ក្រុមតេក្វាន់ដូ ITF ក្រសួងមហាផ្ទៃ៖ សមត្ថភាពមិនធម្មតាជាប់ចំណាត់ថ្នាក់លេខ១ រហូត ២ដងជាប់គ្នានៅកីឡាជាតិ លើកទី៣-៤ ក្នុងចំណោមកីឡាទាំងអស់របស់ក្រសួង

2024-11-14 00:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមកីឡាតេក្វាន់ដូ ITF ក្រសួងមហាផ្ទៃ បង្ហាញសមត្ថភាពមិនធម្មតានោះឡើយ ពោលជាប់ចំណាត់ថ្នាក់លេខ ១ ដល់ទៅ ២ដងជាប់គ្នាក្នុងចំណោមប្រភេទកីឡាផ្សេងៗទាំងអស់របស់ក្រសួងមហាផ្ទៃ នៃព្រឹត្តិការណ៍កីឡាជាតិ លើកទី៣-៤ ដែលបញ្ចប់ទៅថ្មីៗនេះ។

រូបភាពផេកក្រុមប្រឹក្សាកីឡាក្រសួងមហាផ្ទៃ

លោក ប៉ាល់ ជីវ័ន គ្រូបង្វឹកក្រុមតេក្វាន់ដូ ITF របស់ក្រសួងមហាផ្ទៃ បានឲ្យដឹងថា ក្រុមមហាផ្ទៃរបស់លោកក្នុងព្រឹត្តិការណ៍កីឡាជាតិទាំងពីរលើកចុងក្រោយនេះជាប់ចំណាត់ថ្នាក់លេខ១ ចំនួន២ដងជាប់គ្នាមកហើយក្នុងចំណោមបណ្ដាក្រសួង រាជធានី-ខេត្ត ដែលចូលរួមប្រកួតប្រជែង (កីឡាជាតិលើកទី៣ ITF មហាផ្ទៃ ឈ្នះមេដាយសរុប១៨គ្រឿង មាស១១ ប្រាក់៣ សំរឹទ្ធ៤) (កីឡាជាតិលើកទី៤ ITF មហាផ្ទៃ ឈ្នះមេដាយសរុប១៥គ្រឿង មាស១០ ប្រាក់២ សំរឹទ្ធ៣)។

ដោយឡែកងាកមកប្រភេទកីឡាទាំងអស់របស់ក្រសួងមហាផ្ទៃក្នុងព្រឹត្តិការណ៍ជាតិទាំង២ លើកចុងក្រោយរួមមានកីឡាជាតិ លើកទី៣ ឆ្នាំ២០២២ និងលើកទី៤ ឆ្នាំ២០២៤ ក្រុមតេក្វាន់ដូ ITF មហាផ្ទៃ ជាប់ចំណាត់ថ្នាក់លេខ១ ចំនួន ២ដងក្នុងចំណោមប្រភេទ ៣៦ផ្សេងទៀតរបស់ក្រសួង។ ឆ្នាំ២០២៤ ចំណាក់ថ្នាក់លេខ១ តេក្វាន់ដូ ITF ឈ្នះមាស១០ ប្រាក់២ សំរឹទ្ធ៣ លេខ២ ល្បុក្តតោ ឈ្នះមាស៩ ប្រាក់៦ សំរឺទ្ធ១ លេខ៣ ចំបាប់ ឈ្នះមាស៩ ប្រាក់៣ សំរឺទ្ធ១ លេខ៤ តេក្វាន់ដូ WT ឈ្នះមាស៩ ប្រាក់៣។

រូបភាពផេកក្រុមប្រឹក្សាកីឡាក្រសួងមហាផ្ទៃ

គ្រូបង្វឹកពោរពេញដោយបទពិសោធខាងលើបន្ថែមទៀតថា តាមការយល់ឃើញរបស់លោកការដាក់វិញ្ញាសាឲ្យប្រកួតនៅកីឡាជាតិឆ្នាំនេះគឺល្អប្រសើរជាងលើកមុនៗបើទោះជាវិញ្ញាសាលេងកំណត់ត្រឹម ១៥វិញ្ញាសា តិចជាងកីឡាជាតិ លើកទី៣ មែន ប៉ុន្តែបណ្ដាក្រសួង រាជធានី-ខេត្ត អាចបញ្ចូលកីឡាកររបស់ខ្លួនបានច្រើនរហូតដល់១៥នាក់។ មួយវិញទៀតការប្រកួតប្រជែងមានភាពស្វិតស្វាញឆ្លងកាត់ច្រើនប្រកួតទើបអាចឈានដល់ជុំមេដាយ និងបានបង្ហាញពីបច្ចេកទេសថ្មីៗដែលទើបប្រកួតនៅប្រទេសឥណ្ឌាដល់ក្មេងៗជំនាន់ក្រោយបានឃើញនូវអ្វីដែលអន្តរជាតិកំពុងអភិវឌ្ឍន៍ និងប្រើប្រាស់ក្នុងការប្រកួតនៅពេលសព្វថ្ងៃ។

រូបភាពផេកក្រុមប្រឹក្សាកីឡាក្រសួងមហាផ្ទៃ

បញ្ជាក់ដែរថា ក្រុមតេក្វាន់ដូ ITF ក្រសួងមហាផ្ទៃ ក្នុងព្រឹត្តិការណ៍កីឡាជាតិ លើកទី៤ ដែលបញ្ចប់ទៅថ្មីៗនេះឈ្នះមេដាយសរុប១៥គ្រឿង មាស១០ ប្រាក់២ សំរឹទ្ធ៣ ជួយឲ្យក្រសួងរបស់ខ្លួនជាប់ចំណាត់ថ្នាក់លេខ១ ក្នុងចំណោមក្រសួងទាំង៣ និង ២៥ រាជធានី-ខេត្ត ចូលរួម។ កីឡាជាតិ លើកទី៤ នេះក្រសួងមហាផ្ទៃ ជាប់ចំណាត់ថ្នាក់លេខ១ ដោយឈ្នះមេដាយច្រើនជាងគេបង្អស់សរុប ២៤៨គ្រឿង មេដាយមាស១២៧ ប្រាក់៧២ សំរឺទ្ធ៤៩ តាមពីក្រោយដោយក្រសួងការពារជាតិ ជាប់ចំណាត់ថ្នាក់លេខ២ ឈ្នះមេដាយសរុប ១៨៨គ្រឿង មាស៩១ ប្រាក់៥៦ សំរឹទ្ធ៤១ ចំណាត់ថ្នាក់លេខ៣ ក្រសួងសេដ្ឋកិច្ច ឈ្នះមេដាយសរុប៤៩គ្រឿង មាស១៩ ប្រាក់១៤ សំរឹទ្ធ១៦៕