លោកជំទាវ ពេជ ចន្ទមុន្នី៖ ពេញចិត្តចំពោះសមត្ថភាពក្រុមកីឡារាំ និងរកអ្នកជួយគាំទ្រសហព័ន្ធបន្ថែមទៀត

2023-12-12 08:36:58
ចំនួនមតិ 0 | ចំនួនចែករំលែក 0

ចន្លោះមិនឃើញ

លោកជំទាវបណ្ឌិត ពេជ ចន្ទមុន្នី បង្ហាញការពេញចិត្តជាខ្លាំងចំពោះសមត្ថភាពកីឡាករ កីឡាការិនីរាំ ដែលធ្វើការប្រកួតកាលពីម្សិលមិញ និងព្យាយាមរកអ្នកជួយគាំទ្រសហព័ន្ធបន្ថែមទៀតដើម្បីបន្តចលនាអភិវឌ្ឍន៍កីឡាមួយនេះនៅកម្ពុជា។

លោកជំទាវ ពេជ ចន្ទមុន្នី ហ៊ុន ម៉ាណែត

លោកជំទាវ ពេជ ចន្ទមុន្នី បានលើកឡើងក្នុងពិធីបិទការប្រកួតជើងឯកថ្នាក់ជាតិ ឆ្នាំ២០២៣ របស់កីឡារាំថា ពិតជាមានអារម្មណ៍សប្បាយរីករាយដែលបានឃើញការប្រកួតដ៏ល្អ និងភាពប៉ិនប្រសព្វរបស់កីឡាករ កីឡាការិនីទាំងឈុតធំ និងក្រុមថ្នាល។ លោកជំទាវសូមកោតសរសើរចំពោះទេពកោសល្យ និងការបង្ហាញក្បាច់រាំទាំងអស់ដែលមើលទៅមិនមានការខ្វះខាតអ្វីនោះទេ ពោលជក់ចិត្តសឹងគ្រប់បទ ឬគ្រប់ក្បាច់។

ទិដ្ឋភាពបិទការប្រកួត

ភរិយាសម្ដេចបរវធិបតីសរសើរផងដែរចំពោះការខំប្រឹងប្រែងរបស់សហព័ន្ធ ពិសេសរបស់ប្រធានលោកជំទាវ ញ៉ែម មរតក ដែលតស៊ូដឹកនាំសហព័ន្ធឆ្លងកាត់ការលំបាកផ្សេងៗទម្រាំឈានដល់ពេលនេះ និងបង្ហាញសក្ដានុពលកីឡាមួយនេះទាំងក្នុងស្រុក និងលើឆាកអន្តរជាតិ។

ទិដ្ឋភាពបិទការប្រកួត

លោកជំទាវ ពេជ ចន្ទមុន្នី ជឿជាក់ថាភាពខ្លាំងរបស់សហព័ន្ធ និងសមត្ថភាពកីឡាករ កីឡាការិនី ភាពល្បីល្បាញរបស់សហព័ន្ធនៅពេលនេះនឹងមានការជួយគាំទ្របន្ថែមទៀតពីសប្បុរសជន និងមហាជននានា។ ជាមួយគ្នានេះដែរលោកជំទាវនឹងកៀរគរសប្បុរសជន ឬក្រុមហ៊ុនផ្សេងៗដើម្បីងាកមកជួយគាំទ្រសហព័ន្ធបន្ថែមទៀតដើម្បីរួមចំណែកលើការអភិវឌ្ឍន៍ធនធាន ចូលរួមការប្រកួតលក្ខណៈអន្តរជាតិ ឬរៀបចំការប្រកួតនានានៅពេលខាងមុខជាដើម។

ទិដ្ឋភាពបិទការប្រកួត

រំលឹកដែរថា សហព័ន្ធកីឡារាំកម្ពុជា ម្សិលមិញនេះបានបិទបញ្ចប់ការប្រកួតជើងឯកថ្នាក់ជាតិ ឆ្នាំ២០២៣ របស់ខ្លួនហើយនៅក្នុងសាលមជ្ឈមណ្ឌលជាតិហ្វឹកហ្វឺនកីឡាក្រោមអធិបតីភាពលោកជំទាវបណ្ឌិត ពេជ ចន្ទមុន្នី និងលោកជំទាវភរិយាយថ្នាក់ដឹកនាំជាច្រើន៕