Gavi រងរបួសជង្គង់ធ្ងន់ធ្ងរ ដែលអាចបាត់មុខពីពិភពបាល់ទាត់ពេញមួយរដូវកាល

2023-11-20 11:11:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែបម្រើអេស្ប៉ាញ និងក្លឹប Barcelona កីឡាករ Gavi បានរងរបួសជង្គង់ធ្ងន់ធ្ងរ ដោយអាចជាករណីដាច់សសៃពួរ ACL។ របួសនេះអាច ធ្វើឱ្យ Gavi បាត់មុខពីពិភពបាល់ទាត់ពេញមួយរដូវកាល។ នេះបើតាមការចុះផ្សាយរបស់សារព័ត៌មាន Goal។

កីឡាកររូបនេះត្រូវបានផ្លាស់ចេញក្នុងនាទីទី២៦ ក្នុងប្រកួតរវាងក្រុមជម្រើសជាតិអេស្ប៉ាញ ទល់នឹងហ្សកហ្ស៊ី នៅវគ្គជម្រុះ Euro 2024 ដែលប្រព្រឹត្តិទៅកាលពីយប់ថ្ងៃអាទិត្យ។

អេស្ប៉ាញ យកឈ្នះហ្សកហ្ស៊ីក្នុងលទ្ធផល ៣ ទល់នឹង ១ ដែលជ័យជម្នះនេះធ្វើឱ្យអេស្ប៉ាញឡើងទៅលេងនៅព្រឹត្តិការណ៍បាល់ទាត់ជើងឯកទ្វីបអឺរ៉ុប ដែលប្រព្រឹត្តិទៅនៅប្រទេសអាល្លឺម៉ង់នៅឆ្នាំ២០២៤។

បើតាមអ្នកកាសែត Fabrizio Romano បានឱ្យដឹងថា ខាងក្លឹប Barcelona មានភាពមិនសប្បាយចិត្តយ៉ាងខ្លាំង ដោយយោងលើហេតុផលថា Gavi លេងញឺកញាប់ ហើយលេងនៅក្នុងប្រកួតដែលមិនសូវចាំបាច់។

Gavi នៅក្នុងរដូវកាល ២០២៣/២៤នេះ លេងបាន ១៥ប្រកួតនៅ Barcelona ដោយផ្ដើមក្នុងជម្រើស ១១នាក់ដំបូង ១៣ដងទៅហើយ។ នៅក្នុងឆ្នាំ២០២៣នេះ Gavi លេងឱ្យអេស្ប៉ាញបាន ១០ដង៕

ប្រភព៖ Goal អត្ថបទ៖ សេរី មង្គល