បើមិនធ្លាប់ គួរសាកម្ដង "កោះហាន" តំបន់ដែលជាឋានសួគ៌បៃតង លើដី និងផ្ទៃទឹកនៃខេត្តស្ទឹងត្រែង

2023-03-17 02:51:13
ចំនួនមតិ 0 | ចំនួនចែករំលែក 0

ចន្លោះមិនឃើញ

តំបន់ភូមិភាគឥសាន្តរបស់កម្ពុជាដែលមានខេត្តរតនៈគីរី មណ្ឌលគីរី និងស្ទឹងត្រែង គឺជាជម្រុកនៃតំបន់ទេសចរណ៍ធម្មជាតិដ៏ល្អប្រណិតៗជាច្រើន ជាក់ស្ដែងដូច "កោះហាន" ត្រូវបានគេចាត់ទុកថា គឺជាឋានសួគ៌បៃតង លើដី និងផ្ទៃទឹកនៃខេត្តស្ទឹងត្រែង។

តាមទីតាំងភូមិសាស្ត្រ "កោះហាន" ស្ថិតនៅឃុំកោះស្នែង ស្រុកបូរីអូរស្វាយសែនជ័យ ខេត្តស្ទឹងត្រែង។ទីនោះ គឺជាតំបន់ទេសចរណ៍ បាន និងកំពុងពេញនិយម ជាមួយសក្ដានុពលអំណោយផលពីធម្មជាតិច្របាច់បញ្ចូលគ្នារវាងឆ្នេរខ្សាច់ ព្រៃលិចទឹក និងធនធានទឹក ដែលបង្កើតបានជាផ្ទាំងទស្សនីយភាព ដ៏ល្អឯកស្ទើររកប្រដូចគ្មាន។ ដូច្នេះហើយ ទើបគេប្រសិទ្ធនាមថា គឺជាឋានសួគ៌បៃតង លើដី និងផ្ទៃទឹកនៃខេត្តជាប់ជាយដែនប្រទេសឡាវមួយនេះ។

"កោះហាន" ស្ថិតក្នុងតំបន់អភិរក្សជីវចំរុះ នៃតំបន់រ៉ាមសារ តាមដងទន្លេមេគង្គលើ នាខេត្តស្ទឹងត្រែង។ តាមទំព័រ”Koh Han Community Based Ecotourism សហគមន៍អេកូទេសចរណ៍"សម្រស់កោះហាន សហគមន៍អេកូទេសចរណ៍សម្រស់កោះហានមានចំនួន៤ភូមិគឺ ភូមិកោះស្នែង ភូមិកោះកី ភូមិកោះស្រឡៅ និងភូមិជាំធំ។

នាខែនេះ តំបន់ទេសភាពនេះពិតជាស្រស់ស្អាត ជាមួយឆ្នេរខ្សាច់សក្បុស ជិះកាយ៉ាក់ ទស្សនាព្រៃលិចទឹកបៃតងខ្ចី ជាមួយឬសឈើដ៏ទាក់ទាញនៅកណ្តាលទន្លេមេគង្គ។ ជាមួយគ្នា គ្រប់គ្នាអាចភ្លក្សអាហារឆ្ងាញ់ៗ ត្រីស្រស់ៗ ដែលចំអិនដោយសហគមន៍កាន់តែពិសេសយើងអាចជិះទស្សនា សត្វស្លាប តំបន់ថ្មកំបោរនៃតំបន់រ៉ាមសារផងដែរ។

ប្រសិនបើប្រិយមិត្តមានបំណងចង់ទៅកម្សាន្តនៅទីនោះ លោកអ្នកគ្រាន់តែធ្វើដំណើរចេញពីក្រុងស្ទឹងត្រែង ឆ្លងស្ពានសេកុង ចម្ងាយ ២៣.៥គីឡូម៉ែត្រ តាមផ្លូវជាតិលេខ ៧ និងមានផ្លូវលំក្រាលគ្រួសក្រហមចម្ងាយ ៣.៥គីឡូម៉ែត្រប៉ុណ្ណោះ លោកអ្នកនឹងទៅដល់ទីឋានដែលមានទេសភាពស្រស់ស្អាត និងខ្យល់អាកាសបរិសុទ្ធបំផុតមួយនេះជាក់ជាមិនខាន៕