាំងនេះថ្មីមិនធ្លាប់ធ្វើពីមុនក្ដី។

ប្រធានសហព័ន្ធខាងជឿជាក់ថា កិច្ចខំប្រឹងប្រែង និងការរៀបចំឲ្យមានព្រឹត្តិការណ៍តូចធំជាបន្តបន្ទាប់នេះនឹងជំរុញឲ្យសហព័ន្ធមានភាពល្បីល្បាញ សំបូរធនធាន និងរឹតតែមានអ្នកស្រឡាញ់ចូលចិត្ត និងចង់ហ្វឹកហាត់កាន់តែច្រើនទៅៗ។

(រូបភាពផ្ដល់ជូន)

រំលឹកដែរថា ម្សិលមិញនេះសហព័ន្ធកីឡាជឺជីតស៊ូកម្ពុជា បានធ្វើពិធីបិទបញ្ចប់ការប្រកួតជើងឯកថ្នាក់ជាតិ លើកទី១ របស់ខ្លួនហើយនៅក្នុងពហុកីឡដ្ឋានជាតិ ក្រោយចំណាយពេលប្រកួតអស់រយៈពេល ៣ថ្ងៃចាប់ពីថ្ងៃទី២៧ ដល់ ២៩ ខែមករា ២០២៣។ ក្លឹបដែលបានចូលរួមមាន ៧ និងសរុបកីឡាករ កីឡាការិនី ទាំងមាន ២៨នាក់៕