អ្នកចាំទី Man Utd នឹងផ្ទេរទៅចូលរួមជាមួយ Crystal Palace

2023-08-30 11:30:02
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាំទីក្លឹប Manchester United កីឡាករ Dean Henderson នឹងផ្ទេរទៅចូលរួមជាមួយក្លឹប Crystal Palace។ នេះបើយោងតាមការចុះផ្សាយរបស់ Fabrizio Romano។

ក្លឹបអង់គ្លេស Palace នឹងធ្វើការផ្ទេរអ្នកចាំទី Henderson ក្នុងតម្លៃប្រមាណ ២០ លានផោន។ ទាំងភាគីក្លឹបទាំងពីរ និងភាគីកីឡាករសុទ្ធតែមានអារម្មណ៍ល្អជាមួយគ្នា ហើយព្រមព្រៀងគ្នា។ ការចរចានៅតែបន្ត សម្រាប់បញ្ហាលម្អិតមួយចំនួនទៀតប៉ុណ្ណោះ។ បើមិនមានអ្វីប្រែប្រួលទេ Crystal Palace នឹងប្រកាសជាផ្លូវការនូវការផ្ទេរមួយនេះ នាពេលដ៏ខ្លីខាងមុខ។

អ្នកចាំទីអង់គ្លេសវ័យ ២៦ ឆ្នាំ Dean Henderson គឺជាកីឡាករចេញពីថ្នាលយុវជន និងជាអ្នកចាំទីបម្រុងរបស់បិសាចក្រហម ហើយបានចូលរួមឈុតធំតាំងពី ២០១៥ មក។ នៅពេលដែលអ្នកចាំទីបង្គោលរបស់ក្លឹបមានបញ្ហារបួស Henderson ត្រូវបានសង្កេតឃើញថា បានបង្ហាញទម្រង់លេងយ៉ាងល្អ ក្នុងពេលចាំទីជំនួស។

កាលពីខែកក្កដាកន្លងទៅ មានពាក្យចចាមអារ៉ាមមួយចំនួនលើកឡើងថា Henderson អាចត្រូវបានតម្លើងជាអ្នកចាំទីដៃទីមួយរបស់បិសាចក្រហម ក្រោយក្លឹបបានចែកផ្លូវជាមួយ David De Gea។ ទោះជាយ៉ាងណា ការផ្ទេរចូលអ្នកចាំទី Andre Onana ក្នុងតម្លៃប្រមាណ ៦០លានផោន កាលពីពេលថ្មីៗនេះ បានបិទបញ្ចប់ពាក្យចចាមអារ៉ាមនេះ ហើយមានន័យថា Henderson ត្រូវចាកចេញពីក្លឹបបើចង់ក្លាយជាអ្នកចាំទីដៃទីមួយ៕

ប្រភព៖ Twitter អត្ថបទ៖ សេរី មង្គល